Măng tĭng hdrối, Khu kăn séa ngăn dêi Vi ƀan pơkuâ Kuô̆k hô̆i hiăng pêi cheăng ƀă Vi ƀan hnê ngăn kong pơlê Bình Định ‘na tơdroăng pêi pro Pơkâ dêi Kuô̆k hô̆i ‘na hơ’lêh nếo tơdroăng hlá mơéa hriâm phôh thong. Tiô tối tơbleăng, kong pơlê Bình Định hiăng pêi klêi ƀlêi chiâng hnoăng cheăng hnê tơ’nôm tiô Tơdroăng hnê hriâm phôh thong 2018 ăm lối 12.700 ngế thái cô ƀă kăn ƀô̆ pơkuâ ngăn tíu hnê hriâm phôh thong.

Khu ngăn hnê hriâm ƀă hnê mơjiâng tuăn ngoâ rơkê kong pơlê Bình Định tơbleăng in, mơ’no hlá mơéa hnê hriâm kong pơlê lâm 1, lâm 2, lâm 3, lâm 6, lâm 7 ƀă lâm 10 rak tơniăn rơkê ƀă tŭm kơxô̆ mâu tíu hnê hriâm a kong pơlê tiô tơdroăng ki vâ.

A rôh pêi cheăng ƀă Khu kăn séa ngăn dêi Vi ƀan pơkuâ Kuô̆k hô̆, Vi ƀan hnê ngăn kong pơlê Bình Định pâ thế Tơnêi têa hbru hlá mơ-éa hriâm tê kơtê ăm hok tro kơpong hdroâng kuăn ngo, peăng kong ngo kơpong hngế hngo; pâ thế Khu xiâm ngăn hnê hriâm ƀă hnê mơjiâng tuăn ngoâ rơkê rĕng tơbleăng túa pơkâ tơ’noăng râ má pái trung hok phôh thong sap ing hơnăm hriâm 2024 – 2025 vâ mâu kong pơlê hbrâ rơnáu tâ tung hnoăng cheăng hbrâ.

Kăn xiâm phŏ hnê ngăn Kuô̆k hô̆i Trần Thanh Mẫn pơkâ thế kong pơlê Bình Định pơtối mơdêk mâu tơdroăng ki hiăng pêi pro klêi, ‘mâi rơnêu mâu tơdroăng ki tá hâi pêi pro klêi tung kơvâ hnê hriâm ki Khu kăn séa ngăn hiăng pơkâ mơ’no; tơkŭm mơhnhôk tơlo mâu kơxô̆ liăn vâ mơnhông hnoăng cheăng hnê hriâm, mơdêk rơdêi tơdroăng ki hơ’lêh kơxô̆ tung hnê hriâm:

“Mơdêk ki rơkê tơtro tung hơ’lêh mâu thái cô ƀă kăn ƀô̆ pơkuâ ngăn rêm râ. Mơdêk rơdêi tơdroăng ki hơ’lêh kơxô̆ xúa kong ngê̆ thong tin, tŏng kum tơdroăng ki xúa tơƀrê mâu tơdroăng pơkâ chêh tung hlá mơ-éa, tơdroăng pơkâ dêi tơnêi têa, mâu kơxô̆ liăn mơhnhôk tơlo tro luât sap ing pơlê pơla vâ ai tơ’nôm kơxô̆ liăn ‘no pêi cheăng ăm kơpong hdroâng kuăn ngo, kơpong xơpá”.

Khu kăn séa ngăn dêi Vi ƀan pơkuâ Kuô̆k hô̆i tối tiah kố, tơdroăng ki pơkâ hlá mơ-éa hnê mơhno, tối tơbleăng tơdroăng hnê hriâm phôh thong 2018 dêi kong pơlê Bình Định châ pêi pro kơtăng, bro chiâng tơdroăng kal kí – tro luât tơ’lêi hlâu ăm mâu tíu, kơvâ cheăng, kong pơlê pêi pro.

