Bêng Vĩnh Phước, cho môi tung mâu bêng kĭng têa kơxĭ dêi pơlê kong krâm Vĩnh Châu. Hên hơnăm hdrối nah, Đảng ƀô̆ bêng đi đo tơmâng khât tơdroăng ’mot mơngế chiâng đảng viên tung mâu hdroâng kuăn ngo.

Kăn phŏ pơkuâ hnê ngăn Đảng bêng Vĩnh Phước - cho pôa Nguyễn Thanh Tùng tối ăm ‘nâi, rêm hơnăm, ing tơdroăng pơkâ hdró, pơkâ pơcháu kơxô̆ tơ’mot xuân môi tiah mâu hlá mơ-éa hnê mơhno dêi kăn pơkuâ hnê ngăn Đảng pơlê kong krâm tung tơdroăng tơ’mot mơngế chiâng đảng viên, Đảng ủy bêng hiăng tơkŭm hnê tối tơbleăng pêi hên troăng rơhlâ vâ mơdêk kơxô̆, mơngế ki ai tuăn lĕm tơdrăng ăm mot Đảng; tung mê, mơjiâng pơkâ mâu hlá mơ-éa hnê mơhno, pơkâ pơcháu kơxô̆ mơngế mot Đảng ăm chi ƀô̆  sap ing apoăng hơnăm; hlối pêi tro tơdroăng cheăng tăng mơngế klêi mê pơkâ vâ ăm mot chiâng đảng viên:

“Mơngế ki ngin ngăn rah vâ ăm mot đảng viên, hô̆i viên, klêi mê tăng mơngế tung kuăn pơlê ki lâi kơhnâ, ai tuăn lĕm tơdrăng, malối tơmâng tăng ngăn mâu hdrôang kuăn ngo ki reh ối tung bêng. Klêi tăng ngăn tơ’nôm pơkâ. ‘Na pơkâ séa ngăn tơ’nôm tơdroăng pơkâ. ‘Na pơkâ dêi hơnăm 2022 mê tung tâi tâng kơxô̆ 27 ngế chêh inâi hnê tơ’nôm ăm hriâm mâu lâm ai 21 ngế. Klêi hriâm ngin tơ’mot 17 ngế tung kơxô̆ ki 16 ngế  râ kơpêng pơcháu, châ 106% , tung mê, đảng viên kuăn ngo ai 9 ngế, châ lối 5%”.

Mâu lâm đảng viên hơnăm ối nếo a bêng Vĩnh Phước xuân châ hriâm tâp, hriâm ing cheăm bêng. Klêi mâu tơdroăng mơhnhôk pêi pro dêi mâu khu tơrŭm đoân, hô̆i, hên ngế ki kơhnâ rơkê hiăng châ chêh inâi ăm mot Đảng. Nâ Ngô Thảo Trang kăn hnê ngăn Chi đoân pơlê Xẻo Me, bêng Vĩnh Phước, pơlê kong krâm Vĩnh Châu, nâ Trang cho ngé kơdrâi ngăn mâu droh rơtăm đi đo pêi bro ahdrối tăng ngăn a bêng, tăng hên troăng rơhlâ tơkŭm mâu droh rơtăm, hnê tơkŭm pêi cheăng.

Nâ đi đo tơmâng khât pơtối rak vế ƀă mơdêk ki tơƀrê tung tơdroăng tơkŭm hôp a Chi đoân, teăm ‘nâi mâu tơdroăng tơmiât, púi vâ dêi đôan viên, droh rơtăm. Ing mê, nâ hiăng rơtế ƀă pơlê cheăm bêng tơkŭm po pêi hên tơdroăng cheăng ai pơxúa ƀă tơƀrê tung mâu tơdroăng cheăng mê cho: tơdroăng mơhnhôk droh rơtăm pleăng tơná lăm pêi cheăng, pleăng mơheăm, pêi tơdroăng pâ mơno mâu ai hnoăng tơnêi têa, kơhnâ tung mơnhông cheăng kâ...

