Kăn pơkuâ Vi ƀan Cheăng kâ Vũ Hồng Thanh tối tiah kố, tơdroăng ki pơklât thế tê roê, bro mơéa ing tơdroăng ki tê roê hngêi trăng tơnêi tơníu ai hen tơdroăng ki hlo pơxúa ing tơdroăng pơkâ dêi luât vâ pơkâ pêi pro xêh tơdroăng ki tê roê, chêh bro mơéa tê mơdró hngêi trăng tơnêi tơníu tơrŭm tơdjêp ƀă môi tung rêm pâ ki veăng tơrŭm chêh bro mơéa, toê roê tơnêi tơníu, tơdjâk troh tơdroăng ki tơdrăng tơtro dêi tơdroăng ki tê mơdró ƀă hnoăng pơxúa dêi rêm pâ tung tê mơdró hngêi trăng, tơnêi tơníu. Xua ki khât,hlo ai tơdroăng ki mâu tíu tê roê, chêh pro mơéa tê mơdró hngêi trăng, tơnêi tơníu tơrŭm ƀă dêi rơpó xua ki pơxúa liăn tơkâ pro ôh tá tơniăn tung tơdroăng ki tê mơdró hngêi trăng, tơnêi tơníu, ôh tá tối tơbleăng tro ‘na tơdroăng tơrŭm pơla ki vâ tê ƀă ki rơhêng vâ roê, yă pơkâ.

Mâu kăn pơka thế kal tơmiât nhên ‘na tơdroăng ki kal pơkâ tai tâng tá tơdroăng ki tê roê, chêh bro mơéa athế tơkâ luâ ing tíu ki tơpui tơno ‘na tê mơdró hngêi trăng, tơnêi tơníu. Ngế chêh tơm xo, Kăn pơkuâ Bơrô cheăng Kuô̆k hô̆i Bùi Văn Cường tối ‘na tơdroăng tơmiât dêi tơná:

  “Tơdroăng pơkâ xiâm vâ mơnhên tê mơdró hngêi trăng, tơnêi tơníu ƀă tơdroăng cheăng mơjiâng, roê tê, hơ’lêh xúa hngêi trăng, tơnêi tơníu cho vâ tê phlêh ăm ngế ki ê, ôh ti xê xúa. Laga, tơdroăng ki vâ hlo ôh ti xê va xúa mê vâ tê, pơhlêh ăm ngế ki ê xúa tá hâi châ pơkâ nhên. Xua mê xơpá vâ mơnhên châ ngế krê roê hngêi vâ ối, xo tơdroăng ki pơhlêh hnoăng xúa, xúa tơnêi hôm cho vâ pơtối tê ăm ngế ki ê há lơ ôh. Xua mê, kal hriăn ngăn tơ’nôm”.

Ngế pơkuâ Khu pơkuâ Hnoăng cheăng Nguyễn Thị Thanh tối ki khât a mâu kong pơlê, tơdroăng cheăng dêi mâu tíu tê mơdró hngêi trăng tơnêi tơníu ôh tá tối tơbleăng hên mê ki hên cho pêi pro tơbriât tê tơmeăm hnoăng rak xúa tơnêi. Tối ki khât tung tơdroăng “ngế ki leăm ‘na tê roê tơnêi” châi ko khât a kong pơlê”, jâ Nguyễn Thị Thanh pơkâ thế kal pơkâ vâ séa ngăn nhên pơla ngế ki leăm tơbriât tê tơnêi ƀă ngế ki ai tơdroăng ki rơhêng vâ roê tơnêi khât. Tơdrêng amê hlối pơkâ thế kal ai tơdroăng ki môi tuăn tung mơéa tơkêa tung tê, pơhlêh ngế ki xúa, ăm mung tơnêi hngêi trăng:

 “Tơdroăng ki tơbriât tê tơnêi mê cho pêi pro tơdroăng ki bro hngêi ối. Klêi kơ’nâi hiăng bro klêi tơdroăng ki pêi pro tơkêa ‘na hngêi ối. Drêng ngế ki tro lô tơnêi mê vâi ôh tá pêi pro tơdroăng dêi pei pro hngêi ối ki vâi kuâ râng tung môi tơdroăng pơkâ dêi Luât Tơnêi tơníu, vâi klâ xoăng lô, tê tơnêi. Ngin ai khê̆n cho phá tơ-ê ƀă luât ƀă bro ai tơdroăng ki ôh tá chiâng vâ mơnhên. Mê cho môi tơdroăng ki ai tơdjâk troh tơdroăng cho môi tuăn ƀă tơdroăng ki tơdâng pơla mâu luât tơdjâk troh tơdroăng tê roê hngêi trăng, tơnêi tơníu”.

Kăn xiâm hnê ngăn Kuô̆k hô̆i Vương Đình Huệ tối nhên: tê mơdró hngêi trăng tơnêi tíu cho môi tung mâu kơvâ cheăng rak tơniăn ăm tơdroăng mơdêk dêi cheăng kâ. Tơdroăng ki ‘mâi rơnêu Luât Tê mơdró hngêi trăng tơnêi tơníu kal khât la xơpá, pâ thế vâ pêi pro châ tơdroăng ki rơhêng vâ, ví mâu tơdroăng ki ‘mâi rơnêu klêi la ôh tá pơkâ tơleăng châ mâu tơdroăng ki tơvâ tơvân lơ rế bro ai mâu tơdroăng ki tơvâ tơvân ki ê”.

“Kân má môi tung tơdroăng ki mơnhông tơdroăng tê mơdró hngêi trăng tơnêi tơníu cho ‘na túa pơkuâ djâ ƀă túa pơkâ. Tơdjâk troh túa pơkâ xúa tơnêi, bro tơ’nôm mâu tơdroăng tơkêa, tơdroăng pơkâ mâu túa ki tê mơdró. Ki pin kal má môi cho túa pơkâ tiô hâi khế. Pin pơkâ tiô tơnêi tơníu. Tâng rơtế 1 rôh ai hên tơdroăng tơkêa mê tơdroăng ki tê tơkâ luâ tâ tơdroăng ki roê, hên hngêi trăng, tơnêi tơníu ôh tá châ tê. Tơdroăng ki vêh pơkâ kal châ pêi pro tá ƀă kơchô mơdró, khu mơdró kâ, kế tơmeăm ƀă châ pơxiâm ing tơdroăng ki xiâm xuân cho túa pơkâ, mê á hlo mơhno tối ối ‘ro khât tơdroăng kố”.