Ơ pôa Rơchăm Thót-Kăn hnê ngăn chi ƀô̆ pơlê Ốp, bêng Hoa Lư, pơlê kong kơdrâm Plei Ku, nôkố, pơlê Ốp ai mâu tơdroăng tơ‘lêi hlâu ki klâi vâ mơjiâng thôn pơlê nếo ƀă mơnhông ôm hyô tung kuăn pơlê mơhno túa lĕm tro dêi mơngế Jarai?

-Nôkố pơlê Ốp ai hên tơdroăng tơ‘lêi hlâu vâ mơnhông mơdêk apoăng, pơlê ai 2 to kuât; tơdroăng pêi cheăng kâ vâ mơnhông mơdêk ai hên tíu ki tơ‘lêi hlâu, tơ’nôm nếo cho achê tíu pơlê kong kơdrâm mê achê hngêi pơkeăng, hngêi trung, troăng prôk, ai on tơhrik, tơdroăng rêh ối dêi kuăn pơlê tơ‘lêi hlâu tâ.

Pơlê Ốp nôkố ai lối 125 rơpŏng ƀă lối 600 pơ’leăng mâ mơngế, tung mê, mơngế Jarai ai lối 80 rơpŏng ƀă mơngế Bơhneá 20 rơpŏng, ki u ối cho mơngế Xuăn. Kơnôm môi tuăn dêi rơpó ing nah, tâi tâng rêm ngế, tơdroăng rêh ối rế ton rế mơnhông tơtêk ƀă pê klêi pơkâ mơjiâng thôn pơlê nếo. Ngin đi đo tơkŭm hôp hnê tối vâ kuăn pơlê ‘nâi tơrŭm dêi rơpó, rơtế tơrŭm pêi mâu tơdroăng pơkâ mơjiâng thôn pơlê nếo, mơhé ôh tá ai liăn vâ po rơdâ troăng prôk vâ tơ’lêi tung prôk lăm.

Ƀă kăn xiâm dêi chi ƀô̆ Đảng, mâu kăn, tung pơla hdrối mê hía nah pơlê Ốp hiăng châ pêi pro mâu tơdroăng ki klâi, ô pôa?

-Nôkố pơlê Ốp ai hên tơdroăng pơ’lêh nếo. Riân sap hneăng hơnăm 2017 - 2020, cheăng kâ pơxiâm mơnhông tơƀrê, ai hên hngêi mơjiâng pro lĕm, má péa rôe rơxế tu tuh vâ chơ báu prá, alâi ƀă rôe kơmăi kơmok vâ xúa tung pêi chiâk, má péa nếo, ai tâi tâng rơpŏng hngêi hiăng châ xúa on tơhrik ƀă 80% troăng prôk hiăng châ toh kơxu, ok ƀê tông, ƀă mâu kơtum chêng koăng xuân ối châ ‘măn rak tung mâu kuât. Má pái, tung pơlê ai kuât kân vâ kuăn pơlê tơkŭm hôp, má pŭn xuân ối kleăng kơneăng têa vâ kuăn pơlê lăm hnê têa vâ ôu kâ rêm hâi ƀă rak kơnhŏng têa krúa.

Pơlê Ốp nôkố pơkâ vâ ai hên kuăn ‘nĕng châ hriâm troh đăi hok, nôkố ối 1,2 rơpŏng kơtiê, kuăn pơlê tâng châi tơmo hiăng ‘nâi lăm khăm pơlât a hngêi pơkeăng, ƀaoh hiêm khăm pơlât kuăn pơlê kô rôe tâng ôh, tơnêi têa pro ăm, hên tơdroăng pơkâ nôkố pơlê Ôp châ pêi tiô pơcháu 100%.

Vâ pơlê Ốp mơnhông mơdêk pơlê mơhno túa lĕm tro ôm hyô tung kuăn pơlê dêi pơkê kong kơdrâm Plei Ku, mê khu kăn Đảng hiăng pro ki klâi kum kuăn pơlê hlê tung rak vế túa lĕm tro dêi mơngế Jarai thế rơtế bă tơdroăng kal tah lôi túa tơlá ki ôh pá tro, rak  hyôh kong prâi?

-Chi ƀô̆, kăn thôn, krâ pơlê hnê mơhnhôk kuăn pơlê, kuăn ‘nĕng  mơ-eăm kơhnâ lăm hriâm tâp. Rêm khế ngin xuân tơkŭm hôp hnê tối ăm mâu đảng viên kum kuăn pơlê krâ pul on tơhrik bâ eăng drô troăng kân, má péa nếo, mơgrúa lĕm troăng klông, má pái mơhnhôk mâu vâi muăn, kuăn cháu lăm hriâm.

