A rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i tối nhên, Hneăng hôp khu kăn Đảng ƀô̆ Kuô̆k hô̆i rôh má I po tung pơla tơnêi têa pin nếo pơxiâm mot tung rôh ki mơnhông nếo, tung tơdroăng pơkâ thế rế hía rế kơtăng, pơkâ mơ’no hnoăng cheăng pôu râng hngăm ƀă Đảng ủi Kuô̆k hô̆i, veăng gum pro ivá mơnhông rơdêi tung tơdroăng mơjiâng ƀă rak vế Tơnêi têa.

“Kố ôh ti xê to rôh vâ vêh hvái ngăn, mơnhên tối tơdrăng, tŭm têk mâu tơdroăng pêi pro châ tơƀrê, tá hâi pêi châ tơƀrê, xiâm kối, ƀai hriâm ki rơkê dêi hneăng cheăng hdrối nah, mê ối pơkâ troăng ngăn, tơdroăng pơkâ pêi tung la ngiâ, túa tơmiât mơnhông ƀă hnoăng cheăng pôu râng ki kal tung hneăng cheăng 2025-2030; tơdrêng amê hlối rah xo, séa ngăn tâi tâng kăn ƀô̆ pơkuâ ai tŭm tơdroăng ki vâ pơkuâ, ivá pêi cheăng, ivá khên tơnôu, tuăn ngoâ rơkê vâ pôu râng tơdroăng cheăng dêi Đảng, Kuô̆k hô̆i ƀă Kuăn pơlê pơcháu”.

A rôh hôp, mâu kăn cheăng tung Khu pơkuâ ngăn Đảng ủi Kuô̆k hô̆i hiăng ăm rơkong veăng tơpui nhên ‘na cheăng hbrâ rơnáu mâu mơ-éa pơtroh ăm Hneăng hôp, mâu cheăng hnê tối, mâu ngế ki pơkuâ, mâu ngế ki tŏng gum tơdroăng cheăng ƀă cheăng lăm ngăn séa ngăn.

Pôa Trần Thanh Mẫn, Kăn xiâm hnê ngăn Kuô̆k hô̆i mơnhên tối khât mâu khu pơkuâ cheăng, mâu kơvâ cheăng Đảng, Vi ƀan séa ngăn ƀă Ƀơrô cheăng Đảng ủi hiăng hbrâ rơnáu, tơbleăng pêi tơdroăng cheăng, rak tơniăn ki rơkê, tơdroăng pêi chêh pro mâu tơdroăng kal hbrâ ăm Hneăng hôp; Cheăng mâu ngế pêi cheăng châ pêi pro tro pơkâ, tơdroăng, rak tơniăn, teăm séa ngăn tŭm mâu inâi, râ ủi. Xoăng nhên tơdroăng cheăng ăm mâu ngế cheăng tung Khu pơkuâ ngăn Đảng ủi hnê mơhno hneăng hôp mâu Đảng ƀô̆ ối tung Khu pơkuâ cheăng Đảng.

Mơ-éa pơtroh ăm Hneăng hôp hiăng chêh pro mâu kơxop mơ-éa, tơkŭm xo rơkong tơpui tung lâp lu, tơmâng xo, chêh pro klêi tiô pơkâ. Inâi túa pơkâ Hneăng hôp apoăng châ tơdroăng môi tuăn khât. Cheăng séa ngăn châ tơtrŏng, rak tơniăn mâu pơkâ ‘na tơdroăng cheăng kal kí, hô sơ, cheăng pơkâ thế mâu inâi kăn pơkuâ xiâm.

