*** Sap ing mâu hâi apoăng hơnăm nếo 2023, Vi ƀan hdroâng kuăn ngo hiăng tơkŭm po Hneăng hôp lâp tơnêi têa mơgêi tơdroăng pêi cheăng tŏng kum hdroâng kuăn ngo hơnăm 2022; mơgêi 1 hơnăm pêi pro Tơdroăng pơkâ xiâm tơnêi têa mơnhông mơdêk cheăng kâ – rêh ối pơlê pơla vâi krâ hdroâng kuăn ngo ƀă kong ngo hneăng hơnăm 2021 – 2030 ƀă pêi pro hnoăng cheăng hơnăm 2023.

Kơnôm tơdroăng hnê mơhno kơtăng dêi Chin phuh, ƀă tơdroăng mơ-eăm dêi vâi krâ kuăn pơlê mâu hdroâng kuăn ngo tung tơdroăng po rơdâ pêi pro tơdâng mâu troăng hơlâ hdroâng kuăn ngo, troăng hơlâ kum rêh ối pơlê pơla xua mê tơdroăng rêh ối dêi vâi krâ mâu hdroâng kuăn ngo ngăn tơdjuôm tơniăn ƀă rế hía rế châ pơ’lêh. Hơnăm 2022, kơxô̆ rơpŏng kơtiê tung kơpong hdroâng kuăn ngo kơdroh lối 3%/hơnăm.

Pôa Hầu A Lềnh, Ngế xiâm, Kăn xiâm pơkuâ Vi ƀan hdroâng kuăn ngo tối ăm ‘nâi, hơnăm 2023, tơdroăng ki kal cho pêi pro mâu tơdroăng tơkêa bro tung Tơdroăng pơkâ xiâm tơnêi têa ƀă kơxô̆ liăn kân sap hơnăm 2022 pơtroh ăm ƀă pơkâ pêi dêi hơnăm 2023.

*** Tiô tối tơbleăng dêi Vi ƀan Măt trâ̆n Tơnêi têa tơring Lâm Hà, kong pơlê Lâm Đồng, 5 hơnăm hdrối nah Tơnêi têa hiăng ‘no lối 45 rơtal liăn sap ing hên kơxô̆ liăn ăm kơpong hdroâng kuăn ngo tung tơring. Tung pơla mê, ki rơhêng vâ tối cho tŏng kum bro hngêi ối ƀă tŏng tơdroăng rêh ối ăm vâi krâ nhŏng o mơnhông mơdêk cheăng kâ.

Malối, tung tơdroăng tŏng kum liăn pêi cheăng kâ, khu kăn pơkuâ ƀă kơvâ cheăng ki ai tơdjâk troh hiăng kum kuăn pơlê mơnhông mơdêk pêt loăng yâu păn hdrong kân má môi kong pơlê Lâm Đồng ƀă lối 3.600 ha loăng yâu păn hdrong.

Pôa K’Tân, Kăn phŏ hnê ngăn Vi ƀan Măt trâ̆n Tơnêi têa tơring Lâm Hà tối:

“Hdrối nah, Đảng Tơnêi têa xuân hiăng tơmâng tŏng kum hên, ƀă nôkố mê tơmâng ngăn tŏng kum hên tâ nếo. Ki xiâm môi tiah kum mâu kơtiê bro hngêi ối, kum tơdroăng pêi cheăng kâ. Mê cho tŏng kum liăn pêt yâu păn hdrong, rêm rơpŏng 20 rơtuh liăn lơ 50 rơtuh liăn. Lơ tŏng kum ƀă tơdroăng ki bro hngêi ối nếo ăm mâu kơtiê xơpá ‘na hngêi ối, rêm toăng hngêi kum 50 rơtuh liăn.

Rơpŏng veăng mơ’no tơ’nôm sap ing 10 troh 20 rơtuh liăn vâ bro hngêi ki lĕm. Măt trâ̆n tơnêi têa Việt Nam tơring Lâm Hà ngin pêi pro hnoăng cheăng séa ngăn tối tơbleăng pơlê pơla séa ngăn kăn ƀô̆ tung tơdroăng ki tŏng kum kuăn pơlê mơnhông mơdêk cheăng kâ mơ-eăm bro kro mơdŏng”.

*** Tơring Lạc Dương, kong pơlê Lâm Đồng ai vâ chê 70% pơ’leăng mâ kuăn pơlê cho vâi krâ hdroâng kuăn ngo. Kơnôm mơnhông mơdêk châ tơƀrê mâu tơdroăng tơkêa bro mơ’no liăn cheăng ing tơdroăng pơkâ xiâm tơnêi têa, thăm pơ’lêh hdrê pêt mơnăn păn, djâ khoa hok kih thuât tung pêt mơjiâng tơmeăm pêi lo ing chiâk deăng tiô troăng kŏng ngê̆ rơxông nếo xua mê kơlo kơdroh kơtiê rĕng.

Tiô pôa Cill Poh, Kăn phŏ hnê ngăn Vi ƀan tơring Lạc Dương, mơhé 2 hơnăm hiăng hluâ tơdjâk dêi pơreăng COVID-19, laga tơmeăm pêi lo ing chiâk deăng môi tiah loăng pơkeăng A-ti-sô, reăng, kơchâi drêh tŭm túa ƀă kơphế ƀă hía hé, ai tíu tê tơniăn, yă tơmeăm tâk xua mê tơdroăng rêh ối dêi kuăn pơlê hiăng pơ’lêh hên; kơxô̆ rơpŏng kơtiê dêi tơring chu kơdroh sap ing 8,6 chu u ối 5,8%, tơkâ hluâ pơkâ mơ’no. Tơkâ hluâ pơkâ tâng pơchông ƀă pơkâ mơ’no.

“Tung pêt mơjiâng tơmeăm hơnăm kố nah mê vâi krâ kuăn pơlê ngin hiăng ‘nâi pêi chiâk deăng xúa kơmăi kơmok rơxông nếo, môi tiah pêt kơchâi drêh, reăng tung hngêi hlâm, xua mê tơdroăng cheăng kâ mơnhông mơdêk hôm. ‘Na mơjiâng thôn pơlê nếo mê nôkố tâi tâng mâu cheăm, pơlê kân dêi tơring pơrá hiăng châ pơkâ, gâk kring châ tơniăn.

Vâi krâ kuăn pơlê hlê plĕng ƀă ‘nâi troăng pêi kâ, ‘nâi mơ-eăm xêh mơ’no liăn mơnhông mơdêk cheăng kâ. Kơnôm mê tơdroăng kơdroh kơtiê hiăng châ tơƀrê hên tâng pơchông ƀă pơkâ mơ’no’’.