Klêi 2 hơnăm pêi cheăng ƀă hriâm tâp, nâ Trang châ pơkâ rah xo ăm mot Đảng. Nâ Ngô Thảo Trang hâk phiu tối:

“Nôkố a hiăng pêi klêi hriâm lâm vâ hlê plĕng na Đảng, tung la ngiâ a kô mơ-eăm hriâm vâ mơdêk tuăn ngôa hlê plĕng, hriâm tơdroăng cheăng kal kí vâ ăm tơná hlê tâ  ƀă vâ pê klêi hnoăng cheăng ki pơcháu vâ tơxâng drêng châ mot tung Đảng’’.

Cho kong pơlê ai krâm hdroâng kuăn ngo dêi kong polê Sóc Trăng, kuăn ngo Khmer ai kơpêng 52% , kuăn ngo Hoa lối 17% kơxô̆ mơngế tung pơlê kong krâm, tung mâu hơnăm hdrối nah, Đảng ƀô̆ pơlê kong krâm Vĩnh Châu đi đo tơmâng khât tung mơnhông tăng mot mơngế chiâng đảng viên tung mâu kuăn ngo ƀă ngăn mê cho hnoăng cheăng pêi đi đo, tơdroăng cheăng ki kal.

Đảng ƀô̆ pơlê kong krâm Vĩnh Châu nôkố ai 42 đảng ƀô̆, chi ƀô̆,  tung mê ai 10 đảng ƀô̆ cheăm, bêng, 5 ngế đảng ƀộ kơvâ cheăng ƀă 27 chi ƀộ kơvâ cheăng; ai 207 chi bộ dêi Đảng ƀộ cheăm. Ing mê, pơlê kong krâm ai lối 4.200 ngế đảng viên, tung mê ai lối 1.700 ngế đảng viên kuăn ngo. Tiô ‘nâ  Phan Thị Xinh Hưởng,  Ngế phŏ hnê ngăn Đảng pơlê kong krâm Vĩnh Châu, đảng viên cho ngế kuăn ngo cho mâu ngế ki veăng ‘no hnê hnoăng tung mơnhông mơdêk tơdjuôm dêi pơlê kong krâm, vâi hlối cho ngế kuăn pơlê nhoăm, hlối cho ngế djâ troăng a hdrối tung pêi pro mâu tơdroăng  mơhnhôk cheăng kăch măng a pơlê kong krâm, malối cho tung mơjiâng thôn pơlê nếo.

Kăn phŏ hnê ngăn Đảng pơlê kong krâm Vĩnh Châu, nâ Phan Thị Xinh Hưởng tối:

“Tung la ngiâ, Khu ngăn Đảng pơlê kong krâ Vĩnh Châu xuân tối tăng xiâm vâ tơ’mot mơngế mot đảng viên tung hdroâng kuăn ngo cho môi tơdroăng cheăng châ tơmâng ƀă hnê mơhno pêi đi đo. Hơnăm 2023, Khu ngăn Đảng pơlê kong krâm Vĩnh Châu hiăng tơbleăng mâu troăng rơhlâ vâ mơnhông tơ’mot mơngế mot đảng tung hdroâng kuăn ngo”.

Ƀă mâu tơdroăng pêi pro hôp hnê mơhno, hriăn plĕng, tơdroăng mơdêk mơngê mot Đảng cho mâu kuăn ngo a pơlê kong krâm Vĩnh Châu hiăng pro pơxúa tơƀrê. Tơdroăng mê châ mơnhên ing tơdroăng cheăng pêi, tơdroăng kal kí, mâu khu tơrŭm cheăng Đảng rơdêi, mơhno nhên hnoăng cheăng kăn hnê ngăn kuăn pơlê tung tơdroăng mơnhông cheăng kâ, mơhno túa lĕm tro, pơlê pơla, tơniăn cheăng lêng kring gak tíu tơkăng kong pơlê cheăm kong pơlê.