Tơpui a rôh hôp, kăn hnê ngăn Hô̆i đong pơlê kong kân Hà Nội cho pôa Nguyễn Ngọc Tuấn, Kăn Hô̆i đong hnê ngăn pơlê kong kân hiăng đi đo hriăn ngăn, tơmâng mâu tơdroăng ki rơkê, túa pêi tơƀrê dêi Kuô̆k hô̆i, Vi ƀan pơkuâ Kuô̆k hô̆i; tăng ‘nâi túa pêi dêi mâu kong pơlê, pơlê kong kân vâ pơtối hơ’lêh nếo, hơ’lêh tơdroăng séa ngăn tiô troăng khên tơnôu, tơdrăng, pơxúa, rơkê, tơƀrê, séa ngăn tung mâu tơdroăng pơkâ dêi luât ƀă tơdroăng ki ai khât dêi pơlê kong kân vâ pơkâ tơleăng mâu tơdroăng.

“Hà Nội hiăng pơkâ ‘na mâu tơdroăng pơkâ tung pêi pro mơgêi séa ngăn, kố cho tơdroăng ki ai khât pơkâ mơ’no vâ séa ngăn pơtroh kơ koan ki ai tơdjâk môi tiah khu séa ngăn, Vi ƀan séa ngăn vâ mâu kơ koan kố séa ngăn, pơkâ tơleăng mâu tơdroăng ki pro xôi luât. Tơdroăng pêi pro mâu rơkong tơpui mơgêi séa ngăn xuân cho tơdroăng pơkâ vâ kơ koan tơkŭm séa ngăn, mơnhên tối kăn ƀô̆ ƀă pơkâ tơ’noăng, khĕn kơdeăn”.

Tơmiât hên ‘na tơdroăng ki trâm mâ kuăn pơlê ối ai hên tơdroăng ki ôh tá tơƀrê, bô bối, kăn pơkuâ hnê ngăn Đảng kog pơlê Long An, Kăn hnê ngăn Hô̆i đong Nguyễn Văn Được tối mâu tơdroăng ki ai khât tung tơdroăng ki trâm kuăn pơlê, mê cho: hdrối nah, tơdroăng tơkŭm po mau rôh trâm mâ kuăn pơlê dêi mâu kăn Kuô̆k hô̆i, kăn Hô̆i đong hnê ngăn râ kong pơlê, râ tơring, râ cheăm tơkŭm po krê, phá. Tơdroăng kố pro mơhrê liăn ngân.

“Hơnăm kố,khu pơkuâ Hô̆i đong hnê ngăn kong pơlê Long An pơkâ tŏng kum mâu rôh trâm mâ kuăn pơlê. Tiah mê, kô châ tŏng kum liăn ngân ƀă rôh vâ pôi tá mơhrê hên hâi khế. Tơdroăng kố hiăng châ kuăn pơlê tung kong pơlê môi tuăn”.

Kăn phŏ hnê ngăn Hô̆i đong Pơlê kong kân Đà Nẵng - jâ Nguyễn Thị Anh Thi mê ăm ‘nâi, pơlê kong kân Đà Nẵng pêi pro túa pơkâ tơkŭm po khu kăn pơkuâ kơphô̆ tiô Pơkâ dêi Kuô̆k hô̆i, tiah mê, 8 to pơlê krâm ƀă 45 to bêng ôh tá tơkŭm po hô̆i đong hnê ngăn. Xua mê, hnoăng cheăng trâm mâ kuăn pơlê tung tơdroăng pơkâ tơkŭm po khu kăn pơkuâ kơphô̆ xuân châ hơ’lêh nếo ƀă mơdêk.

“Hnoăng cheăng trâm mâ kuăn pơlê tung tơdroăng ki pơkâ tơkŭm po túa pơkâ khu kăn pơkuâ kơphô̆ xuân châ hơ’lêh nếo. Ki xiâm cho Khu pơkuâ Hô̆i đong hnê ngăn pơlê kong kân tơkŭm po tơƀrê 3 Tơdroăng “Hô̆i đong hnê ngăn ƀă kuăn pơlê”. Ing mê, hên tơdroăng châ tối tơbleăng, mâu tơdroăng ki ối trâm hên a pơlê kong kân teăm châ pơkâ tơleăng, rĕng ‘mâi mơnhông, pêi pro châ tơdroăng ki rơhêng vâ, tơdroăng loi tơngah tơxâng dêi kuăn pơlê”.

