A rôh trâm mâ, Khu kăn Kuô̆k hô̆i kong pơlê Lâm Đồng tối ăm kuăn pơlê dêi kong pơlê vâ pêi tung la ngiâ, tơdroăng kal dêi Hneăng hôp má 10, Kuô̆k hô̆i hneăng 15. A hneăng hôp tiô tối hdrối kô tơkŭm po a hâi lơ 20/10 troh hâi lơ 12/12 Kuô̆k hô̆i kô séa ngăn, pơkâ 43 tơdroăng tơkêa luât, tơdroăng pơkâ ối tung hnoăng mơjiâng luât; 12 khu tơdroăng kal ‘na cheăng kâ rêh ối pơlê pơla, liăn ngân tơnêi têa, séa ngăn ƀă mâu tơdroăng kal ki ê; tơdrêng amê hlối ai 13 khu tơdroăng kal mâu kơ koan pơtroh tơbleăng vâ mâu kăn Kuô̆k hô̆i hriăn ngăn.

Kuăn pơlê kong pơlê Lâm Đồng tối loi khât tung tơdroăng pơkuâ dêi Đảng, séa ngăn dêi Kuô̆k hô̆i, tơdroăng pơkuâ kơtăng dêi Chin phuh tung mơnhông cheăng kâ rêh ối pơlê pơla, rak vế tơniăn cheăng lêng gâk kring dêi tơnêi têa; tơmâng xo ivá mơ-eăm tơkâ luâ pá puât dêi kong pơlê châ a kơlo ki tâk ‘na cheăng kâ 9 khế apoăng hơnăm 6,8% ƀă nâp liăn châ vâ chê 23.600 rơtal tơ’mô ƀă 84% tơdroăng pơkâ pêi dêi kong pơlê, tâk lối 19% tâng vâ pơchông ƀă khế kố hơnăm nah; mơnhên tối khât Tơdroăng têa tah hngêi ối pơtân xi kơchoh ƀă tơdroăng ki ôh tá êa nâp liăn hriâm ƀă mâu hok tro dêi Đảng, Tơnêi têa.

Tơmâng ngăn troh kơvâ cheăng hnê hriâm ƀă hnê mơjiâng tuăn ngoâ rơkê, kuăn pơlê kong pơlê Lâm Đồng tối tiah kố kal séa ngăn ôh tá tơ’noăng xếo râ má pái trung hok phôh thong xua hên mâu kong pơlê rêm hơnăm pơrá ai kơxô̆ ngế plah tơ’noăng hên. Kal pêi pro rĕng tơdroăng hnê mơhno dêi Khu xiâm pơkuâ tơdroăng kal kí séa ngăn pêi pro tơdroăng hnê hriâm phôh thong, rak vế tơniăn tơdroăng tối tơbleăng mâu hlá mơ-éa hriâm môi tuăn tung lâp tơnêi têa; Tơmiât nhên tơdroăng ki kơdroh ăm hok tro xúa phôn tung hngêi trung; tơdroăng ki ai hên hok tro tung môi lâm a kơpong Đà Lạt; rơtế ƀă tơdroăng hnê hriâm ki rơkê plĕng mâu hngêi trung athế tơmâng ngăn troh hnê hriâm túa rêh ối ăm hok tro ƀă hên ki ê.

Kuăn pơlê a mâu cheăm kơpong hngế hngo tung kong pơlê pâ thế châ tơmâng tŏng gum ‘no liăn pro troăng vâ prôk tơ’lêi hlâu tung tơdroăng rêh kâ ối pêi cheăng ƀă mơnhông tê mơdró. Ƀă tơdroăng ki pêi pro túa kăn pơkuâ kong pơlê péa râ. Kuăn pơlê kong pơlê Lâm Đồng, tối rơdêi, klêi kơ’nâi vâ chê 3 khế xúa pêi mâu cheăm bêng hiăng tơbleăng tơdâng tơ’mô châ tơƀrê hên tơdroăng ki kal apoăng gum tơniăn lĕm ăm kuăn pơlê troh pro mơéa.

Laga tiô Lê Văn Thái, a bêng Lâm Viên – Đà Lạt, ối ai mâu tơdroăng tơvâ, ôh tá tơniăn kal châ ‘mâi mơnhông teăm tơdrêng vâ kơ koan cheăng tơnêi pêi cheăng tơ’lêi hlâu:

“Tơdroăng ki xoăng kăn ƀô̆, kong chưk môi tiah nôkố tá hâi tơxâng ƀă pơ’leăng mâ mơngế chiâng tơdjâk troh pá tung tơdroăng cheăng gá hên. Kăn ƀô̆, kong chưk athế tơleăng mâu tơdroăng cheăng ki kân xua mê tơdjâk troh ki rơkê plĕng hnoăng cheăng châ pơcháu ƀă tơdjâk troh ki rơkê plĕng tung tơdroăng ki gum Kuăn pơlê. Pơkâ thế ƀă mâu kăn Kuô̆k hô̆i, pâ thế ƀă Kuô̆k hô̆i, ƀă Chin phuh ƀă mâu khu xiâm, kơvâ cheăng ai tơdjâk troh rĕng hriăn ngăn, ‘mâi pơhlêh vâ ai troăng hơlâ tŏng gum xoăng ƀiên chê̆ kăn ƀô̆ kong chưk râ cheăm tiô pơ’leăng mơngế, ƀăng tơnêi ƀă tơdroăng krê dêi rêm kong pơlê”.

A rôh trâm kuăn pơlê, pôa Y Thanh Hà Niê Kdăm, Ngế cheăng Tíu xiâm Đảng, Kăn pơkuâ ngăn Đảng, Ngế xiâm pơkuâ Khu kăn Kuô̆k hô̆i kong pơlê Lâm Đồng tơmâng xo 16 rơkong tơpui tá hiâm mơno dêi kuăn pơlê ƀă tơdroăng mơnhông dêi kong pơlê. Malối cho tung tơdroăng tơnêi tơníu kân rơdâ, kế tơmeăm ai hlâu kân dêi kong pơlê Lâm Đồng nếo klêi kơ’nâi ‘mot tơkŭm 3 to kong pơlê Dak Nông, Bình Thuận ƀă Lâm Đồng.

Teăng mâ Khu kăn Kuô̆k hô̆i, Vi ƀan hnê ngăn kong pơlê Lâm Đồng rơtế ƀă mâu khu râ, kăn pơkuâ kơvâ cheăng ki ai tơdjâk dêi kong pơlê xuân tiâ mơnhên mâu tơdroăng pâ thế nhên dêi kuăn pơlê ối tung hnoăng pơkuâ dêi kăn pơkuâ ƀă kơvâ cheăng pơkuâ ngăn.