Kơxo hâi lơ 23/2, pôa Phạm Minh Chính, Ngế pro xiâm hnê ngăn Chin phuh pơkuâ roh hop Chin phuh ‘na tơdroăng mơjiâng luât khế 2/2023.Xông tơpui a roh hôp mê, pôa Phạm Minh Chính tối ăm ‘nâi, pơkâ tơdroăng kal dêi hneăng hôp kân Đảng má 13, mâu troăng hơlâ dêi Đảng, Kuô̆k hô̆i, Chin phuh hiăng tơkŭm hên tung roh pêi pro 3 hnoăng cheăng ki kân xiâm, tung mê, ai tá tơdroăng hơ’lêh nếo ‘na túa cheăng tơnêi têa.

Tung hơnăm 2022, Chin phuh tơkŭm po 9 roh hôp ƀă hên hĕng mâu roh hôp ki tiah hmâ dêi Chin phuh ‘na tơdroăng mơjiâng luât. Mot tung hơnăm 2023, kố châ ngăn cho roh hôp má 2 dêi Chin phuh ‘na mơjiâng luât, pêi pro klêi đeăng ‘na troăng hơlâ, tah lôi mâu tơdroăng tơvâ tơvân, mơjiâng chiâng troăng prôk ki tro tiô luât ăm tơdroăng mơnhông.

Ngế pro xiâm hnê ngăn pơkâ thế tâi tâng khu râ kăn cheăng tung Chin phuh kal pơtối mơdêk ivá cheăng luâ tâ kơ mê nếo, khŏm mơ-eăm mơdêk, pêi pro khŏm kâi chiâng, ƀă hiâm mơno ki pro hơ’lêh nếo, mơjiâng luât athế rak tơniăn tro hâi khế, athế tơtro khâp tung rêm kơvâ cheăng.