Pôa Phan Thế Dĩnh ối a cheăm Ea Toh, tơring Krông Năng hơnăm kố hiăng 102 hơnăm ƀă 79 hơnăm ối tung Đảng, cho đảng viên ki ai hơnăm ối tung Đảng hên má môi dêi Đảng ƀộ kong pơlê Dak Lak. Tung plâ veăng cheăng tung kăch măng, mơhé ulâi, xo pêi tơdroăng cheăng ki klâi, xo pêi tơdroăng cheăng, pro kăn ki lâi, pôa xuân rak hiâm mơno ki lĕm dêi kăch măng, mơdêk hiâm tuăn tung tôh tơrŭm cheăng xuân môi tiah tung mâu tơdroăng tơrŭm cheăng Đảng  xuân môi tiah tung mâu tơrŭm cheăng pơlê pơla.

Pôa ối cho ngế djâ troăng lĕm ai tuăn tơdrăng lĕm, tơdroăng rêh ối têm rơpiât, hiâm mơno lĕm, châ kuăn pơlê pâ nhoăm.  Troh nôkố mơhé hiăng hên hơnăm la pôa Phạm Thế Dĩnh tuăn ngôa ối tơleăng lĕm, hơnâ tơmâng Rơ ‘jíu vâ ‘nâi mâu tơdroăng nếo ai rêm hâi. Pôa hâk tơngăm ‘na tơdroăng mơnhông tơnêi têa hâi kố.

Hâk tơngăm ‘na mâu mơngế kŏng sản ai tuăn tơdrăng lĕm môi tiah pôa đi đo rak tơdroăng tuăn loi ƀă Đảng Kong sản Việt Nam, pôa Phan Thế Dĩnh tối:

“Ki nhoăm dêi khu tơrŭm cheăng Đảng cho đi đo rak vế vâ kuăn mơngế ki mê chiâng mơngế pro troăng a hdrối ăm kuăn pơlê, ăm rêm ngế pêi ƀối. Pro troăng lĕm mê tâng ôh tá nhên khât ôh tá tơdah kô tro tơdjâk troh Đảng. Xua mê ngế ki đảng viên đi đo hnê tối vâ chiâng mơngế đảng viên ki djâ troăng a hdrối pêi cheăng tơdrăng, Đảng tơmâng khât tơdroăng mê’’.

Ƀă tơdroăng hmâ tung rêh ối lối môi chal hiăng hlê hên tơdroăng kăch măng, pôa Phan Thế Dĩnh cho ngế ki djâ troăng a hdrối ăm đảng viên hơnăm ối nếo a cheăm pơlê, cho ngế ki vâ mơhnhôk mơhno ăm mâu kuăn cháu ƀă rơxông nếo pêi ƀối vâ hriâm tiô, pơtối pleăng hnoăng tơná ăm pơlê pơla, tơnêi têa.

Pôa Hồ Văn Thái, Kăn hnê ngăn Đảng ủy cheăm Ea Toh, tơring Krông Năng, kong pơlê Dak Lak ăm ‘nâi.

“Pôa Phan Thế Dĩnh cho đảng viên ai mâ a pơlê cheăm kố sap ing hâi mơjiâng pro cheăm nah. Ƀă cho ngế ki djâ troăng lĕm ahdrối tung mâu tơdroănng cheăng hlối kơhnâ khât, ƀă ai hiăm tuăn dêi Kŏng sản lĕm khât. Kố cho  tơdroăng hâk tơngăm dêi pơlê cheăm, pơlê cheăm ngăn mê cho ngế ki djâ troăng a hdrối vâ hnê mơhno ăm rơxông nếo hlo ƀối tuăn hiâm lĕm khên tơnôu dêi kăch măng, pêi cheăng klâi ‘nâi dêi hnoăng cheăng dêi đảng viên ƀă kuăn pơlê’’.

‘’Môi tuăn tiô Đảng, tiô Pôa Hồ’’ cho tuăn chân krá đi đo châ pôa Y Thương Kmăn ối acheăm Ƀông Krang, tơring Lak chôu pâ tung tuăn. 54 hơnăm ối tung đảng ƀă nôkố hiăng hên hơnăm la pôa xuân ối đi đo veăng tơkŭm hôp trâm mâ a pơlê, mơhnhôk mâu kuăn pơlê hdroâng kuăn ngo rak vế pêi tro luât pơkâ  tŏng kum, mơhnhôk mâu kuăn pơlê rak vế pêi pro ƀối tiô luât dêi tơnêi têa, kơhnâ hnê kuăn pơlê môi tuăn dêi rơpó.

