Kơxo lơ 14/4, pơlê kong kơdrâm Kon Tum, kong pơlê Kon Tum hiăng tơkŭm pôu ngăn ƀă ‘mế 8 to kơxêng kiâ mố đô̆i hlâ tung rôh tơplâ xâ Mih tŏng xo tơnêi têa. Tơdroăng ki tí tăng, tơkŭm 8 to kơxêng kiâ mố đô̆i kố cho sap ing tơdroăng ki tối tơbleăng xua ngế mố đô̆i hơnăm hiăng krâ Lã Mạnh Tùng, kăn ƀô̆ veăng tung Măt trâ̆n B3 tíu tơplâ Tây Nguyên hneăng hdrối tối tơbleăng.

Klêi kơ’nâi tí tăng tơ’nôm tơdroăng sap ing nhŏng o ngế ki hlâ, kuăn pơlê a kố hiăng pơchông ngăn ƀă hồ sơ ngế mố đô̆i ki hlâ xua Kuân đoân 3 tơbleăng, khu lêng kring vế pơlê kong kơdrâm Kon Tum hiăng tơkŭm tăng kơxêng mâu ngế ki hlâ a 2 to bêng Duy Tân ƀă Ngô Mây.

Maluâ ai tơdroăng tơbleăng ‘na 14 ngế mố đô̆i hlâ tung kơpong kố la xua ton luâ râ, tơnêi tơníu hiăng hơ’lêh, séa ngăn tung mâu kế tơmeăm ki u ối khu lêng tí tăng bu mơnhên to 8 to kơxêng kiâ mố đô̆i. Nôkố khu ki ai tơdjâk troh tá hâi mơnhên inâi dêi rêm ngế ki kố.