Rơtế ƀă tung pơla hdrối nah, Kăn xiâm phŏ hnê ngăn Kuô̆k hô̆i Trần Thanh Mẫn rơtế ƀă Khu kăn séa ngăn dêi Vi ƀan pơkuâ Kuô̆k hô̆i hiăng pêi cheăng ƀă Vi ƀan hnê ngăn kong pơlê Hưng Yên ‘na tơdroăng ki pêi pro Pơkâ dêi Kuô̆k hô̆i ‘na hơ’lêh nếo hlá mơ-éa hriâm phôh thong. Kăn pơkuâ hnê ngăn Đảng Hưng Yên cho pôa Nguyễn Hữu Nghĩa ăm ‘nâi, kong pơlê hiăng kơjo kum ‘no liăn bro hngêi trăng troăng klông ăm kơvâ hnê hriâm, tung mê ki kal cho bro hngêi trung lâm, ƀă khŏm mơ-eăm pêi pro châ tiô tơdroăng ki rơhêng vâ hriâm tâp dêi tâi tâng hok tro:

“Sap ing apoăng hneăng cheăng ngin hiăng pơkâ tơdroăng Pơkâ kơxô̆ 12 ‘na “Mơnhông hnê hriâm ƀă hnê mơjiâng tuăn ngoâ rơkê kong pơlê Hưng Yên troh hơnăm 2025 ƀă troăng pơkâ troh hơnăm 2030”. Pơkâ kố mơhno tối ki xiâm tâi tâng, mâu pơkâ mơnhông nhên, ôh ti xê pơkâ tơleăng mâu tơdroăng ‘na hngêi trung lâm, kơƀăng tăng ƀă tơtro ƀă tơdroăng tơbleăng tơdroăng, hlá mơ-éa hriâm nếo tung la ngiâ ah, tơkŭm tung 5 tơdroăng ki kal xiâm: môi - kuăn mơngế, ki hên cho thái cô ƀă mâu kăn ƀô̆ pơkuâ ngăn dêi kơvâ hnê hriâm; péa cho hngêi trung lâm hriâm, kơƀăng tăng, kế tơmeăm xúa tung hnê hriâm; má pái cho tơdjâk troh xing xoăng liăn ngân; má pŭn cho mơdêk rơdêi hơ’lêh pơlê pơla ƀă má 5 cho tơdjâk troh hnoăng cheăng tơkŭm tơbleăng pêi pro tơdroăng kố”.

Tơpui mơgêi rôh pêi cheăng, Kăn xiâm phŏ hnê ngăn Kuô̆k hô̆i Trần Thanh Mẫn pơkâ thế, tung la ngiâ ah, kong pơlê Hưng Yên pơtối séa ngăn, mơnhên tối túa pơkâ pêi pro mâu tơdroăng xúa tung hnê hriâm, vâ séa ngăn, ‘mâi rơnêu pêi pro tiô tơdroăng rơhêng vâ hriâm ƀă mơdêk ki rơkê tung hnê hriâm tung tâi tâng:

“Tơ’mot kơxô̆ liăn ‘no pêi cheăng ăm kơvâ hnê hriâm, athế mơdêk rơdêi tâ nếo hơ’lêh tơdroăng ki hnê hriâm. Nôkố ai hên hngêi trung krê, hên thái cô pakĭng hngêi trung kong lâ̆p mê pin athế phiu ro, hơniâp, la pin pơkuâ ngăn xo. Mơdêk rơdêi xoăng râ, xoăng hnoăng, mơdêk tơniăn ki pơkuâ ngăn xêh ƀă tơdroăng ki pôu râng dêi hnoăng cheăng a mâu tíu hnê hriâm, mê nếo mơdêk hnoăng cheăng séa ngăn, pơkâ tơleăng mâu tơdroăng pro xôi tung kơvâ hnê hriâm hnê cheăng pêi”.