Pôa Y Thương ăm ‘nâi, mơhé rêh ối tung pơla tơnêi têa hơniâp lĕm, tơnêi têa rế mơnhông mơdêk la tơdroăng rêh ối dêi kuăn pơlê mâu hdroâng kuăn ngo xuân ối hên xơpá, mâu khu ‘mêi xuân ối kơneăm hriăn vâ pro mâu tơdroăng ki pơlông kuăn pơlê ‘nhiê  ki tơrŭm vâ ‘nhiê kăch măng. Xua mê, mâu đảng viên môi tiah pôa thế cho xiâm loăng, cho tíu ki kal vâ kuăn pơlê loi tơná hlối pêi tiô:

“Pơla hdrối kố nah Đảng Tơnêi têa tơmâng khât troh tơdroăng rêh ối dêi kuăn ngo hên tơdroăng, malối pro on tơhik hngêi ki lâi xuân hiăng ai, má péa cho lăm khăm pơlât ôh tá tâi liăn. Mâu tơdroăng ki mê xuân cho tơdroăng hiăng tơmâng khât dêi Đảng, luât tơnêi têa tŏng kum hiăng tơmâng khât troh kuăn pơlê kuăn ngo ngin’’.

Ngăn ‘na hnoăng cheăng pêi dêi đảng viên môi tiah pôa Y Thương Kmăn, pôa Võ Ngọc Tuyên, Kăn hnê ngăn Đảng tơring Lăk tối tiah kố: Kô cho mâu ngế ki kal, cho tíu kơnôm tơngah dêi hdroâng kuăn ngo. đảng viên hơnăm hiăng krâ hiăng mơhno nhên hiâm tuăn khên tơnôu tơdroăng kal kí, cho ngế ki mơhno troăng lĕm ahdrối tung hnê mơhnhôk kuăn pơlê rak vế pêi tro tiô troăng rơhlâ dêi Đảng, luât Tơnêi têa.

Pôa Võ Ngọc Tuyên ăm ‘nâi:

“Ngin đi đo ‘nâi nhên rêm ngế đảng viên cho môi kơpâu reăng tung kơdrum, malối cho mâu đảng viên ối tung đảng hiăng ton hơnăm vâi cho mâu ngế ki djâ troăng lĕm ahdrối, cho mâu ngế mơhno troăng lĕm ăm kuăn pơlê pêi ƀối. Xua mê, ngin tơmâng khât troh tơdroăng lăm pôu, kơ-êng, hơlêm, trâm mâ tơpui tơno vâ mâu đảng viên hơnăm ai tuăn mơ-eăm pơtối rak vế pêi pro túa cheăng tơná hiăng hlê ‘nâi hriăn plĕng ki nếo ăm  pơlê cheăm. Tơxâng cho mâu ngế djâ troăng lĕm cho hmốu kơnía tung râ ủy chi ƀô̆ ƀă khu tơrŭm cheăng Đảng a pơlê cheăm’’.

Đảng ƀô̆ kong pơlê Dak Lak nôkố ai lối 85 rơpâu ngế đảng viên, tung mê ai lối 5.000 ngế đảng viên ối tung đảng hiăng 50 hơnăm tơngi klêng. Mâu đảng viên pêi cheăng tung đảng hiăng ton pơtối pleăng hnoăng tơná ăm tơdroăng cheăng kăch măng. Vâi cho mâu ngế ki mơhno troăng lĕm ăm mâu rơxông đảng viên hơnăm ối nếo pêi ƀối, cho hmốu kơnía eăng châ tiâm pât ing mâu hơnăm tro tiô tơdroăng púi vâ dêi pôa Hồ Chí Minh, Kăn xiâm hnê ngăn tơnêi têa hdrối nah hiăng chêh tung ƀai ‘’Hiâm mơno lĕm kăch măng’’ dêi tơná ‘’Hmốu kơnía rế kơlĭng rế chí, Mêa rế xut rế eăng lĕm’’.