Đảng viên Đặng Qúy Dậu kot mâ hơnăm 1983 ối a cheăm Čư̆ Suê, tơring Čư̆ Mgar,  hdrối nah drêng klêi hriâm đăi hok klêi mê mot cheăng a môi to hngêi rak liăn a kong pơlê Dak Lak ƀă liăn khế kâ hên. La kơ’nâi 10 hơnăm, hlo tơdroăng cheăng pêi dêi kơvâ cheăng hngêi rak liăn ôh tá tơ tro, ngoh pơtê cheăng vâ tiô tơdroăng hâk vâ pêi chiâk. Hiăng ai tơnêi chiâng 1,6 ha cho chiâk deăng dêi nôu pâ xing xoăng ăm, tơ’nôm a kơxô̆ liăn ‘măn kơdĭng drêng dế pêi cheăng a hngêi rak liăn nah, ngoh khên ko tah tâi tâng 800 xiâm kơphế ki hiăng krâ, mung tơ’nôm liăn ing hngêi rak liăn rôe pêt tơvât 300 xâm tiu ƀă vâ chê 100 xiâm sầu riêng.

Rôh apoăng, xua tá hâi hlê hên xiâm loăng plâi sầu riêng, kơxái tiu ki pêt hiăng hlâ, tro lŭp hên. Ôh tá lao tuăn, ngoh pơtối mung nếo ki rơpŏng hngêi, pú hmâ pơ’lêh pêt a mâu loăng ki hiăng hlâ; hriâm tiô tơdroăng cheăng ing mâu ki hmâ rơkê ‘na pêi chiâk xua pêt tiô hưh cơ krá tơniăn ton. Hriâm ing tơdroăng ki tro lŭp, ton ing mê pôa hiăng pêi klêi kơdrum pêt tŭm túa loăng ăm châ xo plâi hên.

Tơdroăng ki tơƀrê ing pro kơdrum pêt loăng plâi, ngoh khên pơtối ‘no liăn po rơdâ pro tơ’nôm kơdrum mơdâ hdrê loăng. Krê tung hơnăm 2022 kố nah, kơdrum ki pêt tŭm hdrê loăng ƀă tê dêi mâu hdrê loăng hiăng châ xo lối 300 rơtuh liăn.

Ngoh Đặng Dậu Qúy tối:  

“Ƀă hnoăng cheăng cho đảng viên, á ‘nâi hnoăng cheăng pêi tơná thế djâ troăng a hdrối tung mơnhông cheăng kâ, ƀă ai mơnhông tơtro mê nếo kâi châ kum rơpŏng hngêi ƀă châ kum mâu ngế ki ê.  Môi tiah hơnăm kố nah, a châ xo 6 tâ̆n plâi sầu riêng  tê xuân châ lối 300 rơtuh liăn; 2 tâ̆n tiu nếo châ xo tơ’nôm 120 rơtuh liăn ƀă riân tơ’nôm kơdrum mơdâ hdrê, kơphế xuân châ lối 100 rơtuh liăn nếo. Ôh tá riân kơxô̆ liăn ‘no apoăng, rơpŏng hngêi ối châ xo dêi tơkâ lối 300 rơtuh liăn’’.

Đảng viên Võ Văn Hoàng 64 hơnăm, ối a cheăm Ea Tu, pơlê kong kơdrâm Ƀuôn Ma Thuột ƀă kơlo kơhnâ, mơ-eăm pêi cheăng ƀă ai hiâm mơno ‘nâi pâ hơ-ui kơ mơngế. Kot mâ a kong pơlê Quảng Ngãi, klê mê, tiô dêi nôu lơ lăm pêi cheăng rêh ối a Dak Lak sap ing hdrối hâi tơnêi têa vâ tơleăng lĕm hơnăm 1975. Tung pơla pêi cheăng kâ pêi chiâk deăng, ‘nâi to lâi tơdroăng ki pá puât ƀă hên rôh pêi cheăng ôh tá rơhéa klêi mê nếo pêi châ tơƀrê.