‘Na cheăng chêh pro mơ-éa Hneăng hôp, Kăn xiâm hnê ngăn Kuô̆k hô̆i pơcháu ăm Tiêuh ƀan ki chêh pro mơ-éa tơmâng xo tŭm mâu rơkong tơpui sap ing mâu Chi ƀô̆, Đảng ƀô̆ ối tung Khu pơkuâ cheăng Đảng ủi, khu ki rơkê, đảng viên ngế pêi cheăng. Mâu mơ-éa ki chêh tối athế tối tro tơdroăng ki ai khât, mơnhên tối tung hneăng pơla hdrối nah, xiâm kối, ƀai hriâm ki rơkê mơhno nhên túa tơmiât pêi, hnoăng cheăng ki kal ƀă mơ’no troăng hơlâ ki pơxúa khât, mơnhông tơƀrê tung hneăng cheăng la ngiâ.

“Mâu mơ-éa pơchuât a Hneăng hôp kal ‘nâi, la tŭm tơdroăng ki kal, tơ’lêi tơpui tơno, châ môi tuăn hên tung Hneăng hôp. Tung mê, Pơchuât tơbleăng ‘na tơdroăng kal kí cho pơchuât tơbleăng ki xiâm, kal séa ngăn tro tung mâu tơdroăng hnê mơhno, troăng pơkâ, troăng tơmiât pêi kân tung mâu kơxop mơ-éa pơtroh a Hneăng hôp 14 dêi Đảng; Pơchuât tơbleăng tơdroăng ki séa ngăn tơná dêi râ Đảng athế ai túa ki mơ-eăm, mơdêk hiâm mơno hnê xêh ƀă xua ngế ki ê hnê khĕn ƀă tối nhên hnoăng cheăng pôu râng dêi tâi tâng, ngế krê ‘na klêi kơ’nâi cheăng pơkuâ, hnê mơhno dêi Đảng ủi Kuô̆k hô̆i. Mơ-éa chêh athế chêh tro tiô troăng tơmiât dêi Khu xiâm pơkuâ tơdroăng kal kí, Khu pơkuâ ngăn Đảng dêi Tơnêi têa cho tơdroăng ngăn tơdjuôm, la ki xiâm dêi Kuô̆k hô̆i mơjiâng luât, séa ngăn ƀă pơkâ mâu tơdroăng ki ai tơdjâk troh ki kal dêi tơnêi têa.”

‘Na cheăng mâu ngế pêi cheăng, Kăn xiâm hnê ngăn Kuô̆k hô̆i  pơcháu tơdroăng pơkâ thế pơtối séa ngăn nhên, pêi pro tŭm tro pơkâ dêi Đảng, pêi pro tro tơdroăng mơnhên tối kăn ƀô̆, tơdroăng ki tơbleăng mâu ngế pêi cheăng Khu pơkuâ cheăng Hneăng nếo tơdrăng, tro, pơtó, pơhlêh nếo, ngăn nhuô̆m ki rơkê, tơdroăng cheăng ƀă troăng pơkâ tơtro; râ Đảng hneăng ki nếo kơhnâ rơkê ‘na ivá khên tơnôu tơdroăng kal kí, tuăn ngoâ, hiâm mơno lĕm, ivá pêi cheăng rơkê, châ loi tơngah. Tơdrêng amê hlối pêi pro tro cheăng hiâm mơno tơmiât, pro chiâng tơdroăng ki tơ’lêi hlâu, tơrŭm tung kơ koan cheăng, rak vế kơtăng tơdroăng pơkâ dêi Đảng.

Kăn xiâm hnê ngăn Kuô̆k hô̆i loi tiah kố, ƀă tơdroăng tơrŭm, khŏm mơ-eăm khât ƀă hiâm mơno pôu râng dêi tâi tâng kăn ƀô̆, đảng viên, cheăng hbrâ rơnáu po Hneăng hôp khu kăn Đảng ƀô̆ Kuô̆k hô̆i rôh má I kô châ tơbleăng tro pơkâ, ai tŭm ki rơkê plĕng, gum tơkŭm po ƀlêi chiâng Hneăng hôp tối krê ƀă Hneăng hôp Đảng rôh má 14.