Pêi pro tiô troăng pơkâ mơjiâng hngêi ối troh a hơnăm 2030, kong pơlê Lâm Đồng pơkâ kô mơjiang nếo vâ chê 3 rơpâu toăng hngêi pơlê pơla ăm kuăn pơlê ki pêi lo liăn iâ, kong nhân pêi cheăng a mâu hngêi kơmăi. Tung mê, pơla sap ing nôkố troh tâi hơnăm 2025 kô mơjiang pro vâ chê 2 rơpâu 100 toăng hngêi, vâ chê 900 toăng hngêi ki u ối kô pơtối pro a mâu hơnăm kơ’nâi mê.

Troh a chôu phut kố, Lâm Đồng nếo châ tơ’mot 1 khu ki mơ’no liăn tŏng kum pro hngêi ối pơlê pơla ăm kŏng nhân ƀă mơngế pêi cheăng a hngêi kơmăi Phú Hội, tơring Đức Trọng.

Tiô pôa Nguyễn Anh Tuấn, Kăn phŏ ngăn ‘na mơjiâng tơmeăm khoăng kong pơlê Lâm Đồng tối, maluâ ối trâm hên xapá tung tơ’mot khu mơdró kâ, la ki tơvâ kân má môi nôkố mê cho pơkâ tăng tơnêi ki tơniăn cho ối trâm hên xahpá.