Hơnăm 2022, ƀă tơdroăng pơkâ thế dêi hnoăng cheăng ki ai khât, Kuô̆k hô̆i hiăng rah xo kơ-êng mâu kăn pơkuâ, kăn ngăn khu xiâm kơvâ cheăng tung mâu kơvâ cheăng: Pêi chiâk deăng ƀă Mơnhông thôn pơlê; kăn pơkuâ liăn ngân; kăn pơkuâ hngêi rak liăn, kăn pơkuâ ngăn troăng prôk ƀă rơxế kơtâu, kăn ngăn ‘na mơjiâng bro kế tơmeăm, kăn ngăn kong pơlê ƀă hnoăng cheăng mâu kăn ƀô̆, kăn ngăn ‘na pơtâng tối tơdroăng kal tiô troăng hyôh Internet, um tơvi, rơ’jíu ƀă kăn ngăn ‘na tơdroăng séa ngăn.

Mâu tơdroăng ki xơpá, tơvâ tơvân, mâu tơdroăng ki ối ‘ro ƀă tá hâi pêi pro klêi tung hnoăng cheăng rak ngăn tơnêi têa đi đo châ hlo tơdrăng, tơpui leăng hên tơdroăng, hên tíu tung rôh kơ-êng ƀă tiâ mơnhên dêi mâu kăn pơkuâ, khu râ pơkuâ cheăng, tơtŭng tơpeăng troh tui lui vâ bro tơleăng troăng hơlâ.

Pôa Trần Văn Lâm, Kăn Kuô̆k hô̆i lo ing kong pơlê Bắc Giang ai tối tiah kố:

“Rơkong kơ-êng rế hía rế tro tơdroăng tâ. Peăng rơkong ki tiâ dêi mâu kăn pơkuâ ƀă dêi Chin phuh ôh tá ví, tiâ ôh tá chiâng tui”.

Ƀlêi chiâng dêi rôh kơ-êng ôh ti xê to mâu tơdroăng kơ-êng ki ôh tá ai khât, tí tăng êng mâu hnoăng cheăng pôu râng, a mâu rơkong tiâ hlê tơdroăng, hlê râ, kơvâ cheăng, tơdrăng, thăm nếo ôh tá ví mâu tơdroăng ki tro xôi dêi mâu kăn pơkuâ, khu râ kơvâ cheăng. Ƀlêi chiâng tâ nếo cho ngế ki kơ-êng ƀă ngế ki tiâ mâu rơkong kơ-êng mê pơrá ai tơdjuôm môi tơdroăng cho mơjiâng vâ tí tăng troăng hơlâ ăm mâu tơdroăng rak ngăn tơnêi têa ki hiăng pơkâ, dế pơkâ ƀă kô pơkâ mơ’no.

Tâng môi tiah a mâu rôh kơ-êng ƀă tiâ mơnhên, mâu kăn Kuô̆k hô̆i ƀă mâu kăn pơkuâ khu xiâm, kơvâ cheăng, mâu ngế cheăng tung Chin phuh hiăng mơhno tối nhên hiâm mơno tơdrăng, tối tro ‘na mâu tơdroăng ki ôh tá tơniăn sap ing tơdroăng ki ai khât vâ mơ’no mâu troăng hơlâ pêi pro teăm tơdrêng, mê tơdroăng ki rah xo mâu inâi ki kal vâ séa ngăn kum tăng ‘nâi trâu hơngế tâ mâu tơdroăng tá hâi pêi pro klêi, ối tơvâ tơvân tung rêm kơvâ cheăng dêi rak ngăn tơnêi têa.

Rôh séa ngăn dêi Kuô̆k hô̆i ‘na tơdroăng ki pro mơhrê a 2 to hngêi pơkeăng Bạch Mai ƀă Việt Đức hngêi pơkeăng ki châ pro má 2 cho môi tơdroăng ki pơtih ki nhên. Klêi kơ’nâi séa ngăn dêi Kuô̆k hô̆i, Ngế pro xiâm hnê ngăn Chin phuh hiăng séa ngăn tơdrêng a 2 tơdroăng tơkêa kố ƀă pơkâ thế mơjiâng Tôh pêi cheăng mơnhên tối tâi tâng tung pơla pêi pro tơdroăng tơkêa ƀă pơkâ mơ’no troăng hơlâ pêi pro ki nhên.

