A ƀuôn Mlăng, cheăm Ea Tar, tơring Čư̆ Mgar, kong pơlê Dak Lak bô bố xuân ‘nâi troh pôa Y Huăt Niê (hmâ krếo cho pôa Trân), xua pôa cho ngế ki châ kuăn pơlê loi nhuô̆m tung kơpong hdroâng kuăn ngo. Pêi pro tơdroăng mơjiâng thôn pơlê nếo, pôa hiăng troh rêm rơpŏng mơhnhôk vâi krâ nhŏng o pơtê ki hmâ kơ’nêi hmâng vâ kơpôu, ro chu, ‘mâi xĕn kơdroăng rông í peâp, kơpôu ro lo ing kơdâm hngêi trá, vâ rak vế tơdroăng ki krúa lĕm ăm rơpŏng hngêi ƀă pơlê cheăm. Rơkong tơpui dêi pôa châ vâi krâ nhŏng o tơmâng, loi ƀă pêi tiô ƀối.

“Cho môi ngế ki châ kuăn pơlê loi nhuô̆m tung pơlê, á đi đo rơtế ƀă vâi krâ nhŏng o rêm rôh ai tơdroăng kal. Hnê tối vâi krâ nhŏng o ‘nâi rak vế gâk kring tơniăn tung pơlê cheăm, vâi krâ nhŏng o, droh rơtăm rơtế ƀă dêi rơpó tơpui tơno ƀă dêi rơpó lĕm tro, kơhnâ pêi cheăng tơkâ luâ mâu xơpá tung rêh ối. Á châ hriâm ƀối mâu tơdroăng klâi mê á vêh hnê tối tâi tâng ăm vâi krâ nhŏng o rơtế hriâm ƀối vâ tơdroăng rêh ối tơniăn lĕm tâ”.

Mâu “ngế ki châ kuăn pơlê loi nhuô̆m” tung hdroâng kuăn ngo Rơđế đi đo hlê plĕng tiah kố, pin athế đi đo djâ troăng ahdrối vâ vâi krâ nhŏng o hriâm ƀối; rơtế ƀă dêi rơpó tơrŭm mơjiâng pơlê cheăm rế hía rế phai hơtô, hơniâp ro. Jâ H’Ngọc Êban (hmâ krếo cho jâ Tăm) hdrối nah cho kăn phŏ hnê ngăn Đảng cheăm Čư̆ Suê, tơring Čư̆ Mgar, kong pơlê Dak Lak.

Klêi kơ’nâi hiăng pơtê cheăng, jâ vêh rêh ối dêi a pơlê cho ƀuôn Sut Mđung, cheăm Čư̆ Suê ƀă châ vâi krâ nhŏng o tung pơlê pôk bro “Ngế ki châ kuăn pơlê loi nhuô̆m”. Tơná jâ H’Ngọc Êban ƀă rơpŏng hngêi đi đo djâ troăng ahdrối pêi pro mâu tơdroăng pơkâ môi tiah troăng hơlâ, luât pơkâ dêi Đảng, Tơnêi têa, ƀă chiâng tíu hgiân ăm vâi krâ nhŏng o a ƀuôn Sut Mđung.

“Á đi đo hnê pơchân vâi krâ nhŏng o mơ-eăm hnê tối kuăn ‘nĕng mơ-eăm pêi cheăng kâ, hriâm tâp tơniăn, pôi tá hmâng mâu tơdroăng ki vâ pro pơxuá ăm dêi tơná dêi mâu khu ‘mêi. Kuăn muăn hriâm rơkê, nôu pâ kơhnâ pêi cheăng kâ, tơdroăng rêh ối phâi tơtôu, lĭ lich lĕm vâ kuăn ‘nĕng pin tơkŭm hriâm tâp, xo ah hmôi ai tơdroăng cheăng pêi pơxúa ăm pơlê pơla”.

Veăng kum ivá ăm mơnhông cheăng kâ rêh ối pơlê pơla, rak vế gâk kring tơdroăng kal kí, tơniăn tung pơlê pơla a cheăm pơlê ƀă cho ngế ki xiâm “tơpui kuăn pơlê hmâng, pêi kuăn pơlê pêi tiô ƀối”, mâu ngế ki châ kuăn pơlê loi nhuô̆m xuân veăng kum ôh tá kŭn ƀă hnoăng cheăng mơdêk, rak vế mâu tơdroăng ki lĕm tro dêi hdroâng kuăn ngo.

