Pơkâ ki xiâm châ mơnhên nhên: troh hơnăm 2030, tâi tâng thái cô châ plah tơdroăng hnê mơjiâng tiô Luât Hnê hriâm; lối 80% hngêi trung râ má pái châ plâi tơnêi têa; kơxô̆ hok tro mơgêi râ má pái châ lối 98%, kơxô̆ châ plah đăi hok ƀă kao đăng ối tung khu ối má môi kơpong. Rơtế amê cho pơhlêh nếo tơdroăng xiâm, troăng pêi hnê hriâm, chôa ‘lâng djâ nâl Ăng-glê chiâng nâl tơpui má péa tung hngêi trung hriâm, po rơdâ tơrŭm cheăng lâp plâi tơnêi ƀă mơhnhôk sinh viên kong têa ê troh hriâm tâp.

Tơdroăng pơkâ xuân pơkâ mâu troăng hơlâ kơjo ki phá tơ-ê ăm khu thái cô, mơdêk mơhá hnoăng liăn ƀă tơdroăng hnê hriâm ki vâ iâ 70% ăm thái cô, 100% ăm thái cô a kơpong ki pá puât, rơlố têa kơxĭ ƀă kơpong kuăn pơlê hdroâng kuăn ngo.