Rế vâ chê Têt Lo hơnăm nếo Qúy Mão 2023, mâu khu râ, kơvâ cheăng a kong pơlê Dak Lak thăm rế pêi pro rế thâ vâ hbrâ ăm Leh mơđah Kơphế Ƀuôn Ma Thuột roh má 8. Ƀă Khu xiâm tơrŭm pêi pêt kơphế Ƀuôn Ma Thuột tối, ki xiâm dêi rêm tơdroăng cheăng cho hbrâ ăm Hneăng tơ’noăng bro kơphế ôu cho tơmeăm ki kơnía git dêi Việt Nam, kô châ tơkŭm po roh apoăng. Tiô pôa Lê Đức Huy, Kăn phŏ hnê ngăn khu tơrŭm pêi pêt kơphế Ƀuôn Ma Thuột tối, pôa loi tơngah khât hneăng tơ’noăng a la ngiâ kố ah kô châ po chiâng ƀlêi chiâng, xua khu kố hiăng ai hên roh ki pêi pro ƀă ki rơkê plĕng ing mâu hneăng tơ’noăng bro kơphế ki xú hŏm, tơ’noăng kơ-óu kơphế, châ tơkŭm po đi đo sap ing hơnăm 2018 troh nôkố.

Pôa Huy vêh mơnhên tối, mâu hneăng tơ’noăng cho roh ki vâ xah hêi dêi pơlê pơla ki pêi pêt kơphế ki xú hŏm lĕm dêi Việt Nam, vâ veăng phiu ro ăm tơdroăng ‘no liăn ăm kơphế ai plâi dâi lĕm, tơdrêng amê, xuân cho túa ki vâ hnê pât ăm khu pêi cheăng, hlê plĕng nhên ahdrối roh ki tơ’lêi hlâu ki nếo drêng Tây Nguyên pơkâ pêi pro tơdroăng pơkâ kơxô̆ 23 dêi Khu xiâm ngăn ‘na cheăng kal kí:

“Pakĭng kuăn pơlê pêi chiâk mê kal ai mâu ngế ki rơkê pêi cheăng, hlê plĕng nhên khât, vâ thăm mơdêk ki kơnía dêi kơphế pơ’leăng dêi Việt Nam chiâng kơphế ki kơ-óu ki xiâm a Việt Nam. La ngiâ kố ah, kô ối rơkê luâ tâ ki mê, kô ai mâu troăng hơlâ ki tơtro khât drêng mơ’no liăn kum a Ƀuôn Ma Thuột. Tiah mê, ƀă mâu tơdroăng ki pêi pro kố, pói tơngah pin kô ai mâu khu ngế ki rơkê kơ-óu má môi ki ƀĕng ƀeăn khât. Vâi ki mê kô khên mơ’no dêi liăn hên tâ tung tơdroăng kơ-óu kơphế, mơjiâng pro a Việt Nam ƀă a kong pơlê Dak Lak ƀă pơlê kong kơdrâm Ƀuôn Ma Thuột”.

Cho kăn xiâm, Kăn pơkuâ hnê ngăn Chi ƀô̆ môi khu mơdró kâ tơlo liăn cheăng kâ ai tối, veăng pêi pro ing pêi pêt, rak ngăn, krí, ‘măn, tê mơdró kơphế, plâi kâ, pôa Nguyễn Xuân Lợi, Kŏng ti tơlo liăn cheăng tiô rơnó Mơnhông An Thái, kong pơlê Dak Lak thăm rế tŏng kum hên troh tơdroăng Pơkâ kơxô̆ 23. Pôa tối ăm ‘nâi, ki xiâm dêi tơdroăng mơnhông pêi cheăng kâ ki tơ’lêi hlâu, châ pêi pro đi đo ăm Tây Nguyên mê tơdroăng pơkâ ki tối mê cho tơtro khât, ƀă tơná An Thái xuân dế mơnhông tro tiô túa ki nếo kố, ƀă hngêi kơmăi ki uâ mơdiê kơphế 40 rơpâu tâ̆n tung 1 hơnăm; tâi tâng kơtôu, kơdrêa kơphế klêi kơ’nâi uâ mơdiê pơrá chiâng vâ mơjiâng pro phon ki dâi lĕm. Maluâ ti mê, vâ ai môi túa pêi cheăng kâ ki tơ’lêi hlâu, châ chiâng pêi pro đi đo ăm tâi tâng Tây Nguyên, ai môi tơdroăng ki kân kal vâ châ tŏng kum, pôa Thái tối ăm ‘nâi, kal ai tơdroăng ki môi hiâm mơno dêi khu kăn pơkuâ, kuăn pơlê ƀă khu mơdró kâ:

