Môi tung mâu kơvâ cheăng ki châ kuăn pơlê An Giang tơmâng ngăn khât mê cho hnê hriâm. Hên kuăn pơlê malối tơmâng ngăn khât troh ki rơkê tung hnê hriâm, malối cho ƀă tơdroăng ki hơ’lêh nếo tung hnê hriâm pơla hdrối nah. Hên rơkong kuăn pơlê tối tiah kố, tung pơla hdrối nah, tơdroăng ki hơ’lêh nếo hnê hriâm hiăng pro pơxúa ăm mâu tơdroăng ki tơƀrê apoăng, ki rơkê tung hnê hriâm phôh thong hiăng châ hơ’lêh tiô troăng mơdêk rơkê, kơdroh bro xơpá tung tơdroăng ki pêi pro tiô ‘na rơkê.

Ƀă kơvâ hnê hriâm phôh thong, hên kuăn pơlê tối tiah kố: tơdroăng ki pơhlêh, hơ’lêh nếo hnê hriâm nôkố hiăng ƀă dế mơhno tối hên tơdroăng ôh tá tơniăn; tơdroăng ki hnê hriâm phôh thong nếo nôkố a mâu hngêi trung, rêm râ hriâm tá hâi ai tơdroăng ki hnê khât ƀă ôh tá êa kal thế tiô pơkâ; hlá mơ-éa hriâm ôh ti ai tơdroăng pơtó, ôh i xê bro pá ‘na kơxô̆ liăn hrê roê mâu hlá mơ-éa dêi mâu nôu pâ hok tro, mê ối bro mơhrê tê kơtê kơxô̆ liăn dêi pơlê pơla.

Pakĭng mê, mâu vâi o hok tro ối kal ai mâu tíu ki xah hêi ai pơxúa ƀă hên ki ê. Kơxô̆ hok tro a mâu lâm hriâm ối hên luâ râ, sap ing mê chiâng tơdjâk troh tơdroăng ki ôh tá kơtăng khât pơla thái cô ƀă hok tro, mê ki rơkê tung hnê ƀă hriâm tá hâi châ môi tiah tơdroăng ki rơhêng vâ ƀă hên ki ê.

Pôa Nguyễn Văn Tùng, pơlê kân Vĩnh Bình, tơring Châu Thành ai tối tiah kố:

“Hok tro nôkố troh tơdế tơdroăng ki hriâm loi nguăn ôh tá ai. Á pâ thế ƀă Kuô̆k hô̆i, Kơvâ ngăn hnê hriâm athế ai tơdroăng, túa pơkâ mơdêk tơdroăng ki hnê hriâm tơdroăng ki loi nguăn cho ki hdrối, hriâm túa rêh ối hiâm mơno ‘na kuăn mơngế cho ki hdrối, vâ xo ah hmôi mâu vâi o chiâng ngế ki ai tuăn ngoâ rơkê túa rêh ối lĕm.

Tơdroăng ki hơ’lêh hlá mơ-éa hriâm; mâu khu ki hriăn ngăn, mâu khu ki rơkê ‘na hriâm, tiê̆n sih hiăng tơchĕng tơmiât vâ tăng hlo mâu tơdroăng vâ chêh bro chiâng môi kơxop hlá mơ-éa vâ hnê tơdroăng ki rơkê plĕng ‘na mơhno túa lĕm tro ăm mâu rơxông ối nếo, la hriâm bu môi hơnăm mê pơtê lôi, tiah mê cho mơhrê khât, mơhrê liăn ngân dêi mâu nôu pâ, jâ pôa.

Xua mê, á pâ thế Kuô̆k hô̆i, Kơvâ ngăn hnê hriâm bu chêh bro 1 ƀô̆ kơxop hlá mơ-éa la ƀô̆ hlá mơ-éa mê athế châ xúa ton xŏn”.

‘Na kơvâ pêi chiâk deăng, kuăn pơlê tối tiah kố, yă phon rơvât, pơkeăng xôh kơdê oâ hdrong pơtối to kơnâ, tung pơla yă báu ƀă mâu kế tơmeăm pêi lo ing chiâk deăng rơpâ. Kuăn pơlê An Giang pâ thế Chin phuh kal rĕng ai troăng hơlâ tơdjêp, tê kế tơmeăm pêi lo ing chiâk deăng tiô túa ki xiâm ƀă ton xŏn, vâ kuăn pơlê pêi chiâk chiâng vâ pro kro mơdrŏng sap ing ƀăng klâng dêi tơná.