Pôa Nguyễn Anh Trí, ối tung khu kăn Kuô̆k hô̆i lo ing pơlê kong kân Hà Nội tối kố cho túa pêi ki nếo tung hnoăng cheăng séa ngăn dêi Kuô̆k hô̆i, “rế bro rế tơtrâ”ƀă tơdroăng ki mơnhên nhên tíu ƀă hnoăng cheăng pôu râng dêi mâu tơdroăng tá hâi pêi pro klêi:

“Khu kăn séa ngăn dêi Kuô̆k hô̆i hôp ai rơkong tơpui tối. Klêi mê, Ngế pro xiâm hnê ngăn Chin phuh pơkuâ djâ khu kăn kố lăm troh vâ tơleăng mơnhên. Tơdroăng mê ăm hlo ki pơxúa dêi hnoăng cheăng séa ngăn dêi Kuô̆k hô̆i.

Tung hơnăm 2022, 4 tơdroăng ki kal hiăng châ pêi pro séa ngăn, mê cho: hnoăng cheăng túa pơkâ, tơdroăng pêi pro kơdĭng, hbrâ mơdât mơhrê liăn ngân; tơdroăng tơdah kuăn pơlê, pơkâ pơleăng mâu tơdroăng ki pơsăm tối, pơsăm tơkêng ƀă tơdroăng ki xing xoăng tíu pêi cheăng chêh bro hlá mơ-éa râ tơring, cheăm. Tơdroăng pêi pro 5 hnoăng: séa ngăn ki ai khât, ai pơxúa, mơ-eăm, tơdrăng ƀă pôu râng dêi hnoăng cheăng khât châ mơhno tối nhên tung mâu tơdroăng ki séa ngăn.

Rôh apoăng, khu kăn pơkuâ séa ngăn ai krếo thế tơ’nôm tơdroăng ki veăng dêi mâu khu ki rơkê ƀă kăn pơkuâ mâu kơ koan ki ai tơdjâk. Tâng môi tiah hdrối nah, Khu kăn Kuô̆k hô̆i bu tơkŭm pêi pro séa ngăn a mâu kong pơlê mê Khu kăn séa ngăn dêi Kuô̆k hô̆i ƀă Vi ƀan pơkuâ Kuô̆k hô̆i ôh tá lăm séa ngăn tơdrêng ê nôkố, mâu kăn Kuô̆k hô̆i athế tơkŭm séa ngăn a tâi tâng mâu tơdroăng ki kal.

Mâu tơdroăng ki tá hâi pêi pro klêi châ hlo tơdrăng vâ ‘mâi rơnêu, mâu pơkâ troăng hơlâ châ tơdâng tơ’mô, môi tuăn, ƀă tá mâu túa pêi pro ôh tá tro châ mơhno vâ tơpôu xôi hnoăng cheăng pơkuâ, pơxâu phak ƀă ki hên. Đơn pơtroh môi tiah séa ngăn tơdroăng pêi pro troăng hơlâ, luât ‘na tơdah kuăn pơlê ƀă pơkâ tơleăng pơsăm tối, pơsăm tơkêng, tiô kăn phŏ pơtâng tối tơdroăng kal Lưu Bình Nhưỡng, tơdroăng ki inâi séa ngăn kố châ môi tuăn kân khât sap ing kuăn pơlê.

Xua ga, séa ngăn ôh ti xê tơdroăng ki lăm tăng rôu mâu tơdroăng mê cho vâ mơdêk tơdroăng pêi pro tro tâ, ƀă tâng hlo ki bro xôi mê pâ thế mâu kơ koan ai hnoăng pơkuâ pơxâu phâk tiô luât pơkâ.