“Kố cho roh ki tơ’lêi hlâu, tơniăn lĕm. Peăng khu mơdró mê ngin athế hriăn plĕng nhên Tơdroăng pơkâ ki mê hôm ai pơxúa ki klâi ha, hôm ai tơdroăng ki klâi vâ pêi pro tung pơla iâ hâi, ki klâi ki pêi ton xŏn la ngiâ vâ ga tơxâng ƀă tơdroăng pơkâ ki mê ‘na khu mơdró kâ dêi tơná pin, pin ai troăng hơlâ ki lâi mê mơni kô xúa pêi pro tơdrêng hlối, mê tơná khu mơdró athế hlê plĕng nhên mâu tơdroăng ki tơ’lêi, ki xahpá ƀă tơdroăng pơloăng mơnúa drêng mâu khu mơdró kâ Tây Nguyên xúa tơdroăng Pơkâ kơxô̆ 23 kố. Athế kal ‘nâi nhên hnoăng pơkuâ ngăn tơnêi têa mơjiâng chiâng túa cheăng ki tơtro, tơ’lêi hlâu vâ kum ăm mâu khu mơdró kâ, kơdroh tơdroăng ki tơvâ tơvân”.

Hơnăm 2023, hơnăm apoăng mâu kong pơlê a Tây Nguyên pơkâ mơ’no pêi pro tơdroăng kơxô̆ 23 dêi Khu xiâm ngăn cheăng kal kí, châ mơnhông ing tơdroăng pêi cheăng kâ, pơlê pơla ki tơ’lêi hlâu, drêng tơdroăng pêi cheăng kâ dêi mâu kong pơlê châ mơdêk sap ing 7,6 troh lối 12%, tâk hên tâ hên tâng vâ pơchông ƀă kơlo 7 troh 7,5% ki Tơdroăng pơkâ kơxô̆ 23 hiăng mơ’no tối ăm hneăng ki nếo troh a hơnăm 2030 ah. Maluâ ti mê, mâu kong pơlê kơpong Tây Nguyên xuân hiăng mơnhên tối mâu tơdroăng ki ối ‘ro. Thăm nếo ƀă kong pơlê Lâm Đồng, cho kong pơlê ki pêi châ kơlo ki luâ tâ 12%, hên má môi kơpong Tây Nguyên, la xuân u ối mâu tơdroăng ki ối ‘ro, ki má lối cho tung pơkuâ ngăn ƀă ‘mâi hơ’lêh mâu hlá mơ-eá. Tiô pôa Trần Đức Quận, Kăn pơkuâ hnê ngăn Đảng, Kăn hnê ngăn Hô̆i đong kong pơlê Lâm Đồng, mâu tơdroăng ki kal hôm dêi kong pơlê hiăng châ pơtối châ rak vế đi đo hên hơnăm. Tâng ôh tá rĕng vâ ‘mâi rơnêu, Lâm Đồng pá vâ rak vế, pêi pro tro tiô mâu hnoăng cheăng ki kân, ki hiăng châ mơ’no tối tung tơdroăng pơkâ kơxô̆ 23:

“Tiô tơdroăng ăm ‘nâi hdrối, kô ối trâm hên tơdroăng ki pá puât, pơloăng mơnúa xuân môi tiah tơdroăng ki ối ‘ro, ki tá hâi teăm kâi chiâng pêi pro tung rêm kơvâ cheăng, rêm kơlo cheăng, maluâ cho kơdroh mâu tơdroăng tung pơkuâ ngăn, hnê mơhno, pơkâ tơdjâ dêi mâu khu râ, kơvâ cheăng, mâu kong pơlê, tơring, cheăm mê tơdroăng ki tơvâ mê xuân ối toi tơdjâk ton hên hơnăm. Tơdjâk ki ôh tá xê iâ troh a hnoăng cheăng mơnhông pêi cheăng kâ, rêh ối pơlê pơla dêi kong pơlê xuân môi tiah tơdroăng pêi chiâk pêi deăng, tê mơdró ƀă tơdroăng rêh ối dêi kuăn pơlê.  Mê cho mâu kơlo ki ối pro tơvâ tơvân, ki ối ‘ro mê pin athế ngăn nhên, hlo nhên, séa mơnhên ngăn tro tơdroăng, tro tiô hiâm mơno hên ngế ƀă mơjiâng troăng prôk ki tơtro tâ vâ pơtối pêi pro kêi hnoăng cheăng tung hơnăm 2023”.

