Vâ chê 1.000 ngế kuăn pơlê kơpong peăng mâ hâi Lo Gia Lai hiăng veăng tơdroăng rah khăm plâi nuih tê kơtê xua Khu Tŏng gum mơngế tamo châi kơtiê kong pơlê tơrŭm ƀă Hngêi pơkeăng xiâm Tơnêi têa Huế ƀă mâu tíu pêi cheăng tơkŭm po. Klêi khăm, mâu ƀok thái pơkeăng châ hlo 39 ngế kal châ pâ pơlât plâi nuih, tung mê ai 16 ngế vâi hdrêng kô châ tŏng gum pâ pơlât tê kơtê.

Pakĭng tơdroăng khăm ƀă pơkâ thế pâ pơlât, mâu ƀok thái pơkeăng xuân hnê tối, hnê mơhno troăng rak ngăn ivá, trếo piê kơhiâm tơtro kum vâi hdrêng châ chăn tơniăn lĕm hdrối ƀă klêi kơ’nâi pâ pơlât. Tơdroăng rah khăm pơlât plâi nuih tê kơtê châ rak hên hơnăm hiăng hluâ, hiăng djâ ăm roh tơ’lêi hlâu rĕng châ hlo ƀă pâ pơlât teăm tơdrêng ăm rơpâu ngế tamo châi a Gia Lai, veăng kum kơdroh kơxô̆ mơngế hlâ xua châi plâi nuih ƀă djâ ăm tơdroăng la ngiâ eăng bâ tâ ăm vâi hdrêng kơtiê.