Kơxê măng lơ 10/4, pôa Vương Đình Huệ, kăn xiâm hnê ngăn Kuô̆k hô̆i hiăng trâm mâ Khu kăn cho mâu Ngế ki tro kroăng phâk ‘na tơdroăng kal kí ƀă mâu ngế ki tro kroăng phâk dêi Pơlê kong kân Hồ Chí Minh. Tơpui a rôh trâm mâ, pôa Vương Đình Huệ, Kăn xiâm hnê ngăn Kuô̆k hô̆i mơnhên tối khât Khu pơkuâ hnê ngăn Đảng Pơlê kong kân Hồ Chí Minh hiăng mơjiâng Khu tối tơbleăng Mâu ngế ki kroăng phâk tơdroăng kal kí hơnăm hiăng krâ Pơlê kong kân Hồ Chí Minh, Khu tối tơbleăng ôh ti xê kal khât ăm mâu hô̆i viên mê ối cho mâu ngế ki tŏng kum kơnía dêi Đảng, tơnêi têa.

Kố cho tơdroăng ki tơkŭm, hnê hriâm khôi hmâ ki pơxúa ki mâu kong pơlê ki ê kal hriâm tâp. Khu kố tối tơbleăng hiăng châ krếo tơkŭm ki hên cho mâu ngế ki tro kroăng phâk ‘na tơdroăng kal kí ki hiăng krâ ƀă mâu ngế ki tro kroăng phâk tung 2 rôh tơplâ, tơkŭm po hên tơdroăng pêi pro ai pơxúa, rôh lăm vêh troh a tíu xiâm; tơdrêng a mê Khu tối tơbleăng tơdroăng kal hiăng tơkŭm hên tơdroăng ton nah khên tơnôu ing tơdroăng mâu ngế djâ troăng ahdrối kơhnâ rơkê dêi mâu ngế ki tro kroăng phâk ‘na tơdroăng kal kí ƀă mâu ngế ki tro kroăng phâk.

Tung pơla hdrối kố nah, xua tơdroăng hnê mơhno dêi Tíu xiâm xuân hiăng tơkŭm, tŏng kum mâu hồ sơ ki tá hâi pêi pro klêi. Drêng kố, Kăn xiâm hnê ngăn Kuô̆k hô̆i mơnhên tối khât ivá mơ-eăm tŏng kum lối 1 rơpâu hồ sơ ăm mâu ngế ki ai hnoăng ƀă kăch măng ki tá hâi pêi pro klêi dêi Khu tối tơbleăng tơdroăng kal.