Vâ pêi pro tro tiô Tơdroăng pơkâ 23 dêi Khu xiâm ngăn cheăng kal kí, mơnhông Tây Nguyên rĕng ƀă krá tơniăn, tơtro tá tơdroăng pêi chiâk deăng-pêt loăng mơjiâng kong, on tơhrrik tơniăn, tơdroăng ôm hyô, cheăng kơmăi kơmok, mê Chin phuh hiăng tối tơbleăng mơ’no pro 9 tơdroăng tơkêa bro troăng prôk ki kân má môi. Tơdrêng ƀă tơdroăng tơkêa bro ki hiăng châ chêh, kĭ a mâu hơnăm hdrối mê hía nah, Tây Nguyên ai 11 tơdroăng tơkêa bro, mơjiâng pro 11 troăng prôk tơdjêp ƀă mâu kơpong tung kong pơlê ƀă mâu kong pơlê ki ê, tâi tâng kơxô̆ liăn ki mơ’no pêi pro mê ai dâng 180 rơpâu rơtal liăn.

Kố cho ki xiâm kal kân khât, cho roh ki tơ’lêi hlâu ăm Tây Nguyên la xuân cho tơdroăng ki pơloăng mơnúa kân khât, xua dế ai hên tơdroăng tơkêa bro, mơ’no liăn cheăng a Tây Nguyên tro tơ’nôm thăm liăn ngân, hrá pêi pro klêi, lơ pêi pro ôh tá hâi rơhéa. Xua ti mê, tiô pôa Lê Đình Trung, Kăn pơkuâ hnê ngăn Đảng kong pơlê Dak Lak tối, vâ tơdroăng pơkâ kơxô̆ 23 păng ‘nâng chiâng ivá ki rơdêi mơnhông ăm roh mê hía ah, kong pơlê tơkêa kô thăm mơdêk hnoăng cheăng, rak vế tơrŭm cheăng krá tơniăn ăm mâu khu râ, kơvâ cheăng dêi mâu râ, mâu khu tung kong pơlê:

“Kong pơlê Dak Lak tơkêa kô thăm mơdêk hên tâ nếo ivá mơno, pôu râng hnoăng cheăng hngăm tâ, mơjiâng chiâng tơdroăng ki môi tuăn tung pêi pro hnoăng cheăng; mơnhên tối hnoăng cheăng dêi tơrêm kơ koan, rêm khu pêi cheăng vâ pêi pro tro tiô pơkâ. Hbrâ rơnáu kơtăng khât tung pơkâ mơ’no, rak vế, pêi pro mâu hnoăng cheăng dêi kong pơlê, tơring, cheăm. Kong pơlê xuân hnê mơhno tối nhên, trâu rơdâ, mơjiâng chiâng tơdroăng ki tơrŭm môi tuăn má môi tung rêm khu râ, kơvâ cheăng dêi mâu khâu ‘na tơdroăng ki kal rĕng pêi pro thâ tung mơdêk Khu pêi cheăng tơrŭm, tơdjêp, tơkoh tung pơla mâu khu râ, mơjiâng chiâng mâu tơdroăng ki môi tuăn tung pơkâ, tơleăng, mơnhên, tŏng kum, thăm mơdêk tơdroăng ki tơbriât tê mơdró kâ, pơtối mơnhông ó má môi tung pêi pro dêi hnoăng cheăng tơná”.

Hơnăm nếo 2023 troh ƀă Tây Nguyên rơtế ƀă tơdroăng pơkâ kơxô̆ 23, cho môi tơdroăng ki pơcháu ăm hnoăng cheăng ki kân châ tơ’lêi hlâu ăm Tây Nguyên la xuân cho hnoăng cheăng ki pơloăng mơnúa kân ƀă pá puih. Vâ khoh pêi pro kêi mâu hnoăng cheăng ki kân mê, kal păng ‘nâng troh mâu tơdroăng tơkêa pêi, pôu râng hnoăng cheăng kân tâ nếo dêi Khu pơkuâ hnê ngăn Đảng, khu hnê ngăn mâu kong pơlê, tơring, cheăm a Tây Nguyên rơtế tá tơdroăng veăng tơdjuôm ivá mơno dêi kuăn pơlê ƀă khu râ mơdró kâ. Thăm mơdêk hnoăng cheăng, teăm pêi tơdrêng vâ tah lôi mâu tơdroăng ki ối tơvâ tơvân, ƀă hnoăng cheăng ki kơdo mơ-eăm dêi tơná ƀă tơdroăng ki mơ’no liăn hên má môi dêi Chin phuh, Tây Nguyên kô pói tơngah châ mơjiâng kêi đeăng dêi kơpong kố cho tơtêk kro mơdrŏng dêi tơnêi têa, tro tiô tơdroăng pơkâ dêi tíu xiâm tơnêi têa hiăng pơkâ mơ’no.