Klêi tơmot chiâng môi, kong pơlê Dak Lak ai ƀăng deăng lối 18.096 km2 , pơ’leăng mâ mơngế lối 3,3 rơtuh ngế, 102 kơ koan râ cheăm; ai tơkăng kong tơnêi ‘lâng ƀă kong têa Kul ƀă ai têa kơxĭ. Tung tơdroăng mơnhông mơdêk nếo ƀă kơpong tơnêi kân rơdâ, têa kơxĭ ƀă tơkăng kong, kong pơlê ai tơ'nôm hên tơdroăng tơ'lêi hlâu 'na pêi chiâk deăng, kơmăi kơmok uâ pơliê, logistics, cheăng kâ têa kơxĭ ƀă cheăng kâ tíu tơkăng kong. Luâ tâ kơ mê nếo, kố xuân cho kơpong ki pơkâ mơ'no hnoăng cheăng kal kí, gâk kring.

A rôh pêi cheăng, mâu kăn teăng mâ tơkŭm tơpui tơno 'na túa xúa châ tơƀrê ki pơxúa nếo dêi kong pơlê la thế rơtế ƀă tơdroăng rak tơniăn gâk kring tơnêi têa - gâk kring pơlê pơla, malối a mâu kơpong ki kal, kơpong tơkăng kong ƀă mâu tơmeăm khoăng, troăng prôk ki kal. Thươ̆ng tươ̆ng Trần Việt Khoa, Ngế cheăng tung Tíu xiâm Đảng, Kăn pơkuâ Học viện Quốc phòng, pơchân tối Dak Lak kal mơnhông ki pơxúa 'na pêi chiâk deăng ƀă têa kơxĭ vâ mơdêk ki dâi lĕm tâk hên, tung mê tơmâng troh uâ mơdiê trâu hơngế ƀă mơngế pêi cheăng:

“Dak Lak nôkố ai têa kơxĭ kân rơdâ la ôh tá ai kơno têa kơxĭ kân mê cho chiâng pá khât tung pro mơjiâng kơno têa kơxĭ ƀă cheăng logistic; má péa nếo, cho kơpong tơnêi bazan ki ai hên tơmeăm vâ mơnhông má môi plâi tơnêi, hên túa khu plâi kâ ki kơnâ dêi pêi lo ing chiâk deăng la ôh tá ai kơmăi cheăng ki tŭm têk vâ têng, uâ, kơxu tung kơtong, tơdrong. Xua ing mê pin hlo to lâi tơdroăng, nôkố pro tiah lâi Dak Lak mơnhông châ pêi chiâk deăng, thế pêi pro tro ƀă ai mâu kơmăi ki têng, uâ, tâ, kơxu plâi ki krúa nếo châ mơdêk cheăng kâ hên tâ’’.

Môi tơdroăng xiâm châ tối rơdêi rôh pêi cheăng cho mơnhông cheăng kâ thế prôk rơtế mơjiâng kơpong gâk kring ƀă 'mâi mơnhông "tơdroăng gâk kring hiâm mơno kuăn pơlê". Tiah mê, mơdêk tơdroăng rêh ối, kơdroh kơtiê, rak tơniăn tơdroăng rêh ối, mơjiâng tơdroăng cheăng kâ krá tơniăn ăm kuăn pơlê, malối cho a kơpong tơkăng kong ƀă kơpong hdroâng kuăn ngo, ôh tá xê to hnoăng cheăng mơnhông mê ối veăng kum rak tơniăn ing pơlê pơla. Ƀă mâu kơpong ki kal, tơdroăng 'no liăn pro troăng prôk, logistics, mơnhông cheăng kâ tíu tơkăng kong, tơdjêp ƀă kong têa Kul ƀă troăng prôk troh a têa kơxĭ xuân châ pơkâ tung tơdroăng pơkâ thế rak tơniăn cheăng lêng - gâk kring.

Rơtế amê cho mơdêk ivá hbrâ rơnáu, gâk kring pơlê pơla, hbrâ ví xía vâ kong prâi pro ôh tá tơniăn ƀă mâu tơdroăng ki ôh tá tơniăn ôh tá xê tiah hmâ. Pôa Lương Nguyễn Minh Triết, Kăn cheăng tung Tíu xiâm Đảng, Kăn pơkuâ hnê ngăn cheăng Đảng kong pơlê Dak Lak mơnhên tối:

“Ngin mơnhên tơdroăng ki tơrŭm tơdjêp pơkâ pêi cheăng kâ rêh ối pơlê pơla ƀă pơkâ pêi cheăng lêng kring vế, gak ngăn sap ing apoăng malối cho ƀă mâu tơdroăng tơkêa bro ki kân, mâu troăng prôk ki kal, mâu kơpong ki kal ƀă đi đo hlê plĕng troăng tơmiât cho mơnhông vâ tơniăn ƀă mơnhông tơtêk. Má péa nếo, ngin tơkŭm pơtối mơjiâng hnoăng gak kring tâi tâng kuăn pơlê rơtế ƀă tơdroăng kring vế  kuăn pơlê ƀă tơdroăng tơrak ngăn hiâm mơno kuăn pơlê, malối tơmâng khât troh kơpong tơkăng kong, kơpong hdroâng kuăn ngo ƀă mâu tíu pêi cheăng ki kal.’’

Ing kong ngo troh kơpong têa kơxĭ, ing mâu pơlê kơpong hơngế hơngo troh kơpong tơkăng kong, Dak Lak đi đo pơkâ mơnhông krá tơniăn rơtế ƀă môi Tây Nguyên hơniâp lĕm.