Cheăm kơpong kong ngo Khánh Sơn, kong pơlê Khánh Hòa ai vâ chê 12 rơpâu kuăn pơlê, mê ai lối 6.500 mơngế hdroâng kuăn ngo Raglai. Pôa Cao Minh Khánh, Phŏ Kăn pơkuâ hnê ngăn cheăm Khánh Sơn, tối ăm ‘nâi, 5 hơnăm hiăng hluâ rơpŏng kơtiê a kố kơdroh rĕng, laga xuân u ối lối 20%, pêi lo liăn tơdâng ko mơngế bu châ 30 rơtuh liăn/hơnăm. Ƀă hên troăng hơlâ ki tơtro dế châ pêi pro, tơdroăng pêt mơjiâng tơmeăm dêi kuăn pơlê dế châ pơhlêh hôm:

‘’Mâu tơdroăng cheăng kâ kong ngo pơla kố nah hiăng châ pêi pro hên tung cheăm, kuăn pơlê châ tŏng gum tŭm. Laga, prâu trâu, prôk achê ƀă kuăn pơlê xuân hlo mâu rơpŏng tá hâi mơnhông châ tơƀrê tơdroăng pêi. Ki hên cho mơnhông lĕm tro mâu tơdroăng tŏng gum ƀă hiăng hlŭn ing kơtiê krá tơniăn’’.

Riên tơdjuôm lâp kong pơlê Khánh Hòa, kơxô̆ rơpŏng kơtiê tung kuăn pơlê hdroâng kuăn ngo kơdroh tơdâng lối 5% rêm hơnăm; troh nôkố u ối 6.400 rơpŏng, châ 10,7%. Lối 3.500 toăng hngêi pơtân, xi kơchoh hiăng châ pơhlêh ƀă hngêi krá kâk. Troăng klông, hngêi trung hriâm, hngêi pơkeăng cheăm, on tơhrik ƀă têa ô hum rôh jiếo troh tâi tâng mâu rơpŏng kuăn pơlê. A hên cheăm klêi kơ’nâi tơmot chiâng môi, ƀăng deăng, pơ’leăng mâ mơngế tâk, ai tơ’nôm hên tơnêi mơnhông mơdêk, pêt mơjiâng tơmeăm apoăng ai troăng prôk nếo. Môi tiah a Tíu xiâm Khánh Vĩnh po rơdâ troăng pêt loăng plâi kâ. Khu râ kăn pơkuâ tŏng gum hdrê loăng plâi vâ pêt, ăm mung liăn, hnê kih thuât, mơjiâng ivá vâ kuăn pơlê khên tơnôu pơhlêh. Jâ Cao Thị Ngọc Thanh, Kăn hnê ngăn Viƀan cheăm Trung Khánh Vĩnh tối ăm ‘nâi:

‘’Cheăm mơjiâng pơkâ pêi mơnhông mâu troăng pêi pêt loăng ki xiâm, rah xo pêt loăng tơtro ƀă tơnêi tơníu, kong prâi, rế tơxâng pơkâ mơnhông cheăng kâ, rế pơhlêh pêi chiâk deăng tiô troăng châ tơƀrê. Hên tơmeăm hiăng châ tê tung kơchơ mơdró, tơniăn châ hên, dâi lĕm, djâ ki pơxúa cheăng kâ ƀă pêi lo liăn tơniăn ăm kuăn pơlê’’.

Tiô tơbleăng dêi kong pơlê, kơpong Bắc Khánh Hòa hiăng kêi đeăng 29/30 tuá pơkâ Tơdroăng pơkâ xiâm tơnêi têa mơnhông kơpong kuăn pơlê hdroâng kuăn ngo ƀă kong ngo; pêi lo liăn tơdâng kơpong hdroâng kuăn ngo tâk châ 2,14 xôh tâng pơchông ƀă hơnăm 2020. A Peăng hdroh Khánh Hòa, 19/22 tuá pơkâ châ ƀă hluâ pơkâ, tung mê ki má môi cho 100% rơpŏng kơtiê hdroâng kuăn ngo châ tŏng gum hngêi ối. Mơhé ti mê, xuân ối mâu pơkâ tá hâi châ môi tiah kơdroh kơxô̆ cheăm ki pá puât, mơdêk kơxô̆ hok tro hdroâng kuăn ngo hriâm to trung hok phôh thông, lơ ki xâp rơngiêp dêi kong.

Tiô pôa Nguyễn Ngọc Sơn, Phŏ Kăn pơkuâ Khu pơkuâ Hdroâng kuăn ngo ƀă Loi tĭng tiô khôp kong pơlê Khánh Hòa, kơpong kuăn pơlê hdroâng kuăn ngo ƀă kong ngo dêi kong pơlê ối hên pá puât, laga xuân ai mâu tơdroăng ki rơdêi, ki má lối cho ‘na pêi chiâk deăng. Cheăng kâ rêh ối pơlê pơla a kố kô pơhlêh ‘na ki dâi lĕm drêng kong pơlê kơbông krếo khu tê mơdró rơtế, mơjiâng mâu tơdroăng ki tơdjêp. Pôa Nguyễn Ngọc Sơn xo pơtih a cheăm Khánh Sơn:

‘’A kơpong kong ngo Khánh Sơn, nôkố plâi sầu riêng hiăng chiâng loăng plâi ki xiâm. Mơjiâng châ inâi ƀă ai troăng hơlâ mơ’no liăn cheăng uâ bro, kơxuô, kế tâ, mê plâi sầu riêng a Khánh Sơn kô chiâng păng ‘nâng vâ troh hơhngế. Laga vâ pêi chiâng tơdroăng ki mê kal ai mâu troăng hơlâ ki phá tơ-ê, kơjo ăm khu tê mơdró kơvâ cheăng mê. Ing mê, pro ivá mơhnhôk ăm mâu cheăm kơpong kuăn pơlê hdroâng kuăn ngo mơnhông mơdêk’’.

Tơdroăng kơdroh kơtiê, mơdêk tơdroăng rêh ối kơpong kuăn pơlê hdroâng kuăn ngo a Khánh Hòa hiăng châ hên tơdroăng châ tơƀrê inhên, rế hía rế krá tơniăn drêng tơrŭm ƀă hngêi trăng troăng klông, hnê hriâm ƀă tăng cheăng pêi. Khu tê mơdró xuân dế rơtế vâ mơdiu tơmeăm ki ai hlâu. Tơbleăng kal kí dêi kong pơlê Khánh Hòa tối rơdêi troăng tơmiêt pêi pro ‘’ôh tá lôi kơbố parŏng’’, châ pơkâ kơdroh kơtiê hên troăng 1 troh 1,5% hơnăm, mơnhên  tơdroăng khŏm mơ-eăm djâ roh tơ’leie hlâu mơnhông tâi tâng, krá tơniăn ăm kuăn pơlê hdroâng kuăn ngo, kong ngo./.