Tơdroăng pro hngêi ối pơlê pơla dêi kong pơlê Gia Lai châ pêi pro sap hơnăm 2021. Tung kơxô̆ 20 tơdroăng tơkêa bro châ kĭ , ai 6 tơdroăng tơkêa bro hiăng pro klêi, 3 tơdroăng tơkêa bro pêi nếo môi pâ, ăm vâ chê 4.500 toăng hngêi. Ai 10 tơdroăng tơkêa bro ki ê dế pro ƀă pơxiâm pro, kô ăm dâng 7.800 toăng hngêi. Tung mê, ai dâng 2.000 toăng hngêi kô pro klêi pơtân ‘na pro klêi tung hơnăm kố. Tiô tối hdrối, troh tâi hơnăm 2025 Gia Lai kô pro klêi lối 31% pơkâ mơjiâng pro hngêi ối pơlê pơla hơnăm 2021 - 2030.

Pôa Nguyễn Hữu Quế, Phŏ Kăn hnê ngăn Vi ƀan kong pơlê Gia Lai ăm ‘nâi, kong pơlê dế tơkŭm mơdêk tơbleăng pêi tơdroăng tơkêa bro, mơ-eăm pê klêi 16.000 toăng hngêi tro tiô pơkâ, veăng pro tơdroăng tơkêa bro dêi Chin phuh ‘na “ ‘No liăn mơjiâng pro ki iâ 1 rơtuh toăng hngêi ối ăm rơpŏng kơtiê xơpá, kŏng nhân ki xơpá dêi kơpong hngêi kơmăi pơla hơnăm 2021-2030’’.