Tiô tơdroăng ăm ‘nâi ing Grup ngăn On tơhrik Việt Nam (EVN), Grup kố hiăng ai Pơkâ kơxô̆ 377 ‘na tơdroăng ‘mâi hơ’lêh kơlo yă tê ‘ngré on tơhrik tâng riân tơdjuôm. Ing mê, sap hâi lơ 4/5/2023, yă tê ‘ngré on tơhrik tâng riân tơdjuôm 1,920 liăn/kWh (hâi riân tá kơxô̆ liăn pro hnoăng mơhá tơ’nôm). Kơlo ‘mâi hơ’lêh tâk 3% tâng vâ pơchông ƀă yă on tơhrik nôkố.

Hdrối mê, hâi lơ 31/3, Khu xiâm ngăn tê mơdró hiăng tơbleăng tơdroăng hiăng tí tăng ngăn kơxô̆ liăn ‘no hrê xúa tung pêi cheăng tê mơdró on tơhrik hơnăm 2021 ƀă hơnăm 2022 dêi EVN, ăm hlo, yă pêi pro tê mơdró on tơhrik hơnăm 2022 ai 2.32 liăn/kWh, tâk 90% tâng vâ pơchông ƀă hơnăm hdrối.

Khu xiâm ngăn tê mơdró hiăng pơtroh hlá mơ-éa hnê EVN pêi pro ‘mâi hơ’lêh yă tê ‘ngré on tơhrik tiô hnê mơhno dêi Ngế xiâm cheăng tung Chin phuh, vâ tơniăn tơdroăng pơkâ yă on tơhrik oh tá ăm kơdrâ hên, ai pơkâ troăng vâ pêi, tơniăn kal kí ƀă tơniăn tung rêh ối, tơtro pơxúa pơla khu mơdró ƀă kuăn pơlê.