Tung mâu hơnăm hdrối nah, pôa Y Đheh Ayun (hmâ krếo cho pôa Bình) cho “ngế ki châ kuăn pơlê loi nhuô̆m” a ƀuôn Phơng, cheăm Ea Tul, tơring Čư̆ Mgar, kong pơlê Dak Lak hiăng mơhnhôk vâi krâ nhŏng o tung pơlê rak vế mâu tơdroăng rơkâu xối ki kal khôi hmâ a pơlê, rak 4 kơtum chêng koăng, vâ chê 30 ngế ngê̆ nhân tŏn chêng koăng, pong rơgi loăng hnê ăm mâu rơxông kơ’nâi ƀă hên ki ê.

“Vâi krâ nhŏng o a cheăm Ea Tul xuân ối rak vế mâu tơdroăng ki lĕm tro ‘na mơhno túa lĕm tro hdroâng kuăn ngo tơná. Ngin đi đo hnê ăm vâi krâ nhŏng o rak vế ki lĕm tro ‘na mơhno túa lĕm tro hdroâng kuăn ngo tơná. Má péa nếo, ai Đảng, Tơnêi têa tŏng kum ‘na liăn ngân mê chiâng vâ rak vế mâu tơdroăng ki mơhno túa lĕm tro dêi hdroâng kuăn ngo tơná. Tâng môi tiah pin pro mơhía lôi tơdroăng mơhno túa lĕm tro hdroâng kuăn ngo tơná cho khéa hơ’nêng khât”.

Jâ H’Yâo Knul – Ngế xiâm ngăn Khu ngăn hdroâng kuăn ngo kong pơlê Dak Lak ăm ‘nâi, lâp kong pơlê nôkố ai 942 “Ngế ki châ kuăn pơlê loi nhuô̆m”. Mâu “ngế ki châ kuăn pơlê loi nhuô̆m” tung hdroâng kuăn ngo tối tơdjuôm, mơngế Rơđế tối krê vâi tơxâng châ khĕn kơdeăn. Mâu “ngế ki châ kuăn pơlê loi nhuô̆m” hiăng ôh tá xâu tơdroăng xơpá, lăm troh tơgôu rêm péa hngêi, troh rêm hơlâ troăng vâ djâ rêm ngế, mơhnhôk vâi krâ nhŏng o pêi cheăng kâ, xut tah hrâ mơnguâ kơtiê, pơtê lôi mâu khôi túa tơlá ki ôh tá tro, rak vế khôi túa lĕm tro, tơrŭm hơniâp ƀă pơlê pơla.

“Ƀă tơdroăng ki mơnhông mơdêk dêi kơpong kuăn pơlê mâu hdroâng kuăn ngo a kong pơlê Dak Lak tối krê ƀă lâp tơnêi têa tối tơdjuôm, ai tơdroăng veăng kum ôh tá kŭn dêi mâu ngế ki châ kuăn pơlê loi nhuô̆m cho mâu ngế ki xiâm, cho kông tơdjêp pơla Đảng, khu kăn pơkuâ ƀă kuăn pơlê. Tung mâu hơnăm hdrối nah, mâu ngế ki châ kuăn pơlê loi nhuô̆m hiăng mơdêk hnoăng cheăng, tíu ối dêi tơná tung pơlê pơla ƀă pêi pro châ tơdroăng ki loi tơngah dêi Đảng tơnêi têa”.

Chiâng vâ tối nhên, khu ngế ki châ kuăn pơlê loi tơngah tung kơpong hdroâng kuăn ngo a Dak Lak đi đo djâ troăng ahdrối tung mâu tơ’noăng pâ nhuô̆m tơnêi têa, mâu rôh mơhnhôk, cho kông tơdjêp ki kal pơla khu kăn pơkuâ ƀă kuăn pơlê. Ki khât gá ăm hlo, mâu ngế ki châ kuăn pơlê loi nhuô̆m hiăng mơhno hnoăng cheăng ki kal tung tơdroăng hnê tối, mơhnhôk kuăn pơlê pêi pro tro troăng hơlâ dêi Đảng, luât dêi Tơnêi têa; mâu tơdroăng, túa pơkâ mơnhông mơdêk cheăng kâ rêh ối pơlê pơlê, rak vế tơniăn gak kring a cheăm tơring.