Ô pôa A Don, tiô ăm ‘nâi ing péa pái rơpŏng kuăn pơlê ƀă tơnêi pêt loăng plâi apoăng bú kŭn, luâ 2 hơnăm mơjiâng, Tôh pêi cheăng tơrŭm pêt kơtếo Y Du xua A Don pro tôh trương hiăng tơ’mot lối 150 rơpŏng kuăn pơlê veăng pêt ƀă pro kơpong pêt kơtếo chiâng kân rơdâ 35 ha a cheăm Đăk Trăm. Cho Kăn phŏ  hnê ngăn  Hô̆i đong kuăn pơlê cheăm Đăk Trăm, tơkŭm hôp a chi ƀô̆ thôn Đăk Rô Gia, tơdroăng pro pôa chiâng rơhêng vâ mơhnhôk kuăn pơlê mot tung tôh tơrŭm cheăng pêt kơtếo?

-Ki hdrối á hlo tơdroăng rêh ối kuăn pơlê tung cheăm xơpá ‘nâng, hên rơpŏng hngêi hâi hlê tơdroăng pêi cheăng kâ mê a hlo hơ-ui ƀă tâ dêi tơná ai hnoăng thế hnê, kum kuăn pơlê, mơjiâng tôh pêi cheăng tơrŭm, a ngế ki xiâm kĭ hơp đong ƀă tâi tâng mâu kŏng ti, mâu khu mơdró vâ tơniăn ai tơmeăm pê ăm kuăn pơlê.

Kơnôm veăng kum dêi kŏng ti, á ƀă kuăn pơlê hiăng pơkâ mơjiâng Tôh pêi tơrŭm cheăng, hnê hên kuăn pơlê ƀă kuăn pơlê pro mâu ngế tung khu pêt kơtếo, tâng vâ pơchông ƀă pêt pôm, chói báu, mê pêt kơtếo châ hên tâ. Pêt môi rơnó kơtếo kô châ xo 3-4 hơnăm kơ’nâi, pơxúa tâ pêt pôm, chối báu. Peăng kŏng ti xuân pro tơ’lêi kum kuăn pơlê ăm kuăn pơlê mung hdrê, phon, troh rơnó ah nếo tơvêh chĕn ăm tơná peăng kŏng ti.

-Rôh apoăng tơdroăng mơhnhôk kuăn pơlê veăng tung tôh tơrŭm pêt kơtếo mê hôm pá há, mê pôa hiăng pro ti lâi vâ kuăn pơlê pêi ƀối rơtế pêi ƀă pin?

Rôh apoăng á lăm mơhnhôk kuăn pơlê xuân trâm hên xơpá, má môi, ‘na tơdroăng tơpui ƀă rơkong vâ hnê kuăn pơlê pêt ti lâi, kuăn pơlê kơdrâ, hâi hlê klâi la drêng tơpui hnê tối pêi mơhno ăm vâi hlo ƀă mâ ‘’kơnôm ai kăn ƀô̆ ngăn ‘na pêi chiâk hnê kuăn pơlê, kuăn pơlê nếo ‘nâi.

Á xuân troh lăm pôu tơrêm hngêi, hnê kuăn pơlê ‘na kih thuât pêt kơtếo, klêi mê, a tối nhên ăm kuăn pơlê hlê kơ nôm pêt kơtếo rơpŏng hngêi á pêi châ xo liăn hên, ai liăn rôe rơxế, pro hngêi. Kuăn pơlê hlo á pêt kơtếo châ tơƀrê mê kuăn pơlê hmâng a hnê, klêi mê pêi pro ƀối môi tiah a pêi há. Tôh pêi cheăng tơrŭm ngin ai 153 ngế tung khu, tâi tâng tơnêi pêt kơtếo lâp cheăm nôkố ai 35 ha”.

-Rơnó ko xo dêi hdrối kố nah kơtếo dêi tôh pêi cheăng châ tơƀrê ti lâi?

Rôh pêt apoăng kuăn pơlê châ xo dêi sap 60-80 tấn/ha kơtếo ƀă kơtếo ki xo hơnăm má péa, má pái sap 80 troh 100 tấn/ha, châ xo dêi sap 70 – 90 rơtuh liăn, ôh tá riân kơxô̆ liăn ‘no rôe tơmeăm, kuăn pơlê ối châ xo dêi tơkâ sap 50 -70 rơtuh liăn. A hlo kuăn pơlê pêt kơtếo ai pơxúa hên tâ, kŏng ti kĭ tơhrâ hlối rôe kơtếo kuăn pơlê, ai to lâi ƀaoh hiêm mê ai 850 rơpâu xua mê kuăn pơlê ôh tá tô tuăn ‘’Châ kơtếo hên tê ôh tá ai yă” lơ ‘’Ai yă la ôh tá châ hên kơtếo‘’.

