Pêi pro tơdroăng trâm mâ kuăn pơlê hdrối vâ po hneăng hôp 5, Kuô̆k hô̆i hneăng 15, Khu kăn Kuô̆k hô̆i kong pơlê Dak Lak hiăng trâm mâ kuăn pơlê a mâu tơring Ea Kar, Krông Ana, Ƀuôn Đôn, Ea Súp, M’Drak ƀă Krông Pač. A rôh trâm mâ, hên tơdroăng ki tơdjâk troh ‘na rak vế tŏng kum rêh ối pơlê pơla hiăng châ kuăn pơlê tơpui tối.

A tơring Ea Kar, kuăn pơlê hiăng tơpui hên tơdroăng ki pơtroh troh Khu kăn Kuô̆k hô̆i kong pơlê Dak Lak, tung mê, tơkŭm tung mâu tơdroăng ki kal môi tiah: tơvâ tơvân tung tơdroăng ki hbru ăm mơ-éa hnoăng rak xúa tơnêi ăm mâu rơpŏng kuăn pơlê, tơdroăng tŏng kum kăn ƀô̆ thôn pơlê ối iâ, mâu troăng hơlâ tŏng kum tiô tơdroăng pơkâ tơnêi têa kơdroh kơtiê krá ton kơpong hdroâng kuăn ngo tá hâi tơniăn, ối iâ.

Tơmâng xo mâu rơkong tơpui tối, pâ thế dêi kuăn pơlê, khu kăn Kuô̆k hô̆i kong pơlê Dak Lak hiăng pơkâ thế mâu kơ koan ki ai hnoăng pơkuâ ƀă kong pơlê tơpui tối leăng. Ƀă mâu tơdroăng ki ê, khu kăn kố kô chêh tơkŭm, pâ thế troh Kuô̆k hô̆i, Chin phuh ƀă mâu Khu xiâm kơvâ cheăng tung hneăng hôp la ngiâ.