Troăng mot troh a hngêi pôa Hồ Phình, 47 hơnăm, ối a pơlê Kè, cheăm Lâm Hoá, tơring Tuyên Hóa tơkâ luâ to inúa, ngo kân. Hdrối nah, rơpŏng pôa Phình đi đo ôh tá bê kế kâ. Rơpŏng hngêi ai 6 ngế la bu ai 2 sao tơnêi ki pêt prá alâi ƀă 1 sao tơnêi pêt báu, hơnăm ki lâi xuân ôh tá châ báu phái, tâi rơpŏng pôa tơkôm tơngah to tơdroăng ki tŏng kum dêi Tơnêi têa.

Ôh ti vâ ƀă tơdroăng ki kơklêa kơtiê, pôa Hồ Phình tí tăng pêi pro mâu túa cheăng mơnhông pêi cheăng kâ. Ing kơxô̆ liăn mung châ 50 rơtuh liăn mung ing Hngêi rak liăn kum mơngế kơtiê, pôa rôe kuăn ro, kuăn chu ƀă hdrê loăng pêt. Klêi kơ’nâi to lâi hơnăm kơdĭng, pôa Hồ Phình ai 5 ha kong rơtế ƀă hên kơpôu, ro, chu, í. Pôa ối pêt tơ’nôm báu, alâi ƀă hên mâu tơmeăm ki ê, pêi báu bê kâ plâ hơnăm, alâi xúa vâ pro kế kâ ăm chu, í, tơdroăng pêi cheăng kâ hiăng châ tơtêk hên tâ.

‘’Xuân ối hên tơdroăng ki pá puât la xuân athế kơdo mơ-eăm, pêi cheăng kâ châ mơjiâng hên tơmeăm tâ. Maluâ xuân ối kơiê la á chía tâ mâu vâi krâ-nhŏng o ki ê. Chêh hlá đơn pâ lo ing rơpŏng kơtiê, vâ chê kơtiê vâ Đảng, Tơnêi têa tŏng kum mơngế ki xahpá tâ kơ pin. Mâu rơpŏng ki xahpá mê pin xuân athế tŏng kum vâi krâ, tá hâi teăm ‘nâi pêi kâ mê pin athế hnê vâi krâ-nhŏng o pêi pêt tơmeăm tung kơdrum’’.

Pôa Hồ Phình cho môi tung mâu ngế Mã Liềng ki apoăng châ mot Đảng ƀă xuân cho ngế ki apoăng a cheăm Lâm Hoá chêh pro đơn pâ lo ing rơpŏng kơtiê. Hlá đơn dêi pôa ti xê to vâ kum ăm mơngế ki xahpá, luâ tâ mê ối cho mơhnhôk thế vâi krâ-nhŏng o Mã Liềng pêi pro ƀối vâ hluăn ing kơtiê.

Jâ Cao Thị Vân, Kăn pơlê Kè, cheăm Lâm Hoá, tơirng Tuyên Hoá tối ăm ‘nâi, vâ mơhnhôk vâi krâ Mã Liềng mơnhông pêi cheăng kâ mê mâu đảng viên athế djâ troăng ahdrối, athế châ hluăn ing kơtiê hdrối, tơpui athế pêi pro hlối mê vâi krâ nếo loi vâ pêi pro ƀối. Tơdrêng ƀă tơdroăng mơnhông pêi cheăng kâ mơnhông dêi rơpŏng hngêi, pôa Hồ Phình ối lăm troh tơrêm hngêi tung pơlê, hnê tối vâi krâ nhŏng o păn mơnăn, pêt kong, hbru kum hdrê pêt, mơnăn păn.

‘’Ngoh Hồ Phình lăm troh tơrêm hngêi vâ tối tơno, mơhnhôk vâi krâ, tâng trâm mâu tơdroăng ki xahpá mê kô tŏng kum. Vâ mơhnhôk vâi krâ-nhŏng o akố mê kăn ƀô̆ athế ‘’rơkong tơpui mê kŏng athế hnê pêi hlối’’ mê vâi krâ-nhŏng o nếo hlê plĕng. Pơla hdrối kố nah, Đảng ƀă Tơnêi têa đi đo tŏng kum, tơveăng vâi krâ-nhŏng o hên ‘nâng, vâi krâ pêi cheăng kâ rế hía rế mơnhông, ai hngêi ối, troăng prôk, on tơhrik ƀă ai hngêi trung ăm hok tro’’.