Laga kuăn pơlê thế mơ-eăm hriâm, mơ-eăm pêi cheăng mê nếo ai kơxô̆ liăn pê lo. Tâng pro tro pơkâ hnê kih thuât dêi kŏng ti mê kô ai kơtếo hên tâ, kơxô̆ liăn pê lo hên tâ há, kuăn pơlê kô ai lối kơxô̆ liăn vâ tơvêh dêi chĕn.

-Ki khât tơdroăng pêt kơtếo tâng pơchông ƀă mâu loăng plâi ki ê ki pêt hdrối nah kuăn pơlê hiăng pêt mê pôa hlo ki tơƀrê dêi kơtếo mê ti lâi?

Tơdroăng pêt kơtếo tâng pơchông ƀă pêt mâu hdrê loăng ki ê kơtếo ai pơxúa hên tâ. Tâng pêt 1 rơnó kơtếo tung hơnăm kô châ xo dêi sap 4-5 hơnăm kơ’nâi. Tâng pêt pôm loăng mê pêt tung môi rơnó bú châ ko ki hên gá 2 rơnó, klêi mê pin thế vêh pêt nếo. Má môi, kŏng ti kum dêi tâi liăn pơchoh tơnêi, má péa, Kŏng ti ăm dêi hdrê vâ pơ’lêh pêt, má pái liăn chơ ing sap ing klâng kố troh kŏng ti, pơtối ti mê, kŏng ti ăm kuăn pơlê mung hdrê pêt, phon rơvât, troh rơnó ko kơtếo ah kuăn pơlê tơvêh kơxô̆ liăn chĕn ăm tơná kŏng ti”.

-Vâ kuăn pơlê hriâm, pêi ƀối mê pôa hlo hnoăng cheăng dêi mơngế đảng viên môi tiah pôa xuân môi tiah mâu đảng viên ki ê tung Chi ƀô̆ thôn Đăk Rô Gia môi tiah lâi?

A cho ngế đảng viên, a thế djâ troăng a hdrối, sap tơdroăng pêi cheăng kâ, troh tơdroăng rêh ối tung rơpŏng hngêi xuân thế djâ troăng pêi a hdrối. Sap ing mê kuăn pơlê rơtâ tá ngăn hlo ki lĕm ki tro dêi pin kuăn pơlê kô hriâm pêi ƀối. Pin tối ti lâi pin thế pêi ti mê, pêi cheăng thế châ tơƀrê, thế pêi lo tơmeăm mê kuăn pơlê hlo vâi nếo loi, nếo pro ƀối.

-Ing tơdroăng pêi tơƀrê dêi Tôh pêi cheăng tơrŭm pêt kơtếo tiah mê, pôa hôm ai tơmiât vâ pêi ti lâi nếo tung tơdroăng krếo tơ’mot hên ngế mot tung khu pêi cheăng cho mâu kuăn pơlê Đăk Rô Gia xuân môi tiah mâu pơlê ki ê veăng pêt kơtếo, xuân môi tiah tơdroăng po rơdâ tơ’nôm mâu túa pêi cheăng pêt mâu loăng plâi ki ê?

A hlo hơ ui mâu ngế tung khu, xua kuăn pơlê pin hâi hlê tơdroăng pêi cheăng kâ. A đi đo mơ-eăm hnê mâu ngế tung khu, tối vâ kuăn pơlê hmâng, vâ kuăn pơlê hlê hên xua ki pơxúa dêi tơdroăng mot tung Tôh tơrŭm cheăng, rêm ngế drêng hiăng mot tung tôh tâng ‘nâi mơ-eăm pêi lo tơmeăm mê kô pêi cheăng châ xo hên, pakĭng mê ngin kô po rơdâ túa pêt cheăng, kô pêt sap 30 - 50 ha kơtếo, tơngah mâu ngế tung khu kô ai tơ’nôm kơxô̆ liăn pêi lo tơniăn.

-Mơnê kơ pôa A Don hiăng tơpui tơno ‘na tơdroăng mê!