A tíu mơđah tơbleăng ai hên on eăng bâ lĕm, mâu ngiâ méa ối kŭn eăng tung mâu plâ hmân ếo gum mơđah tơbleăng eăng blê nhêp.

Mơhé o tuăn ôh tá chiâng vâ tâng, mơhé vâi 'nĕng ôh tá khên vâ tơpui achê ƀă ngế ki tuăn ngôa hleăng lĕm, pơrá ai tơdroăng ki hơniâp ro tung Têt dêi vâi hdrêng. Pa rŏng mâu chôu phut ki hơniâp ro a tíu mơđah tơbleăng rơhdruê xuăng kố, cho hên hĭn tơdroăng ki hơ-ui pâ ƀă tơdroăng ki kơdo mơ-eăm dêi mâu cô yăo. Cô Phan Thị Lệ, cô hnê lâm veăng rĕng tơdroăng ki tâ rơrêk tung ihiâm mơno tối tiah kố:

“Xua mâu vâi o ôh tá chiâng tơmâng tơdrá nhak xua mê mâu cô thế pơtâp mâu tơdroăng ki xiâm kơ’nâi mê nếo ráp ƀă rơkong tơdroăng rơhdruê ƀă drêng ráp rơkong tơdroăng rơhdruê mê cô thế hnê mơhno ƀă nâl tơpui ing châ chăn vâ mâu vâ o pâ tơdroăng ki vâ pro ƀă pêi pro tiô tơdrá’’.

Ƀă mâu vâi hdrêng ki kơhnhon xuăng a tíu mơđah tơbleăng xuăng trung thu dêi Tíu xiâm Tŏng gum mơnhông hnê hriâm tơmot vâi hdrêng chó chêng tơvê kŏng kong pơlê Dak Lak, kơmăng kố xuân pêng păm tơdroăng ki sôk ro tiah vâi hdrêng. Mâu vâi o sâp hmân ếo nếo, châ rơnuâ lĕm, ƀă ki má lối cho châ hâk vâ, châ veăng tung hâi leh xah hêi ro Khế mơniâ. Rơtế tơdjuôm sôk ro ƀă mâu cô ƀă mâu vâi hdrêng tung kơmăng xah hêi ro khế mơniâ a Tíu xiâm Tŏng gum mơnhông hnê hriâm mot tơrŭm vâi hdrêng chó chêng tơvê kŏng kong pơlê Dak Lak cho mâu nôu pâ.

Ƀă vâi, tơdroăng hlo kuăn tơná tó, chiâng xiâp rêh ối rơtế pú hmâ ƀă hâk vâ tơkôm vâ kâ kơƀăn, rơnó Trung thu hơnăm kố hiăng tŭm ki kơnâ. Nâ Lê Thị Hồng, nôu dêi o Hoàng Lê Minh Khang rơrêk tung ihiâm mơno tối:

“Cho môi ngế nôu á tâ hơniâp ro ƀă tâ rơrêk tung hiâm mơno, á hlo kuăn ‘nĕng xuân môi tiah mâu vâi o ối kŭn sôk ro, hâk vâ ‘nâng. Á mơnê hên ‘nâng yôh”.

Jâ Lưu Thị Bình Minh, Kăn phŏ pơkuâ Tíu xiâm tŏng kum mơnhông hnê hriâm khên rêh ối pêi cheăng vâi hdrêng ki chó chêng tơvê kŏng kong pơlê Dak Lak ăm 'nâi, nôkố hngêi trung kố dế cho hngêi tơdjuôm dêi 144 ngế vâi hdrêng, tung mê ai 42 ngế chó chêng tơvê kŏng, rơtế ƀă mâu vâi hdrêng ki ôh tá ai tuăn ngoâ ƀă ôh tá chiâng tơpui.

Mâu tơdroăng pêi pro ki hơniâp ro môi tiah kố ôh tá xê to djâ troh ăm mâu vâi o môi hâi phiu ro, mê ối po rơdâ mâu troăng tơpui kâ, kum mâu vâi o thăm loi tơngah khên rêh ối, tơrŭm ƀă pơlê pơla.

“Rêm khế Tíu xiâm xuân tơkŭm po mâu tơdroăng pêi tơ'nôm ăm mâu vâi o, la Trung thu hơnăm ki má môi cho ai tơdroăng tơmâng ngăn dêi kăn pơkuâ kong pơlê, Khu pơkuâ troh diâp kơxuô tơmeăm, mâu vâi o ƀă Tíu xiâm phiu ro khât. Kố cho môi Têt Trung thu hơniâp ro khât xua măng tĭng má 5 mâu vâi o châ krếo troh a Tíu xiâm Mơhno túa lĕm tro vâ veăng tơkŭm po”.

Tơ'nôm môi rơnó Trung thu nếo vêh a hngêi trung ki phá tơ-ê kố. A tíu kố, ai idrâp chêng koăng chuât xơtó, ai mâu ƀai kơhnhon xuăng ki hơniâp ro ƀă tơdroăng ki hơniâp ro dêi cô ƀă hok tro, ai mâu kơxuô tơmeăm hơtôu hiâm mơno ƀă hên hĕng mâu tơdroăng ki hơniâp ro, sôk suâ. Kơmăng xah hêi Trung thu ah kô pơtê, la tơdroăng ki hơniâp ro ƀă ki hơtôu hiâm mơno ối kô ối chôu vế đi đo, mơdêk troăng prôk ăm mâu vâi o kŭn mơ-eăm tung troăng prôk a ngiâ.