Hngêi trung mauh yăo Gia Bắc, cheăm Sơn Điền, kong pơlê Lâm Đồng ai 7 to lâm ƀă 230 ngế hok tro sap ing 25 khế troh 6 hơnăm ƀă 98% cho kuăn 'nĕng hdroâng kuăn ngo K'Ho Nộp. Klêi kơ'nâi 2 măng tĭng pơxiâm mot hơnăm hriâm cheăng rak ngăn tơdroăng kâ hmê ăm hok tro hiăng châ hngêi trung pêi pro tro tiô pơkâ. Khu pơkuâ ngăn Hngêi trung mauh yăo Gia Bắc xuân hiăng mơjiâng châ hên tơdroăng tơrŭm cheăng vâ pơto chơ kế kâ rêm hâi ing tíu xiâm Di Linh troh hngêi trung rak tơniăn dâi lĕm, mơhé kơtăn hơngế châ 35km.

Cô yăo Nguyễn Thị Tuyết Lan, Ngế pơkuâ Hngêi trung râ má môi Gia Bắc, ăm 'nâi, rơtế ƀă mâu tơmeăm khoăng krúa lĕm, tơmeăm xúa tung hnê hriâm châ rôe tơ'nôm hbrâ nhên, mâu rôh kâ hmê tơniăn lĕm cho tơdroăng tơhrâ dêi hngêi trung vâ tâi tâng nôu pâ hok tro hmiân tuăn pơtroh dêi kuăn ăm hngêi trung:

“Rak ngăn krâu má môi cho pế pơchên, rôh kâ hmê ăm mâu vâi muăn, mê ngin tơkŭm po rôh kâ hmê tiah rơpŏng hngêi lơ cho mâu rôh buffet. Mâu nôu pâ hlo dêi kuăn kâ châ hmê kơchâi tơniăn, châ mâu cô rak ngăn krâu ƀă mâu vâi muăn châ kâ, mơnhông mơdêk 5 kơvâ cheăng ing mâu môn hriâm mê mâu nôu pâ cho loi tơngah khât tơdroăng mơhriâm dêi kuăn ‘nĕng”.

A hngêi trung râ má môi - râ má péa Gia Bắc, 656 ngế hok tro klêi kơ'nâi mâu chôu hriâm a lâm ối châ veăng pêi pro hên tơdroăng pa kong, po rơdâ tơdroăng ki rơkê plĕng ing tíu 'măn rak hlá mơ-éa hngêi trung ƀă ai lối hrĭng kơxop hlá mơ-éa ki rơkê plĕng. Xua mê maluâ nếo luâ 2 măng tĭng klêi kơ’nâi mot tung hơnăm hriâm nếo, tơdroăng hriâm dêi mâu vâi o hok tro hiăng chiângu mot tung roh ki lĕm tro ƀă kơxô̆ ki hriâm kơhnâ hên. O Ka Mộng Diệu, hok tro lâm 5C, Hngêi trung râ má môi - râ má péa Gia Bắc, cheăm Sơn Điền, ăm 'nâi

“Á hâk vâ troh hngêi trung khât xua châ hriâm ƀă mâu vâi pú. Tơmeăm xúa tung hriâm tâp á ai tŭm tâi tâng. Tung lâm thái cô kum á hên 'nâng tung tơdroăng hriâm. Á hâk vâ má môi môn Toán ƀă môn Âm nhạc. Tơná á kô mơ-eăm tung hơnăm hriâm kố á kô chiâng hok tro ki rơkê”.

Hơnăm hriâm 2026- 2027 cheăm Sơn Điền ai 2 toăng hngêi trung mâm non, 1 to hngêi trung râ má môi ƀă 2 to hngêi trung râ má péa ƀă tâi tâng kơxô̆ 1.722 ngế hok tro, kơxô̆ hok tro hdroâng kuăn ngo châ lối 94%. Rơtế ƀă mâu troăng hơlâ dêi Đảng, Tơnêi têa ôh tá xo liăn hriâm, tŏng kum liăn hriâm, mâu vâi o hok tro a cheăm Sơn Điền ối châ tơdroăng tŏng kum dêi khu kăn pơkuâ, mâu khu tơrŭm cheăng pơlê pơla ƀă hên khu ki ai hiâm mơno hơ-ui tung kong pơlê ƀă kong pơlê ki ê.

