Khu xiâm pơkuâ cheăng pêi Mô đô̆i rong ƀă Rêh ối pơlê pơla nếo ai tối ‘na tơdroăng tơniăn ‘na tŏng kum ăm tơdroăng rêh ối dêi mâu ngế ai hnoăng tơnêi têa ƀă mơngế pêi cheăng roh Têt Quý Mão hơnăm 2023. ‘Na tơdroăng tŏng kum phái tŏng kum kơklêa roh Têt Lo hơnăm nếo Quý Mão ƀă drêng tá hâi troh rơnó pôe xo báu hơnăm 2023, ai 18 kong pơlê trâm pá ‘na mơngế pêi cheăng, mê cho: Sóc Trăng, Ninh Thuận, Cao Bằng, Nghệ An, Tuyên Quang, Trà Vinh, Dak Nông, Quảng Bình, Dak Lak, Bạc Liêu, Gia Lai, Bắc Kạn, Kon Tum, Hà Giang, Bình Phước, Quảng Ngãi, Quảng Trị ƀă Lạng Sơn.

Tiô pơkâ thế dêi Tơnêi têa tŏng kum phái ăm kuăn pơlê ki kơklêa. Ing pơkâ dêi kong pơlê, Khu xiâm pơkuâ cheăng pêi – Mô đô̆i rong ƀă pơlê pơla hiăng tơrŭm ƀă Khu xiâm pơkuâ liăn ngân séa ngăn, mơnhên tơbleăng Ngế pro xiâm hnê ngăn Chin phuh kĭ 6 tơdroăng pơkâ tŏng kum 18 rơpâu tâ̆n phái vâ mâu kong pơlê tŏng kum kuăn pơlê. ‘Na tơdroăng tŏng kum phái hiăng châ xing xoăng teăm tơdrêng, tro mơngế, tơniăn ‘’ôh tá lôi kơbố parŏng’’.