Pakĭng mê, tơdroăng ki mơnhông pêi chiâk tiô troăng “tơrŭm”, malối cho tơrŭm pơla kuăn pơlê pêi chiâk ƀă khu mơdró kâ nôkố ối hlo tá hâi kơhnâ khât, tá hâi ai tơdroăng ki pơklât, mê tá hâi mơdêk châ tâi ki tơƀrê dêi túa pơkâ tơrŭm, kuăn pơlê pêi chiâk tá hâi châ pơxúa hên sap ing mâu túa pơkâ tơrŭm nôkố.

Pôa Trần Văn Đức, cheăm Vĩnh Chánh, tơring Thoại Sơn, kong pơlê An Giang tối ‘na tơdroăng tơmiât dêi tơná.

“Bô xuân ‘nâi Kơpong tơbăng Kroăng Cửu Long cho tíu ki pêt báu klâng kân má môi dêi lâp tơnêi têa, ki An Giang cho ki xiâm dêi Tơbăng Kroăng Cửu Long, la nôkố tơdroăng ki trâm đi đo châ báu hên, la yă tê rơpâ trâm hlo đi đo; mot tung rơnó poê báu yă chu rơpâ, hiăng tâi rơnó poê báu mê yă báu to kơnâ.

A cheăm kố xuân ai mơhnhôk kuăn pơlê hơ’lêh pêt hdrê loăng, mơnăn păn, la ki khât gá pêt kơchâi prá alâi hên ôh ti ‘nâi tê u lâi. Báu maluâ tê ôh tá châ yă; kế tơmeăm pêi lo ing chiâk deăng tê ôh tá châi tê tâi la yă phon rơvât to kơnâ ó. Pâ thế Chin phuh ƀă nâu Khu xiâm, kơvâ cheăng ai troăng tŏng kum ăm kuăn pơlê ki pêi chiâk dêi Tơbăng kroăng Cửu Long, malối cho An Giang”.

‘Na tơdroăng kố, kăn xiâm phŏ hnê ngăn tơnêi têa Võ Thị Ánh Xuân tối tiah kố, An Giang ƀă ki pơxúa mê cho môi kong pơlê ki rơdêi tung tơdroăng ki pêi chiâk deăng, kăn pơkuâ kong pơlê An Giang, tơring Châu Thành kal athế pơtối tơmiât, ‘nâi nhên rôh tơ’lêi, xúa ki rơdêi hiăng ai hlâ vâ mơnhông mơdêk kơvâ pêi chiâk deăng rak vế tơniăn rĕng, tơƀrê ƀă krá ton, bro ai tơdroăng ki kơnía mơdêk kơnâ tâ, vâ kuăn pơlê chiâng vâ bro kro mơdrŏng sap ing pơ’leăng báu xua tơná pêi lo.

“Tơdjâk troh tơdroăng ki pêi chiâk deăng. Á hlo tiah kố troh nôkố, mâu troăng hơlâ pơkâ, tơdroăng mơ’no dêi Đảng, tơnêi têa, tá mâu kơxô̆ liăn, tá mâu túa pêi ƀă hên ki ê ki hên cho hiăng ai; nôkố bu u ối mê pin tơbleăng pêi pro môi tiah lâi, pin ‘nâi nhên tơdroăng kố mot tung kuăn pơlê môi tiah lâi vâ kuăn pơlê mơ-eăm pêi cheăng kâ, pêi chiâk pêi deăng, cho ngế ki pơxúa kal ăm kloăng báu phái dêi tơná; rơhêng vâ pơkuâ châ mâu tơdroăng ki mê athế ai túa tơmiât pro pơkuâ.

Rơhêng vâ vâi krâ nhŏng o ki pêi chiâk deăng rơtế ƀă khu kăn pơkuâ cheăm tơring, kong pơlê rơtế tơmiât vâ mơdêk hnoăng cheăng dêi ngế ki pêi lo báu phái. ‘Na hnê hriâm; tung pơla hơ’lêh nếo kố athế ai môi tơdroăng hơ’lêh, mê kô chiâng tiah kố pin athế chiu môi hneăng hơ’lêh, tâi troăng pơkâ mê gá kô tơniăn”.

Tiô kăn xiâm phŏ hnê ngăn tơnêi têa Võ Thị Ánh Xuân, mâu tơdroăng ki kuăn pơlê tối mê âi xuân cho mâu tơdroăng ki tơchĕng tơmiât hên dêi kăn pơkuâ Đảng, Chin phuh, Kuô̆k hô̆i ƀă kong pơlê. Khu kăn Kuô̆k hô̆i kong pơlê An Giang tơmâng xo mâu tơdroăng ki pâ thế dêi kuăn pơlê ƀă tơrêm tơdroăng cheăng kô pơtối ai mâu tơdroăng ki pâ thế a rêm rôh po hneăng hôp tơtro.