Hlo hên kal vâ tơmeăm mơjiâng pro hngêi trăng, Vi ƀan kuăn pơlê dêi kong pơlê pơkâ thế mâu cheăm bêng kong pơlê hbrâ tăng, tơniăn vâ ai tŭm tơmeăm rôe pro, tơniăn tê mơdró, ôh tá ăm ai tơdroăng pro tơmeăm to kơnâ yă. Lâp tung kong pơlê nôkố ai 89 toăng hngêi  tro tơhnâp, tơ’nhiê, hiu kal pro nếo ƀă vâ chê 300 toăng hngêi tro tơ’nhiê kal ‘mâi rơnêu. Troh nôkố,  lối 50 toăng hngêi hiăng châ pro, 46 toăng hngêi dế  ‘mâi pro a 30 to cheăm, bêng, ƀă veăng ai khu cheăng kal kí, mâu kong an, mâu lêng ƀă khu mơdró veăng pro. 

Vi ƀan Kuăn pơlê dêi kong pơlê pơkâ thế mâu kơvâ cheăng  mơdêk  séa ngăn  lăm ngăn, pơxâu kơtăng mâu ngế ki rak lôi tơmeăm, pro to kơnâ yă. Tiô Khu xiâm mơjiâng pro hngêi trăng Khánh Hòa, kong pơlê kơjo kum 60 rơtuh liăn rêm toăng hngêi pro nếo ƀă xoăng 500 tâ̆n  xi mong, mơ-eăm pê klêi mơjiâng nếo hdrối hâi lơ 15/1/2026 ƀă ‘mâi rơnêu hngêi hdrối hâi lơ 31/12/2025.