“Mơnhên tối ki rơkê cho ing rơkong tơpui tối dêi kuăn pơlê. Tiah mê ngăn tung tơdroăng ki séa ngăn vâ pin vêh mơnhên tối tơdroăng ki rơkê, hnoăng cheăng pôu râng dêi mâu kăn ƀô̆, malối cho mâu ngế ki ối a ko tung hnoăng cheăng tơdah kuăn pơlê”.

Tơdroăng ki vê ngăn tơƀrê tung tơdroăng cheăng dêi Kuô̆k hô̆i mê cho tơdroăng ki hâk vâ ƀă loi tơngah dêi kuăn pơlê. Ƀă kuăn plê cho mâu ngế ki đi đo séa ngăn khât mâu tơdroăng cheăng dêi Kuô̆k hô̆i, mơnhên tối tơdroăng cheăng séa ngăn dêi Kuô̆k hô̆i hiăng hơ’lêh rơdêi tá hiâm mơno ƀă túa pêi. Kố cho rơkong tơpui tối dêi kuăn pơlê:

“Kuô̆k hô̆i pơtối ai mâu tơdroăng ki hơ’lêh nếo tiô troăng séa ngăn kuăn achê kuăn pơlê, achê ƀă tơdroăng ki ai khât tung rêh ối. Xua mê, séa ngăn dêi Kuô̆k hô̆i lơ ki kơ-êng tiâ dêi Kuô̆k hô̆i pơtối dêi Kuô̆k hô̆i hneăng hdrối la pêi nôkố khŏm mơ-eăm, ai pơxúa tâ”.

Mâu hơ’lêh nếo dêi séa ngăn tro môi tiah pôa Vương Đình Huệ, Kăn xiâm hnê ngăn Kuô̆k hô̆i tối nhên, séa ngăn athế tung hiâm mơno cho tơdroăng mơjiâng; athế mơdêk châ mâu túa pơkâ ki tro, mâu túa pêi ki ‘ló; séa ngăn athế xua ki xiâm bro chiâng mơnhông:

“Séa ngăn athế tung hiâm mơno cho tơdroăng pơkâ bro, pơla bro ƀă tơtrâ mê pơkâ bro xuân cho tơdroăng ki xiâm, ton xŏn; tơtrâ cho khŏm mơ-eăm, tơtrâ khât vâ pêi pro tơdrêng. Pơkâ bro luât cho vâ pro mơnhông. Hnoăng cheăng séa ngăn xuân athế xua ki xiâm pơkâ bro mơnhông. Kuô̆k hô̆i đi đo hơ’lêh dêi tơná.

Xua mê, rêm kơ koan dêi Kuô̆k hô̆i athế pêi pro tro tơdroăng ki séa ngăn xêh, rêm Khu kăn Kuô̆k hô̆i athế tơná séa ngăn tơdroăng cheăng dêi tơná tung pơla pêi pro hnoăng cheăng, hâi khế ƀă hnoăng cheăng pôu râng a ngiâ kuăn pơlê vâ po ăm môi hneăng ki nếo ai hên tơdroăng ki loi tơngah tơniăn lĕm tung tơdroăng cheăng dêi Kuô̆k hô̆i môi tiah hnê mơhno ƀă loi tơngah dêi pôa Nguyễn Phú Trọng, kăn xiâm hnê ngăn Đảng tối nhên a Rôh po Hneăng hôp má Môi, Kuô̆k hô̆i hneăng 15”.

Tối nhên dêi pôa Vương Đình Huệ, kăn xiâm hnê ngăn Kuô̆k hô̆i tung hnoăng cheăng séa ngăn dêi Kuô̆k hô̆i ôh ti xê to vêh tối ăm rêm ngế kăn Kuô̆k hô̆i, mê rêm kơ koan dêi Kuô̆k hô̆i athế hlê plĕng tâ hnoăng cheăng dêi tơná. Séa ngăn vâ “pơkâ bro” mâu tơdroăng ki lĕm, xua tơdroăng pơkâ bro, mơnhông kal tơdroăng môi tuăn, khên tơnôu ƀă khŏm mơ-eăm xua ki pơxúa tơdjuôm dêi kuăn pơlê, pơxúa tơdjuôm dêi tơnêi têa.