Maluâ cho kơpong kơtiê xơpá la tâi tâng mâu hngêi trung a Sơn Điền pơrá lĕm krip. Mâu vâi o troh hngêi trung ƀă hmân ếo krúa lĕm, hiâm mơno hơniâp ro, sôk suâ. Pôa Vũ Đức Nhuần, Kăn hnê ngăn Vi ƀan cheăm Sơn Điền, tối nhên:

“Cheăm Sơn Điền cho cheăm ki xơpá la tơdroăng hnê mơhriâm cho athế ối tung khu ki chía rơkê dêi kong pơlê. Maluâ xơpá troh lâi xuân athế tơ'noăng hnê rơkê, hriâm rơkê môi tiah rơkong dêi Pôa Hồ Chí Minh ai tối. Hơnăm hriâm nếo mâu hngêi trung hiăng ai tơdroăng hbrâ rơnáu lĕm ƀă malối ƀă mâu thái cô xuân pơrá ai hiâm mơno nếo. Ngin hiăng pơcháu ăm Ƀơrô cheăng kâ kơjo kum mâu kơxô̆ liăn tŏng kum teăm tơdrêng ăm mâu hngêi trung tung tơdroăng ki nếo ai”.

Rơtế ƀă tơdroăng ki rĕng tơniăn tơdroăng hnê ƀă mơhriâm klêi kơ'nâi 2 măng tĭng pơxiâm po hơnăm hriâm nếo, Khu pơkuâ 5 toăng hngêi trung sap ing râ mầm non troh râ má péa a cheăm kơtiê xahpá Sơn Điền, kong pơlê Lâm Đồng xuân dế kơhnâ pêi pro troăng hơlâ pơ'lêh kơxô̆ tơkŭm tung tơdroăng xúa, xúa châ tơƀrê phần mềm pơkuâ hnê hriâm, tíu chêh 'măn mâu tơdroăng dêi kơvâ cheăng ƀă mâu tíu pêi cheăng kum pơkuâ, hnê hriâm.

Ƀă tơdroăng ki ôh tá tŭm hlá mơ-éa hriâm, malối ƀă khu lâm 9, thái Nguyễn Đình Tú, kăn pơkuâ hngêi trung râ má môi - râ má péa Gia Bắc, cheăm Sơn Điền, ăm 'nâi, tung pơla tơkôm hlá mơ-éa sap ing tíu ki hbru ăm, hngêi trung hbrâ pêi pro mâu troăng hơlâ vâ rak tơniăn tơdroăng hriâm dêi hok tro:

“Drêng hlá mơ-éa hriâm rôh má 1 châ pơtroh ing hngêi tê mơ-éa, hngêi trung hiăng xing xoăng tiô kơxô̆ dêi hok tro tung lâm. Pơtih môi khô̆i châ 100 kơxop hlá mơ-éa mê xing xoăng tơ'mô ăm hok tro. Má péa, cho xing xoăng hok tro rơtế ối môi kơƀăng ki iâ athế ai môi kơxop hlá mơ-éa hriâm vâ mâu vâi o xúa. Hngêi trung tơkŭm po mâu rôh hriâm tơkŭm vâ khoh châ xúa hlá mơ-éa hriâm”.

Ing mâu rôh kâ hmê châ tŏng gum tŭm têk, mâu lâm hriâm rế hía rế lĕm, troh tơdroăng ki kơhnâ dêi thái cô ƀă tơdroăng ki rơtế prôk dêi khu kăn pơkuâ, nôu pâ, pơlê pơla, tâi tâng dế veăng gum pro chiâng môi hơnăm hriâm nếo hên tơdroăng ki hơniâp ro a cheăm kơtiê xahpá Sơn Điền, kong pơlê Lâm Đồng. Ƀă tơdroăng khŏm mơ-eăm "cheăm xơpá la hnê hriâm thế rơkê", Sơn Điền dế chôa 'lâng pơhlêh tơdroăng tơmâng, 'no liăn chiâng tơdroăng ki ai khât tung rêm lâm hriâm, rêm rôh kâ hmê ƀă rêm hâi troh hngêi trung dêi hok tro.