Kơxo hâi lơ 23/4, a Pơlê kong kân Cần Thơ, pôa Võ Văn Thưởng, Kăn hnê ngăn tơnêi têa veăng leh ƀă tối tơbleăng a Leh mơhnhôk pêi pro Khế Tŏng kum dêi râ tơnêi têa hơnăm 2023. A leh mơhnhôk, jâ Bùi Thị Hòa, Kăn xiâm hnê ngăn Khu lo tŏng veăng Việt Nam tối tơbleăng, Khu xiâm kal kí hiăng xoăng hnoăng cheăng ăm pôa Võ Văn Thưởng, Ngế cheăng tung khu xiâm kal kí, Kăn xiâm hnê ngăn tơnêi têa veăng leh ƀă Khu lo tŏng veăng Việt Nam hneăng hơnăm 2022-2027.

Kăn xiâm hnê ngăn tơnêi têa ăm ‘nâi kô mơ-eăm ‘no hnoăng mơnhông mơdêk dêi Khu ƀă tơdroăng mơhnhôk tŏng kum tung lâp tơnêi têa tung la ngiâ. Hơnăm kố, mơ-eăm mơhnhôk ki iâ châ 400 rơtal liăn vâ kum 1 rơtuh ngế kơtiê xơpá, tung mê, kum hdrối kuăn pơlê tơnăng ká ki kơtiê, xơpá ƀă vâi hdrêng kơtiê, ki chó kô châ xo liăn tơmeăm ki tung tơnêi têa ƀă kong têa ê tŏng kum.

Kăn xiâm hnê ngăn tơnêi têa krếo thế mâu kơ koan, khu tơrŭm, mâu khu mơdró, mâu khu tơrŭm cheăng lâp plâi tơnêi, mâu ai tuăn hơ-ui ƀă khu râ kuăn pơlê pơtối tơrŭm, veăng kơjo kum, rơtế ƀă Khu lo tŏng veăng Việt Nam tung tơdroăng kơjo kum rế tơƀrê ăm mơngế kơtiê, mâu ngế xơpá tung rêh ối.