A koxê lơ 20/2, veăng ăm rơkong tơpui ‘na kơxop hlá mơéa Luât tơnêi tơníu ki ‘mâi pơ’lêh, mâu ngế ki tơrŭm cheăng tung Hô̆i đong tiâ mơnhên tơniăn krê ƀă luât, mâu khu ki rơkê, khu ki hriăn ‘na khoa hok dêi Vi ƀan pơkuâ xiâm Măt trâ̆n Tơnêi têa Việt Nam pơkâ thế pêi pro nhên tơdroăng ki xo tơvêh tơnêi vâ mơnhông cheăng kâ rêh ối pơlê pơla xua ki pơxúa dêi tơnêi têa, pơlê pơla, tơdrêng a mê hlối athế rak vế ki pơxúa ƀă ngế ki tro xo tơvêh tơnêi. Tiô mâu kăn tối, ki khât tung tơdroăng ki xo tơvêh tơnêi gá xơpá, ối ai mâu tơdroăng chiâng tơdjâk troh mâu rôh ki pơsăm tối ôh tá tơniăn, kơdrâm mơngế, xua tá hâi ai tŭm túa pơkâ luât, lơ ối ai tơdroăng ki tá hâi hlê plĕng ‘na luât, tơdroăng ki tơrŭm tá hâi tơdâng tơ’mô tung khu pơkuâ tơdroăng kal kí a rêm râ.

Xua mê, túa pơkâ, hlá mơ-éa chêl thiê̆n, tŏng kum, vêh pro pơlê, xo tơvêh tơnêi ối kal ai túa pơkâ rak vế tơdroăng pơkâ: rak tơniăn, tơbleăng tơdrăng, tro ƀă pôu râng dêi hnoăng tơpui tối leăng, rak vế ki pơxúa tơnêi, khu mơdró kâ ƀă kuăn pơlê; Hên rơkong tơpui tối pâ thế hên mâu tơdroăng ki chêl thiê̆n; yă tơnêi ki chêl thiê̆n tiô yă pơkâ; klâ pro tơdrăng mâu tơdroăng ki chêl thiê̆n, mâu kơxô̆ liăn tŏng kum; hnoăng cheăng chêl thiê̆n, tŏng kum, vêh pro pơlê athế prôk hdrối môi hvêa chêng drêng pơkâ xo tơvêh tơnêi.