Cheăm Lâm Hoá ai lối 150 rơpŏng ai dâng 650 pơ’leăng mâ mơngế Mã Liềng (môi kơvâ dêi hdroâng Chứt). Pôa Đinh Văn Bắc, Kăn phŏ pơkuâ hnê ngăn Đảng uỷ cheăm Lâm Hoá, tơring Tuyên Hoá, kong pơlê Quảng Bình tối ăm ‘nâi, pơlê Kè dế nôkố ai 10 ngế đảng viên, tung mê, ai 7 ngế đảng viên cho mơngế Mã Liềng. Cho Kăn phŏ pơkuâ hnê ngăn Chi ƀô̆, pôa Hồ Phình rơtế ƀă mâu đảng viên a pơlê Kè đi đo djâ troăng, prôk ahdrối tung hnoăng cheăng, rak vế, pêi pro tiô troăng pơkâ thế, tơdroăng tŏng kum dêi Đảng, Tơnêi têa, mơhnhôk kuăn pơlê mơnhông pêi cheăng kâ, kơdroh kơklêa, xăm kơtiê.

Tiô pôa Đinh Văn Bắc tối, Hồ Phình châ mơnhên tối cho rơpŏng kuăn pơlê ki pêi chiâk deăng rơkê râ cheăm tung plâ 5 hơnăm pơtối. Hơnăm nah, pôa cho đảng viên pêi rơkê hnoăng cheăng.

‘’Hnoăng cheăng ki djâ troăng, pêi pro ahdrối, ki mơhnŏng ‘nâi pêi rơkê dêi đảng viên pơtối châ mơdêk tơƀrê tung tơdroăng hnê mơhnhôk vâi krâ-nhŏng o kuăn pơlê ‘na mơnhông pêi cheăng kâ - rêh ối pơlê pơla, kring vế gak ngăn tơniăn a mâu pơlê. Tơdroăng rêh ối hiăng hơ’lêh hên, ki rơhêng vâ tối, vâi krâ-nhŏng o hiăng ‘nâi mơnhông pêi cheăng kâ, rêh ối pơlê pơla’’.

Pôa Bùi Thanh Chuyên, Kăn phŏ pơkuâ hnê ngăn Đảng tơring Tuyên Hoá, kong pơlê Quảng Bình tối ăm ‘nâi, lâp tơring ai 44 ngế đảng viên cho hdroâng kuăn ngo ki iâ mơngế. Kố cho khu ki xiâm tung hnê mơhno troăng tŏng kum dêi Đảng, luât dêi Tơnêi têa, mơnhông pêi cheăng kâ - rêh ối pơlê pơla, rak vế tơniăn túa lĕm tro mâu hdroâng kuăn ngo a pơlê tíu tơkăng kong.

Tiô pôa Bùi Thanh Chuyên ăm ‘nâi, la ngiâ kố ah, tơring pơtối mơnhông tăng rah mơngế mot đảng viên tung hdroâng kuăn ngo ki iâ mơngế, mơjiâng khu đảng viên djâ troăng ahdrối, vâ ing mê, po rơdâ pêi pro tung lâp lu:

‘’Tung la ngiâ kố ah, Khu hnê mơhno cheăng Đảng tơring pơtối tŏng kum, thăm mơdêk tơdroăng mơnhông đảng viên a kơpong hdroâng kuăn ngo ki iâ mơngế vâ rế hía rế ai hên kuăn pơlê châ mot Đảng, chiâng khu ngế ki xiâm ƀă cho mâu ngế ki loi tơngah, mơngế ki djâ troăng prôk hdrối tung hnê mơhnhôk vâi krâ-nhŏng o rak vế, pêi pro mâu tơdroăng pơkâ thế, troăng tŏng kum dêi Đảng, luât dêi tơnêi têa’’.

Tơdroăng ki ‘mot mơngế hdroâng kuăn ngo kơhnâ rơkê mot Đảng a tơring kong ngo Tuyên Hoá, kong pơlê Quảng Bình cho hnoăng cheăng kal kí. Ing mê, hiăng mơnhông hnoăng cheăng ki xiâm tung kơpong pơlê cheăm dêi mâu hdroâng kuăn ngo a mâu tơring, cheăm.