Tơpui a rôh hôp, pôa Vương Đình Huệ, kăn xiâm hnê ngăn Kuô̆k hô̆i tối nhên, hơnăm 2022, Kuô̆k hô̆i, Vi ƀan pơkuâ Kuô̆k hô̆i, mâu kơ koan dêi Kuô̆k hô̆i, Hô̆i đong hnê ngăn rêm râ kơhnâ hơ’lêh nếo, mơdêk ki rơkê, tơƀrê tung tơdroăng cheăng tá hnoăng cheăng mơjiâng luât, séa ngăn, pơkâ mâu tơdroăng ki kal dêi tơnêi têa ƀă dêi mâu kong pơlê.

Hơnăm 2023, pôa Vương Đình Huệ, kăn xiâm hnê ngăn Kuô̆k hô̆i pơkâ thế Hô̆i đong hnê ngăn mâu kong pơlê, pơlê kong kân pêi pro tro 6 hnoăng cheăng ki xiâm, tung mê, hriăn ngăn, ‘mâi rơnêu, ‘mot tơ’nôm vâ pêi pro tơdâng tơ’mô mâu troăng hơlâ pơkâ ki nếo dêi Đảng, Tơnêi, malối cho mâu tơdroăng pơkâ dêi Khu xiâm pơkuâ tơdroăng kal kí ‘na mơnhông cheăng kâ rêh ối pơlê pơla mâu kơpong.

Mơjiâng ƀă tơkŭm po tơdroăng séa ngăn hơnăm 2023 tơtro, krá tơniăn ƀă tơƀrê, pêi pro tro hnoăng cheăng séa ngăn hnoăng pơkuâ a kong pơlê, hbrâ mơdât kâ kơluâ, bro mơhrê liăn ngân. Malối, hơnăm 2023, Kuô̆k hô̆i ƀă Hô̆i đong hnê ngăn kô tơkŭm po xo phĭu pôk ƀă mâu ngế ki xua Kuô̆k hô̆i, Hô̆i đong hnê ngăn pôk lơ kĭ pơkâ.

Khu xiâm pơkuâ tơdroăng kal kí nếo pơkâ Pơkâ kơxô̆ 96 ‘na tơdroăng ki xo phĭu pôk ƀă mâu inâi, hnoăng cheăng pơkuâ, rak ngăn tung khu pơkuâ tơdroăng kal kí.

“Pơkâ thế Hô̆i đong hnê ngăn tơkŭm pêi pro tro Pơkâ kơxô̆ 96, mâu hlá mơ-éa pơkâ dêi Kuô̆k hô̆i, Vi ƀan pơkuâ Kuô̆k hô̆i ƀă ki hlê plĕng tung tơdroăng ki xo phĭu pôk cho hnoăng cheăng ki xiâm dêi hnoăng cheăng ki kal, ing mê, mơjiâng túa pơkâ ƀă mâu troăng hơlâ pêi pro tơƀrê, nhên vâ pêi pro kơtăng, ví mâu tơdroăng ki ôh tá tro, ôh tá ai túa pơkâ”.

Hô̆i đong hnê ngăn athế rak vế hnoăng cheăng ki kal tung hơ’lêh nếo rak ngăn a kong pơlê tiô troăng ki rơkê plĕng nôkố, xêt khât, tơƀrê, tơkŭm rak ngăn mơnhông; rak vế Luât ƀă luât pơkâ, mơdêk tơdroăng ki tơbleăng tơdrăng, pôu râng dêi hnoăng cheăng tơpui tối leăng ƀă tơdroăng veăng dêi kuăn pơlê; veăng kum mơjiâng mơ-éa kum Kuăn pơlê, tơniăn krê, luât hnoăng pơkuâ, rơkê, krúa, tơbleăng tơdrăng, pơtối mơdêk tơdroăng ki kum Kuăn pơlê ƀă bro chiâng tơdroăng ki tơ’lêi hlâu ăm khu mơdró kâ mơjiâng pro tê mơdró.