Kơxo lơ 16/1, pôa Vương Đình Huệ, Kăn xiâm hnê ngăn Kuô̆k hô̆i troh pôu, rơkâu Têt, diâp tơmeăm ăm khu lêng kring vế, rơpŏng ki ai hnoăng tơnêi têa, kuăn pơlê hdroâng kuăn ngo,kŏng nhân, mâu ngế pêi cheăng ai tơdroăng rêh ối xơpá a tơring Bát Xát, kong pơlê Lào Cai. Tối ‘na tơdroăng tơdjuôm dêi tơnêi têa tung hơnăm 2022, pôa Vương Đình Huệ tối tiah kố, Lào Cai ai tơdroăng veăng kơhnâ khât tung tơdroăng ki tơƀrê tơdjuôm dêi tơnêi têa.

Malối, khu lêng Mố đô̆i gâk tơkăng kong tung lâp tơnêi têa hiăng ai mâu tơdroăng pêi pro ki ai pơxúa, môi tiah “Rơnó Hơngui tơkăng kuăn pơlê”, Rơnó Hơngui tơkăng kong hơtôu hiâm mơno kuăn pơlê tíu tơkăng kong”, xo kuăn roăng cho mâu vâi muăn ki ai tơdroăng rêh ối xơpá, păn roăng troh drêng vâi muăn hiăng kân. Akố, pôa Vương Đình Huệ hiăng diâp tơmeăm ăm Đông Mố đô̆i gâk tơkăng kong Bát Xát, Đông mố đô̆i gâk tơkăng kong Y Tý, Đông Mố đô̆i gak tơkăng kong A Mú Sung, Đông Mố đô̆i gâk tơkăng kong Trịnh Tường, Khu ngăn cheăng kâ 345, rơpŏng ai hnoăng tơnêi têa, rơpŏng kơtiê, kŏng nhân ƀă mâu ngế pêi cheăng ai tơdroăng rêh ối xơpá, kuăn pơlê hdroâng kuăn.