Ngế xiâm pơkuâ Khu pêi cheăng mâu kăn, kăn phŏ pơkuâ Khu Tơrŭm Tơnêi têa - jâ Nguyễn Thị Thanh ăm ‘nâi, 20 hơnăm hdrối nah, Khu pêi cheăng mâu kăn hiăng tơrŭm krá tơniăn ƀă mâu kơ koan ki ai tơdjâk veăng tí tăng ‘nâi plĕng ăm Vi ƀan pơkuâ Kuô̆k hô̆i hơ’lêh tơdroăng pơkâ tơmiât dêi Đảng, tung ‘mâi rơnêu, ‘mot tơ’nôm Mơ-éa Luât hơnăm 2013, malối, cho mâu tơdroăng pơkâ ‘na pôk, Hô̆i đong tâ phĭu pôk Tơnêi têa.

Sap hơnăm 2005 troh nôkố, Khu pêi cheăng mâu kăn hiăng tơkŭm po 142 rôh hôp hnê tơ’nôm, tơ’mot tơdroăng ki veăng dêi vâ châ vâ 15 rơpâu ngế kăn Kuô̆k hô̆i, Khu pơkuâ Hô̆i đong hnê ngăn, kăn pơkuâ ƀă khu ki rơkê dêi Ƀơrô cheăng Khu kăn Kuô̆k hô̆i ƀă Hô̆i đong hnê ngăn mâu kong pơlê, pơlê kong kân.

‘Na hnoăng cheăng Hô̆i đong hnê ngăn, Khu hiăng hbrâ rơnáu, pêi pro teăm tơdrêng tơdroăng ki tí tăng ‘nâi plĕng ăm Vi ƀan pơkuâ pơkâ vâ chê 400 hlá méa hnê pêi cheăng ăm Hô̆i đong hnê ngăn mâu kong pơlê, ing mê rế hía rế tŏng kum tơdroăng ki xơpá, tơvâ tơvân tung pơla pêi cheăng, pro tơ’lêi hlâu vâ Hô̆i đong hnê ngăn ai tơdroăng ngăn, hbrâ rơnáu, kơhnâ, mơdêk tro tâ nếo hnoăng cheăng dêi kơ koan ai hnoăng pơkuâ rơdêi dêi tơnêi têa teăng mâ ăm hiâm mơno, tơdroăng loi tơngah, hnoăng pro xiâm dêi Kuăn pơlê a kong pơlê.

Teăng mâ kăn pơkuâ Kuô̆k hô̆i, tơpui a Leh tơbâ, pôa Trần Thanh Mẫn, kăn xiâm phŏ hnê ngăn Kuô̆k hô̆i tối nhên, Đảng pin hiăng mơnhên: “Kăn ƀô̆ cho ngế ki pơkâ tơdroăng cheăng ki ƀlêi chiâng dêi kăch măng, tơtro ƀă ivá hnoăng cheăng dêi Đảng, dêi tơnêi têa ƀă tơdroăng pơkâ, cho tơdroăng ki kal tung hnoăng cheăng mơjiâng Đảng”.

‘Na tơdroăng pơkâ tro dêi kăn Kuô̆k hô̆i, Kăn xiâm hnê ngăn tơnêi têa Hồ Chí Minh hiăng tối nhên mê cho: “Kuô̆k hô̆i athế ai mâu kăn ki tơxâng khât, mâu kăn ki môi hiâm mơno kum Tơnêi têa, kum kuăn pơlê ƀă kum chuh ngiah xah hô̆i”.

Xua mê, hlo tơdroăng pơkâ thế pơtối hơ’lêh nếo tơdroăng cheăng dêi Kuô̆k hô̆i, pôa Trần Thanh Mẫn, Kăn xiâm phŏ hnê ngăn Kuô̆k hô̆i pơkâ thế Khu Pêi tơdroăng cheăng mâu kăn 5 tơdroăng ki kal xiâm. Tung mê, tơkŭm hriăn ngăn mâu tơdroăng ki nếo, hbrâ rơnáu tí tăng ‘nâi plĕng, rĕng châ hlo mâu tơdroăng ki nếo, teăm pơkâ mơ’no ăm Đảng đoân Kuô̆k hô̆i, Vi ƀan pơkuâ Kuô̆k hô̆i tung tơdroăng ki séa ngăn khu tơrŭm, khu pơkuâ kơ koan tơnêi têa, mâu ngế cheăng dêi Kuô̆k hô̆i, pơtối mơhno hnoăng cheăng ki xiâm dêi mâu kăn Kuô̆k hô̆i tung tơdroăng cheăng dêi Kuô̆k hô̆i.

