Troăng prôk vâ mot a ƀuôn Bhôk, cheăm Yang Tao, tơring Lak krúa lĕm, péa pâ  vâi ai troăng pêt reăng. A kơxêi măng, ai on trâ eăng drô troăng pơlê thăm pro lĕm ăm ƀuôn Bhôk. Tơdroăng rêh ối dêi kuăn pơlê tung pơlê chôa ‘lâng mơnhông tơƀrê, rơpŏng kơtiê a hơnăm 2022 xăm 9  rơpŏng tâng vâ pơchông ƀă hơnăm 2021.

Tiô ngoh Y Al Trêi, kăn phŏ hnê ngăn Đảng chi ƀô̆, ngế pơkuâ ƀuôn Bhôk, tâi tâng mâu tơdroăng ki pơ’lêh mê ki khât sap ai Pơkâ 02 ƀă tơdroăng pơkâ 05 dêi Đảng ƀô̆ tơring Lak tơtro ƀă tơdroăng púi vâ dêi kuăn pơlê:

“Pin krếo kuăn pơlê hôp hnê tối kuăn pơlê pêi tơdroăng cheăng, túa pêi dêi tơdroăng Pơkâ kơxô̆ 2 cho ki klâi, klêi mê pơkâ 05 cho túa klâi, xua tơdroăng Pơkâ 02 ga cho ti kố troăng prôk ai on trâ eăn g ƀă péa pâ troăng kuăn pơlê pêt reăng, ƀă tơdroăng Pơkâ 05 hnê kuăn pơlê pêi plâi kâ ki lâi, păn kơpôu, cho ki klâi.

Klêi hôp hnê tối péa, pái hdrôh ti mê, pin lăm hnê tơrêm to hngêi ƀă pin hnê ƀăng kŏng ngê̆  ing facebook, ing Zalo vâ kuăn pơlê ‘nâi nhên tâ’’.

Tơdroăng pơkâ 02 ƀă tơdroăng pơkâ 05 dêi Khu râ Đảng ƀô̆ tơring Lăk hneăng hơnăm 2020-2025 dế châ tơbleăng pêi tơdrêng a mâu cheăm tung lâp tơring Lăk chiâng kơpong ôm hyô ki xiâm dêi kong pơlê tung hơnăm 2030. Tơdroăng pơkâ 05 ‘na tơdroăng pêi pro hơ’lêh tơdroăng pêt loăng plâi, păn mơnăn pơla hơnăm 2021-2025. Pêi pro 2 tơdroăng Pơkâ kố, ƀuôn Bhôk hiăng tơbleăng pêi lối 2.500m troăng on tơhrik bâ eăng, pêt 325 reăng  giấy pa kĭng troăng xiâm a pơlê. Tâi tâng ki pơxúa 2 tơmeăm khoăng mê vâ chê 40 rơtuh liăn xua kuăn pơlê ‘no hnoăng. Ƀuôn Bhôk xuân châ vâ chê 1.000 hdrê xiâm loăng plâi tŭm túa kum rơpŏng hngêi mơdâ pêt.

Nâ H’Nguyệt Ha trơi, a ƀuôn Bhôk, ăm ‘nâi, ôh tá xê ăm to hdrê pêt, mâu kăn ƀô̆ hnê mơhnhôk pêi chiâk ối lăm troh a kơdrum hnê pêt ƀă rak ngăn vâ pêi lo liăn:

“Á pâ mơnê Đảng, tơnêi têa hiăng kum rơpŏng hngêi hdrê pêt. Kăn pơlê xuân tơmâng khât troh rơpŏng hngêi á. Á kô mơ-eăm rak ngăn vâ loăng plâi xông kân lĕm vâ xo ah hmôi pêi lo liăn vâ ai liăn xúa rêh kâ ối’’.

Tiô pôa Nguyễn Văn Huyên, Kăn hnê ngăn Đảng ủy cheăm Yang Tao, tơring Lăk, vâ mâu troăng rơhlâ dêi Đảng prôk tung rêh ối, ki kal má môi xuân cho kăn ƀô̆. Malối ƀă kơpong hdrông kuăn ngo, tâng kăn ƀô̆ hlê pơlê cheăm, a chê kuăn pơlê, rơkê ƀĕng, ‘nâi hriăn plĕng kô veăng kum rĕng djâ tơdroăng Pơkâ dêi Đảng troh ƀă kuăn pơlê.

“Nôkố mâu đảng viên hơnăm ối nếo môi tiah Y Al Trei xuân cho kăn thôn. Tung pơla tí tăng ‘nâi plĕng pôa mê ngăn pêi cheăng tơdroăng cheăng đi đo pơtối rak vế pêi hnoăng cheăng ƀă xuân pêi tro mâu tơdroăng cheăng a pơlê. Hdrối nah pêi pro tiô Pơkâ 05 bbă tơdroăng pơkâ 02, tơkŭm 2 tơdroăng pơkâ kô lăm troh a mâu kăn thôn pơlê ƀă chi ƀô̆ hnê mơhno ƀă mơhnhôk tâi tâng mâu tơdroăng ăm thôn pơlê mơhnhôk kuăn pơlê veăng tơlo liăn vâ pêt reăng klêi mê troăng on tơhrik bâ eăng. Hdrối kố nah ƀuôn Bhôk chiâng pro troăng on tơhrik bâ eăng ăm kuăn pơlê ‘’.

Mâu đảng viên mơngế kuăn ngo rơkê ƀeăn môi tiah ngoh Y Al Trei dế ‘no hnoăng ki kal hnê tối, mơhno troăng rơhlâ dêi Đảng, luât Tơnêi têa troh ƀă kuăn pơlê, choâng ‘lâng kum kuăn pơlê pơ’lêh ing tơdroăng tơmiât troh pêi pro vâ mơjiâng tơdroăng rêh ối rêm hâi rế ton tế lĕm tâ.