A cheăm Ia Krel, kong pơlê Gia Lai, Ƀinh đoân 15 (Khu xiâm pơkuâ lêng) nếo tơkŭm po phiu ro hiăng mơjiâng pro kêi đeăng ƀă pơcháu Hngêi trung Mâm non Sao Mai diâp cô ƀă hok tro cheăm Ia Krel, kong pơlê Gia Lai. Kố cho môi tung mâu tơmeăm châ Khu xiâm pơkuâ gâk kring tơnêi têa ƀă mâu khu tê mơdró khu lêng pêi pro a kơpong tơkăng kong. A kong pơlê Gia Lai, tơmeăm châ pơcháu ăm Ƀinh đoân 15 po rơdâ pêi pro tung pơla 5 khế. Tơmeăm mê cho hên tơmeăm môi tiah: Hngêi pêi cheăng dêi thái cô pơkuâ hngêi trung 231 met karê; 2 khô̆i lâm hriâm tâp tâng ƀăng lối 800 met karê mê cho 5 kơbong hriâm: hngêi hơpiâp on, kơpong hnê hriâm ivá, plông xah hêi, gara...tơxâng tơdroăng kal vâ hriâm tâp ăm lối 300 vâi hdrêng mâm non a 24 pơlê ối tung mâu cheăm tơkăng kong a peăng mâ hâi Luô Gia Lai.

Đăi tă Khuất Bá Cao, Kăn pơkuâ hnê ngăn Đảng ŭy, Phŏ Kăn pơkuâ lêng Ƀinh đoân 15, tối ăm ‘nâi: tơdroăng phiu ro hiăng mơjiâng pro kêi đeăng Hngêi trung Mâm non Sao Mai gum tơxâng tơdroăng kal vâ hnê hriâm dêi mâu vâi o kăn ƀô̆, mâu lêng, mơngế pêi cheăng ƀă kuăn pơlê, mơjiâng xiâm kối ăm mơnhông mơdêk krá tơniăn dêi kơpong tơkăng kong. Ƀinh đoân 15 pói vâ cheăm, bêng, hngêi trung kô rơtế Ƀinh đoân mơnhông krá tơniăn dêi hngêi trung.

‘’Tung la ngiâ, Ƀinh đoân 15 kô pơtối tơrŭm ƀă khu râ kăn pơkuâ cheăm ƀă Khu cheăng kâ – Gâk kring tơnêi têa 75 tung pơkuâ xúa tơmeăm tro tơdroăng, châ tơƀrê, krá tơniăn; tŏng gum rơnêu drêng kal khât; tơdjuôm ivá rak plông hngêi trung ngiêt   - kruá – lĕm, mơjiâng tơ’lêi hlâu vâ mâu muăn châ hriâm tâp, pơtâp tung hngêi trung lĕm tro má môi’’.

 Veăng leh phiu ro hiăng mơjiâng pro klêi hngêi trung, krâ pơlê Rah Lan Vọng – pơlê Ngol Le, cheăm Ia Krel, kong pơlê Gia Lai phiu ro tối ăm ‘nâi Hngêi trung Mâm non Sao Mai kum rak ngăn, hnê hriâm vâi hdrêng a kơpong tơkăng kong lĕm tro tâ, vâ kuăn pơlê hmiên tuăn pêi cheăng kâ, pêt mơjiâng tơmeăm, rak krá tơniăn tung pơlê:

‘’Hngêi trung kân lĕm rơdâ, kruá, lĕm, kuăn cháu ngin châ hriâm tơniăn tơtro lĕm, troh tui lui, la ngiâ xông kân kô gum mơjiâng tơnêi têa. Ngin phiu ro ƀă loi tơngah a Đảng ƀă Tơnêi têa’’.

A cheăm tơring tơkăng kong Đức Cơ, kong pơlê Gia Lai, Hngêi trung Mâm non 18-4 (ối tung Kŏng ti 72, Ƀinh đoân 15) pro kân ƀă 18 tíu hngêi trung drô tung 5 cheăm. Nôkố hngêi trung ai lối 1.000 muăn ối kŭn păn rak a hngêi ngăn vâi hdrêng ƀă mâuh yăo troh lâm, tung mê 1/3 cho kuăn ‘nĕng hdroâng kuăn ngo. Tâi tâng mâu muăn pơrá kâ koi pơtê kơhâi dế a hngêi trung. Krê mâu muăn mơngế hdroâng kuăn ngo ôh tá nâp kơxô̆ liăn ôh drêng troh hriâm. Pakĭng mê, Kŏng ti 72 ối tŏng gum rêm ngế muăn 8.000 liăn kâ rêm hâi. Kŏng ti xuân mung rơxế pơto mâu muăn lăm hriâm rêm hâi.

A cheăm tơkăng kong Mô Rai (kong pơlê Quảng Ngãi), Kŏng ti Ƀinh đoân 78 (Ƀinh đoân 15) xuân mơ’no liăn mơjiâng hngêi trung mâm non kân krip, kế tơmeăm khoăng, kế xúa hriâm tâp tŭm. Vâ pro tơ’lêi hlâu ăm mâu rơpŏng kuăn pơlê, mơngế pêi cheăng ai kuăn ối kŭn to a chiâk deăng kơxu vâ kúa chá, tâi tâng 11 tíu hngêi trung xua Kŏng ti mơjiâng pơrá tơkŭm po tơdah mâu muăn ing kơxo má. A rêm hngêi trung, Kăn pơkuâ hngêi trung rah péa ngế cô yăo teăng dêi pó vâ tơdah mâu muăn troh hriâm a lâm.

Đăi tă Khuất Bá Cao, Kăn pơkuâ Đảng ŭy, Phŏ Kăn pơkuâ lêng Ƀinh đoân 15 tối ăm ‘nâi: ‘’ Ƀă troăng tơmiêt tơkŭm mơngế mơjiâng tíu hriâm tâp lĕm má môi ăm mâu muăn troh a lâm, Ƀinh đoân 15 hiăng mơjiâng 9 hngêi trung mâm non, 2 hngêi roăng vâi hdrêng, 130 tíu hngêi trung tung tơkăng kong Tây Nguyên. Tơdâng rêm hơnăm mâu hngêi trung tơdah, păn, rak ngăn lối 4.500 ngế muăn, tung mê lối 2/3 cho kuăn ‘nĕng hdroâng kuăn ngo. Rơtế ƀă tơdroăng tơkŭm mơdêk ki dâi lĕm hnê hriâm, khu kăn ƀô̆ pơkuâ, thái cô, nhân viên a mâu hngêi trung mâm non dêi Ƀinh đoân 15 ối thăm pơtâng tối, mơhnhôk kuăn ‘nĕng mơngế hdroâng kuăn ngo tung pơlê cheăm troh hngêi trung. Tơdroăng mơ-eăm, tá hiêm mơno, pôu râng hnoăng cheăng dêi kăn ƀô̆ Ƀinh đoân 15 hiăng tah lôi mâu tơdroăng ki mơdât, pá puât vâ rak ngăn ăm vâi hdrêng kuăn ‘nĕng mâu hdroâng kuăn ngo a kơpong tơkăng kong./.