Tơdroăng tơkêa bro ai kơxô̆ liăn ‘no pro dâng 2.592 rơtal liăn, tơbleăng pro a tơnêi vâ chê 5,6 ha, tung mê tơnêi pro tơmeăm khoăng lối 44.000 m2, ki u ối ‘măn ăm pro troăng pôk, pêt loăng ăm ngiât lĕm ƀă pro mâu tơmeăm khoăng kih thuât.

Tơmeăm khoăng mê ai 8 khu hngêi xŏn sap 12 - 15 râ, ai 7 khu hngêi ối ăm plê pơla ƀă 1 khu hngêi tê mơdró ƀă kơpong hngêi păn roăng vâi hdrêng, tâi tâng dâng 1.570  veăng,  môi veăng rơdâ 70- 77 m2, ai tiô ối ăm dâng 4.500 kăn ƀô̆, mâu lêng ƀă rơpŏng hngêi.

Kố cho tơdroăng tơkêa pro ki xiâm mơnhông hngêi ối pơlê pơla ăm mâu lêng Kong an kuăn pơlê, veăng tơmâng tơdroăng rêh ối pro hlâu  vâ mâu kăn ƀô̆ mâu lêng hmiân tuăn pêi chăng ton hơnăm a kong pơlê.