Plâ măng tĭng kố, hmâ đi đo a kơxo má, vâ chê 400 ngế kuăn pơlê a cheăm tơkăng kong Ia O, kong pơlê Gia Lai mê ai mâ tŭm a tíu pêi cheăng cheăm vâ hriâm vê rơxế mô tô râ A1. Cho cheăm ki ai vâ chê 70% cho hdroâng kuăn ngo, tơdroăng rêh ối trâm hên xơpá, xua mê tơdroăng ki châ hnê ƀă tơ’noăng vâ châ châ hbru ăm mơ-éa phêp vê, tơ’noăng rơxế tê kơtê vâi krâ kuăn pơlê phiu ro khât. Ngoh Ksor Thí, pơlê O, cheăm Ia O ăm ‘nâi.

“Á ‘nâi vê rơxế hon da hiăng sap ing ton nah la tá hâi ai ƀâng ăm phêp vê. Klêi kơ’nâi tâng tối, á hiăng chêh inâi hriâm vâ ‘nâi nhên tơdroăng, ‘nâi luât ‘na tơniăn a troăng prôk. Hriâm klêi, tơ’noăng châ ƀâng ah á kơto rơxế gá kô tơniăn tâ”.

Vâ gum kuăn pơlê tơ’lêi hlê, mâu tíu pêi cheăng ki ai tơdjâk troh hiăng tơrŭm tơkŭm po lâm hriâm a cheăm. Pakĭng tơdroăng ki hnê tối ‘na Luât prôk a troăng, vâi krâ kuăn pơlê ối châ vâi hnê kơto rơxế môi tiah: Kơto kơtâu tiô um kơxô̆ 8, kơto a troăng tơdrăng, tơkâ luâ kế ki mơdât ƀă hên ki ê. Jâ Võ Thị Hà, phŏ kăn pơkuâ Tíu cheăng hnê ƀă tơ’noăng vê rơxế, bêng Pleiku, kong pơlê Gia Lai ăm ‘nâi, tơdroăng ki tơkŭm po lâm hriâm a kơpong hngế hngo hiăng châ tơmiât nhên vâ tơtro ƀă vâi krâ nhŏng o ƀă xuân ối rak tơniăn ki rơkê:

“Tơbleăng pêi mâu tơdroăng ki kal môi tiah xup um, tơbleăng pro hồ sơ ăm vâi krâ nhŏng o. A tíu ki hnê vê rơxế xuân dế ai tơdroăng hriâm tê kơtê tâi tâng, malối cho ƀă vâi krâ nhŏng o cho rơpŏng kơtiê, vâ chê kơtiê”.

Klêi séa ngăn, a kong pơlê Gia Lai ối ai lối rơpâu ngế kuăn pơlê tá hâi ai mơ-éa phêp vê rơxế hạng A1, tơkŭm hên a mâu cheăm kơpong hngế hngo, kơpong hdroâng kuăn ngo. Thươ̆ng tă Ksor H’Bơ Khắp, Phŏ pơkuâ Kŏng an kong pơlê Gia Lai ăm ‘nâi, vâ ‘mâi rơnêu tơdroăng kố, ing apoăng hơnăm 2025 troh nôkố, Kŏng an kong pơlê Gia Lai hiăng hnê mơhno khu ki ai tơdjâk tơrŭm ƀă mâu tíu hnê vê rơxế, kăn pơkuâ cheăm bêng, mâu tíu khăm pơlât tung kong pơlê ƀă mâu khu ki tŏng gum tơkŭm khăm ivá, hnê, tơ’noăng tê kơtê, hbru ăm mơéa phêp vê rơxế râ A1 ăm kuăn pơlê a tâi tâng mâu cheăm ki ai ngế ki vâ hriâm.

“Ôh ti xê to a kơpong hngế hngo, kơpong tơkăng kong, mê tá mâu kơpong cheăm bêng tíu xiâm la xuân ối ai tơdroăng ki xơpá kal châ Tơnêi têa gum. Pơtối mê ngin tơrŭm tung pơla ki ai tơdjâk troh pêi pro hnoăng cheăng hbru ăm mơ-éa phêp vê rơxế. Tơkŭm hôp ƀă pêi cheăng ƀă mâu khu mơdró kâ, mâu ngế ki ai hiâm mơno hơ-ui tŏng gum chêh inâi vâ pêi pro mâu tơdroăng ki gum ăm kuăn pơlê hriâm tơ’năng ƀă ai mơ-éa phêp vê rơxế”.

Tiô pơkâ, ing nôkố troh tâi hơnăm 2025, Kŏng an kong pơlê Gia Lai rơtế ƀă mâu tíu pêi cheăng ki ai tơdjâk pơkâ pêi tơkŭm po hnê, tơ’noăng ƀă hbru ăm mơ-éa phêp vê rơxế râ A1 ăm vâ chê 47 rơpâu ngế hriâm, ki hên cho kuăn pơlê hdroâng kuăn ngo. Tơdroăng kố ối cho troăng hơlâ vâ mơdêk ki hlê plĕng ‘na luât, veăng gum kơdroh tơdroăng ki tơklô̆m rơxế a troăng, rak krá tơniăn tung pơlê pơla hdroâng kuăn ngo a kong pơlê.