Ngin xuân tơbleăng pơkâ luât, khôi túa pơlê, vâ kuăn pơlê hlê, hmâ ƀă tơdroăng rêh ối krúa lĕm tơdah tơmối ki ối hơngế châ lăm pôu ngăn pơlê túa lĕm tro. ‘Na tơdroăng mơdâm kiâ tung pơlê xuân ối hlo mơ’nhiê tơmeăm hên hĭn mơhé rơpŏng hngêi pá puât la xuân pro tiô túa tơlá ton nah.

Xua mê, kăn thôn, kăn hnê ngăn Đảng, Măt trâ̆n mâu khu râ mơni hiăng hôp vâ kuăn pơlê hlê ƀă tah lôi mâu tơdroăng pêi pro ki ôh pá tro, ai luât pơkâ vâ kuăn pơlê pêi pro ƀối 2, 3 tơdroăng, tơnôm amê nếo cho ối iâ kuăn ‘nĕng - cháu chái ki lăm hriâm, hlối iâ mơngế hriâm troh đăi hok, xuân hnê tối pro ti lâi vâ tâi tâng rêm ngế ‘nâi hriâm ƀă tơmâng tơdroăng hnê mơhno ing mâu kăn ƀô̆ dêi pơlê.

Tung la ngiâ, pơtối khŏm mơ-eăm mơjiâng pơlê chiâng tíu ki tơ’mot hên tơmối troh ôm hyô, ai hên túa lĕm tro dêi mơngế Jarai, râ kăn Đảng, mâu kăn ƀă kuăn pơlê pơlê Ốp ai pơkâ ti lâi ô pôa?

-Tơdroăng pêi a ngiâ cho rak tơniăn, hnê ăm mâu vâi o phô̆m xông kân, vâi  rơtăm ‘nâi tŏn chêng ƀă mơjiâng mâu khu tŏn chêng, khu kơhnhon xuăng tung pơlê, pơtối rak vế tơdroăng cheăng pong rơgi um loăng, tơdroăng teăn hmôu vâ tơxâng ƀă inâi pơlê mơhno túa lĕm tro. Pơtối mê nếo, hnê ăm kuăn pơlê pêi ƀối mâu tơdroăng pơkâ dêi kăn hnê ngăn Đảng tơring, Đảng ủy, xuân môi tiah chi ƀô̆, nôkố Đảng, tơnêi têa mơhnhôk kuăn pơlê pêi pro pơlê Ôm hyô, chi ƀô̆ ngin achê kuăn pơlê tâ, xuân hnê tối vâ kuăn pơlê hlo mâu tơdroăng ki pơxúa ing tơdroăng cheăng pêi pro ôm hyô, mơhé ối trâm hên xơpá la tung la ngiâ ngin kô mơ-eăm tăng troăng vâ kâi tơkâ luâ xơpá.

Nếo achê kố, pơlê Ốp châ xo liăn ‘no râ ing kơpêng vâ mơjiâng pro kuât ƀă ƀê tong la xuân ối pro kuât ai kuâ lêm ƀă hlá xá, drêng tơmối troh hyô ngăn vâi rơhêng vâ ngăn mâu kuăn ngo Jarai tŏn chêng, hơdruê xuăng, tung pơlê nôkố ối ai hên tơdroăng ki phá tơ ê tâng pơchông ƀă pơlê ki ê,  xua mê ngin kal thế pơtối rak vế, môi tiah tung kuât thế ai chêng, ai hơkâ, ai pong, chêa, ai hơpêap on, tung mâu hâi tơkŭm po mơdĭng xah hêi ro á xuân tŏn chêng ăm tơmối troh ôm hyô ngăn rơtế xah ro, tung pơlê Ốp nôkố ai 2 khu tŏn chêng, cho khu tŏn chêng mâu hiăng krâ ƀă khu ton chêng vâi kơdrâi, ai khu kơhnhon xuăng nếo, mâu khu ki xuăng mê đi đo lăm xuăng ăm tơmối troh ôm hyô ngăn, a tơngah túa tơlá lĕm tro toh nah mê kô châ pơtối rak vế ton troh ta ah.

-Mơnê kơ pôa Rơchăm Thót!