Kơxo lơ 24/2, a pơlê kong kơdrâm Đồng Hới, kong pơlê Quảng Bình, pôa Trần Hồng Hà, Ngế pro xiâm phŏ hnê ngăn tơnêi têa pơkuâ po Rôh hôp xo rơkong veăng tơpui tối ‘na kơxop hlá mơ-éa Luât Tơnêi tơníu ki ‘mâi pơ’lêh. Rôh hôp kố tơmâng kăn teăng mâ 12 to kong pơlê, pơlê kong kân tối tơbleăng ‘na klêi kơ’nâi veăng tơpui tối ‘na kơxop hlá mơéa Luât Tơnêi tơníu ki ‘mâi pơ’lêh dêi mâu rơxông kuăn pơlê, mâu tơdroăng ki tơvâ tơvân tung pơla pêi pro.

Mâu kong pơlê veăng tơpui tối nhên tung rêm chương, mục, tơdroăng pơkâ dêi tơdroăng tơkêa Luât; mâu rơkong pâ thế ‘mâi rơnêu mâu tơdroăng luât; Mâu tơdroăng xơpá, tơvâ tơvân sap ing tơdroăng ki ai khât tung rêh ối. Mâu kong pơlê tối tiah kố, tung pơla tơpui tơno, xo rơkong tơpui tối dêi kuăn pơlê gá bu iâ, xơpá vâ tăng ‘nâi nhên, môi tuăn tung Kuăn pơlê. Mâu kăn tơkŭm pêi pro 4 tơdroăng ki kân.

Má môi, cho kal ‘nâi nhên mâu tơdroăng pơkâ, kal mơnhên nhên hnoăng pơkâ hâi khế, hnoăng cheăng pôu râng, hnoăng cheăng. Tơdroăng ki má péa, cho tơdroăng pơkâ; Tơdroăng ki má 3, cho yă tơnêi, túa mơnhên yă tơnêi ƀă Tơdroăng ki má pŭn cho xo tơvêh tơnêi, gu băng tơnêi, vêh pro pơlê. Ki hên mâu kăn pơkâ thế athế tah lôi hâi khế mơnhên yă tơnêi, tah nhên yă tơnêi.