Peăng xêi 24/3, jâ Trần Thị Hoa Ry, Kăn xiâm phŏ ngăn Hô̆i đong Kuăn ngo hiăng ai roh pôu pêi cheăng a Vi ƀan hnê ngăn kong pơlê Bạc Liêu ‘na troăng hơlâ mơnhông pêi cheăng kâ tơkŭm khu pú hên kơpong hdroâng kuăn ngo. Kong pơlê Bạc Liêu dế kố ai 215 khu pêi cheăng tơrŭm (tung mê ai 7 Khu pêi cheăng tơrŭm ki ai hdroâng kuăn ngo ki mot veăng pêi tung khu pơkuâ ngăn, khu hnê mơhno cheăng), 2 Khu tơrŭm cheăng ƀă 51 khu pêi cheăng tơrŭm.

Vi ƀan hnê ngăn kong pơlê Bạc Liêu pâ thế Khu kăn cheăng dêi hnoăng Hô̆i đong hnê ngăn Kuăn ngo dêi Kuô̆k hô̆i hriăn plĕng, veăng hnê tối ăm Kuô̆k hô̆i ‘mâi rơnêu Luât pêi cheăng tơrŭm tiô troăng hơlâ ki tơtro mâu troăng hơlâ ki tŏng kum Khu pêi cheăng tơrŭm ăm i tơtro ƀă tơdroăng ki ai păng ‘nâng dêi rêm chal, rêm rơxông mơnhông.

Xông tơpui mơgêi a roh pôu pêi cheăng mê, jâ Trần Thị Hoa Ry pâ thế Vi ƀan hnê ngăn kong pơlê Bạc Liêu pơkâ thế mâu khu râ, kơvâ cheăng, kơ koan ki ngăn ‘na hnoăng cheăng chêh xo tŭm têk mâu rơkong ki veăng hnê tối veăng kum ăm Tơdroăng chêh tối ‘na Luât pêi cheăng tơrŭm ki ‘mâi rơnêu, tung mê, ai pơchân tối troh mâu troăng hơlâ mơnhông pêi cheăng kâ tơchuôm kơpong hdroâng kuăn ngo vâ kơxop hlá mơ-éa Luât pêi cheăng tơrŭm (‘mâi rơnêu) mê châ chêh tối tŭm têk, tơtro vâ pơtroh ăm Kuô̆k hô̆i tung la ngiâ.