Mot đảng sap 26 hơnăm, pro kăn hnê ngăn chi ƀô̆ thôn sap 30 hơnăm ƀă ing mê troh nôkố, pôa K’Boer kăn hnê ngăn chi ƀô̆ thôn B’Dơr, cheăm Lộc An, tơring Bảo Lâm, kong pơlê Lâm Đồng xuân hmâ achê ƀă kuăn pơlê. Pôa hiăng rơtế ƀă vâi pú tung chi ƀô̆ ƀă tung vâi krâ nhŏng o thung thôn kơ’nâ pơ’lêh hdrê pêt, mơnăn păn, mơnhông cheăng kâ, mơjiâng tơdroăng rêh ối túa lĕm tro.

Tiô pôa K’Đèo, môi ngế ki kuăn pơlê pâ nhoăm a thôn B’Dơr tối, troh nôkố, tơdroăng rêh ối tuăn ngôa dêi kuăn pơlê tung thôn châ mơnhông tơƀrê. Mâu luât pơlê pơkâ, mơjiâng tơdroăng rêh ối nếo, kơpong kuăn pơlê rêh ối tiô túa nếo châ kuăn pơlê môi tuăn ƀă vâ rak vế pêi pro.

Pôa K’Đèo tối tiah kố, ki pơ’lêh mê veăng ai hnoăng dêi pôa K’Boer - kăn hnê ngăn chi  ƀô̆ thôn:  

“Châ hlo tơdroăng ki lĕm mơnhông mơdêk pơlê á ro ‘nâng. Xuân kơnôm veăng tơmâng hnê mơhno ing râ cheăm, malối ai pôa K’Boer kăn hnê ngăn chị ƀô̆,  hơnăm ối nếo ai ivá pêi cheăng kơhnâ tiah mê… ngin hâk mơnê veăng môi tuăn’’.

Ƀă mâu đảng viên tung chi ƀô̆ thôn, pôa K’Boer xuân cho kăn hnê ngăn ki kơhnâ tung tơdroăng cheăng hlối ‘nâi hriăn plĕng tơdroăng ki nếo, Jâ Ka Thủy, môi ngế đảng viên tung chi ƀô̆ ăm ‘nâi, tung mâu rôh tơkŭm hôp dêi đảng, pôa K’Boer hmâ krếo tơ’nôm mâu kăn ƀô̆ thôn pơlê, krâ pơlê, mâu ngế kuăn pơlê pâ nhoăm tung pơlê vâ rơtế veăng hôp, tơpui tơno ‘na tơdroăng tơleăng mơnhên mâu tơdroăng kal, ing mê chiâng ai hên ngế vâ môi tuăn hlối pêi tung rêh ối ai pơxúa khât.

Mê cho, thế tối troh tơdroăng mơhnhôk kuăn pơlê pleăng tơnêi, veăng ‘no hâi pêi cheăng, liăn ngân rơtế ƀă tơnêi têa mơjiâng pơlê, pro klêi lối 20 km troăng tung thôn, lối 15km troăng tung klâng.

“K’Boer kăn hnê ngăn chi ƀô̆ cho ngế đảng viên đi đo djâ troăng ahdrối, vâ trâm kuăn pơlê hnê kuăn pơlê hlê. Đi đo veăng ‘no hnê tối vâ mơjiâng, ăm dêi chi ƀô̆ rế mơnhông tơƀrê’’.

Thôn B’Dơr ai lối 98% ngế kuăn pơlê kuăn ngo K’ho. Hdrối nah, pakĭng pêi chiâk hâi hlê túa cheăng kâ, kuăn pơlê ối rak hên tơdroăng ki ôh tá tro, tơdroăng cheăng kâ rêh ối hmếo pơ ối kơtiê xơpá. Nôkố,  kuăn pơlê hiăng hlê hiăng  hên, ‘nâi pơ’lêh tung pêi cheăng kâ  châ tơƀrê ing pêt mâu hdrê chế, kơphế, pêt tơvât mâu hdrê loăng plâi bơr, sầu riêng tung kơdrum.