Nôkố, kơ’nâi hên hnăm pêi cheăng kâ, pôa ai 5 ha chiâk pêt loăng plâi sầu riêng  tơvât tung kơdrum loăng plâi môi tiah măng cụt, plâi krui ngeăm, krui kuit, krui ƀŏng... Tâi tâng kơxô̆ liăn châ xo ing pro kơdrum deăng rêm hơnăm dâng 4 rơtal, ôh tá riân kơxô̆ tơkâ lối 2 rơtuh. Ai tơdroăng cheăng kâ tơƀrê  pôa ‘nâi  veăng kum mâu rơpŏng xơpá ki ê liăn mung, hroê hdrê plâi, rôe phon ƀă tơmeăm lĕm tro xuân tung rêh ối xuân môi tiah mơjiâng thôn pơlê nếo a pơlê.

Pôa Võ Văn Hàng  tối:

“Cho đảng viên a kong pơlê mê thế djâ troăng a hdrối tung mơnhông pêi cheăng kâ, ing mê kuăn pơlê pêi ƀối. Pin ‘nâi kih thuât pêi cheăng hnê ối ăm kuăn pơlê há, veăng kum dêi rơpó mơnhông cheăng kâ, ngế ai hên ăm hên ngế iâ ăm iâ, rơpŏng xơpá kô ăm vâi chĕn, mâu rơpŏng xahpá luâ râ mê pro ăm hlối; krê ƀă mâu rơpŏng xơpá ‘na hngêi ối mê khu pêi tơdroăng hơ-ui pâ, kơjo kum a kô kum 5 - 10 rơtuh, ngăn tiô kơ tơdroăng ki xơpá. pin xuân veăng tơlo liăn pro troăng prôk , ăm rơxế kơtâu, mơhnhôk kuăn pơlê pêi ƀối tâi mâu troăng mơhnhôk kuăn pơlê pêi 3 tơdroăng, pro tâi mâu troh tung thôn”.

Jâ Lại Thị Loan - Kăn xiâm hnê ngăn kuăn pơlê pêi chiâk tối, ki hên mâu đảng viên xuân châ pêi hnoăng cheăng djâ a hdrối tung pêi cheăng pêi chiâk deăng mơnhông cheăng kâ. Mâu hội viên môi tiah Đặng Dậu Qúy lơ Võ Văn Hoàng xuân cho mâu đảng viên ki djâ troăng a hdrối, kuăn pơlê ƀối kơ’nâi’’, cho mâu ngế ki tơƀrê tung tơdroăng mơhnhôk cheăng kâ kơdroh kơklêa xăm kơtiê a pơlê.

Jâ Lại Thị Loan tối tiah kố, vâ  tơdroăng mơnhông cheăng kâ kơdroh kơklêa xăm kơtiê dêi khu rế rơdêi tâ, kơxô̆ mơngế đảng viên tung khu rế ton rế hên tâ, kơxô̆ mơngế đảng viên tung khu kố rế ton rế hên tâ, tung la ngiâ, khu kố tơmâng khât tâ tơdroăng tơ’mot mơngế mot đảng viên, pro xiâm vâ rế ton rế ai hên ngê tâ nếo mâu ki djâ troăng lĕm ahdrối, cho đảng viên ki rơkê kơhnâ:

“Ngin tơmâng khât troh tơdroăng tơbleăng hô̆i viên ki pêi cheăng kơhnâ mot tung đảng. Tung mâu pơkâ nhên, mê rơtế ƀă mâu khu tơrŭm đoân ki ê, ngin ai pơkâ nhên  môi tiah pơcháu ăm đảng viên, mâu kăn chi hô̆i hnê mơhno ăm mâu ngế tung khu kuăn pơlê ki kơhnâ rơkê vâ hriâm mot đảng, kum vâi, tâng hlo tơdroăng rêh ối  ƀă ki rơkê vâi tơxâng châ mot tung đảng, mê kô tơ’mot châ mot tung khu Đảng’’.

Ôh tá xê to ƀeăn rơkê pêi cheăng kâ, mâu đảng viên môi tiah ngoh Đặng Dậu Qúy  pôa Võ Văn Hoàng ối  kơhnâ hnê tơdroăng cheăng rơná rơkê pêi kum ăm hên ngế ki xơpá rơtế mơnhông pêi chiâk, mơdêk pê lo tơmeăm, tơniăn tung rêh ối; kơhnâ veăng ‘no hnoăng mơjiâng thôn pơlê nếo a kong pơlê.