Tí tăng ‘nâi plĕng, pâ thế hơ’lêh nếo khu tơrŭm pơkuâ kơ koan tơnêi têa, mơdêk tơƀrê tơdroăng cheăng dêi Hô̆i đong hdroâng kuăn ngo, mâu Vi ƀan dêi Kuô̆k hô̆i, mâu kơ koan ối tung Vi ƀan pơkuâ Kuô̆k hô̆i. Kố cho tơdroăng vâ tí tăng ‘nâi plĕng ăm Khu xiâm pơkuâ tơdroăng kal kí, Khu kăn pơkuâ hnê ngăn Đảng mơnhên túa pơkâ, tơdroăng cheăng pêi dêi Kuô̆k hô̆i ƀă pơkâ mơ’no mâu rơkong pâ thế tung Tơdroăng pơkâ hnê mơhno pôk kăn Kuô̆k hô̆i hneăng 16, kăn Hô̆i đong hnê ngăn kuăn pơlê mâu hneăng hơnăm 2026 – 2031.

Pôa Trần Thanh Mẫn, kăn xiâm phŏ hnê ngăn Kuô̆k hô̆i tối:

“Tơtrŏng hnoăng cheăng pơkâ mâu kăn Kuô̆k hô̆i vâ cho khât ‘na tơdroăng ki tơbleăng mâu ngế ki kơhnâ rơkê ‘na hiâm mơno, túa rêh ối ƀă ivá cheăng, tŭm tơdroăng pơkâ tiô pơkâ dêi Đảng ƀă luât, veăng pro ăm mâu kăn Kuô̆k hô̆i; hơ’lêh nếo hnoăng cheăng hnê tơ’nôm mâu kăn Kuô̆k hô̆i tiô túa ki rơkê tro, ai pơxúa, kum mơdêk ki rơkê, tơƀrê tung tơdroăng cheăng dêi kăn Kuô̆k hô̆i. Tí tăng ‘nâi plĕng tro khât mâu tơdroăng ki ai tơdjâk troh tơdroăng cheăng ‘na troăng hơlâ séa ngăn dêi kuăn pơlê ƀă túa pơkâ, tơdroăng pơkâ mơnhên tối kăn Kuô̆k hô̆i; rak vế tơniăn mâu tơdroăng pro tơ’lêi hlâu ăm kăn Kuô̆k hô̆i pêi pro tro hnoăng cheăng dêi tơná. Hbrâ rơnáu ăm rôh tâ phĭu pôk kăn Kuô̆k hô̆i hneăng 16, kăn Hô̆i đong hnê ngăn rêm râ hơnăm 2026 – 2031 rĕng má môi,sap ing hngế”.

Pôa Trần Thanh Mẫn, Kăn xiâm phŏ hnê ngăn Kuô̆k hô̆i pơkâ thế, Khu Pêi cheăng mâu kăn athế tơtrŏng troh mâu tơdroăng pơkâ pêi pro nhên dêi Kăn xiâm hnê ngăn Kuô̆k hô̆i cho pôa Vương Đình Huệ, athế đi đo tí tăng, hriăn ngăn nhên mâu tơdroăng pơkâ dêi Đảng, Tơnêi têa ‘na hnoăng cheăng tơrŭm kăn ƀô̆ vâ tí tăng ‘nâi plĕng ăm krá, ăm tro, ăm teăm tơdrêng. Pakĭng mê, Khu Pêi cheăng mâu kăn kal hbrâ rơnáu tâ tung tơdroăng, tung tí tăng ‘nâi plĕng rơkong tơpui tối dêi mâu khu râ mơjiâng Đảng, mâu Khu xiâm, kơvâ cheăng ƀă tơrŭm krá tơniăn ƀă mâu kơ koan ối tung Vi ƀan pơkuâ Kuô̆k hô̆i, Hô̆i đong hnê ngăn mâu kong pơlê, pơlê kong kân ối tung tơnêi têa.