Kơnôm ing mê, kơxô̆ liăn pêi lo tung môi ƀăng tơnêi pêt tơvât hdrê loăng hiăng châ xo tâng riân kơpêng 150 rơtuh liăn/ha/hơnăm, kơxô̆ rơpŏng kơtiê sap 30% nôkố chu ối pá 2%.

Tiô jâ Trịnh Thị Vân, Kăn phŏ hnê ngăn Đảng cheăm Lộc An, pôa K’Boer cho môi ngế kăn hnê ngăn chi ƀô̆ kơhnâ ‘nâi hriâm ƀă pêi pro tiô troăng tơdjâ hiâm tuăn, túa pêi cheăng Hồ Chí Minh. Cho kăn hnê ngăn chi ƀô̆, pôa đi đo mơ-eăm cho ngế ki xiâm djâ tơdroăng tơrŭm, djâ troăng pêi pro ahdrối ƀă pê klêi tŭm tơdroăng ki hiăng pơcháu.

“Pôa K’Boer cho đảng viên, Kăn hnê ngăn chi ƀô̆ thôn B’Dơr, cho môi ngế kơhnâ hâk vâ khât ƀă tơdroăng cheăng, khên tơmiât, khên tối, khên pêi ƀă khên pôu râng hnoăng cheăng tơná pêi. Mơdêk hnoăng cheăng hnê mơhno, kuăn pơlê tung thôn rak vế pêi pro tro tŭm tơdroăng, hnê tối troăng rơhlâ dêi Đảng, luât Tơnêi têa ƀă mâu tơdroăng pơkâ dêi pơlê. Rêh ối lĕm tro ‘na châ ƀă ‘na mơhúa’’.

Thôn B’Dơr nôkố ai vâ chê 500 rơpŏng, lối 2.000 pơ’leăng mâ mơngế. Kuăn pơlê rak tro luât pơkâ dêi Đảng Tơnêi têa, khên ‘no liăn pêi cheăng kâ vâ rơtế ƀă dêi rơpó mơjiâng thôn pơlê nếo Hơmăm 2021, thôn B’Dơr châ mơnhên cho pơlê pêi cheăng kơhnâ dêi cheăm Lộc An ƀă nôkố cho thôn kơhnâ ai hên túa pêi cheăng ki ‘lo tro, tơdroăng cheăng pêi tơ-ƀrê dêi khu pú hên ƀă mâu ngế.

Pôa K’Boer kăn hnê ngăn chi ƀô̆ thôn B’Dơr tối, ƀă hnoăng cheăng pêi dêi tơná, pôa kô pơtối mơ-eăm hên tâ nếo, hriâm hên tâ nếo vâ pleăng hnoăng tơná, veăng ‘no hnoăng mơnhông dêi pơlê tơná’’.

“Á tơmâng má môi cho tơdroăng cheăng kâ, pro ti lâi vâ ăm pơlê tơná săm rơpŏng kơtiê, tâk rế hên rơpŏng cheăng kâ rơ-ƀrê ƀă kro mơdró. Tơdroăng mê kal thế ngin mơjiâng mâu pơkâ ki tơtro ƀă tơdroăng rêh ối cheăng kâ a pơlê’’.

Ƀă tơdroăng mơ-eăm tung mơjiâng khu cheăng kal kí a cheăm, ‘no hnoăng tơná tung pêi cheăng mơnhông mơdêk kuăn pơlê, pôa K’Boer hdrối nah hiăng hên hơnăm châ xo Ƀâng kơdeăn khĕn dêi Khu hnê mơhno Tây Nguyên ‘na hnoăng cheăng kơhnâ tung mơjiâng Đảng. Pôa K’Boer ối hâk tơngăm châ kăn xiâm hnê ngăn Vi ƀan kong pơlê Lâm Đồng ăm ƀâng kơdeăn khĕn hiăng ai hnoăng pêi cheăng kơhnâ khât tung hriâm tâp ƀă pêi pro tiô troăng tơdjâ hiâm  mơno, túa pêi cheăng Hồ Chí Minh pơla hơnăm 2016-2022.