Troh nôkố, Ƀơrô Khu xiâm pơkuâ Kŏng an hiăng tơdah vâ chê 90 rơtal liăn tŏng gum tơdroăng rơnêu kế tơmeăm khoăng xua kong prâi pro ôh tá tơniăn. Pêi pro ‘’Cheăng pêi thâ Quang Trung’’ xua Ngế pro xiâm hnê ngăn Chin phuh mơhnhôk djâ, Khu xiâm pơkuâ Kŏng an pơcháu pơkuâ mơjiâng nếo 429 toăng hngêi gum kuăn pơlê a 8 kong pơlê kơpong Peăng tơdế Tơnêi têa - Tây Nguyên. Troh nôkố hiăng ai 19 toăng hngêi hiăng kêi đeăng, hluâ tơdroăng pơkâ mơ’no; hên tơmeăm ki ê châ tơƀrê tơdroăng cheăng lối 70%. Tâi tâng kơxô̆ hngêi tiô tối hdrối pơcháu hdrối hâi lơ 15/1/2026, mơ-eăm pêi kêi đeăng rĕng tâ sap ing 10 troh 15 hâi a mâu cheăm, bêng.

Teăng mâ khu râ kăn pơkuâ Kŏng an mâu kong pơlê hiăng tối mâu túa ki rơkê tơtro pêi pro tơdroăng nôkố ‘na troăng pêi “4 tơdrêng”  tung hbrâ ví kong prâi pro ôh tá tơniăn ƀă troăng mơhnhôk djâ kuăn pơlê ki xiâm vâ rak gâk kring tơniăn a mâu kơpong têa kân lân lu ó; tơdroăng ‘nâi  tơ’nôm tơdroăng kong mêi têa lân lu, rơnêu kế tơmeăm khoăng xua kong prâi pro ôh tá tơniăn...

Thiê̆u tươ̆ng Nguyễn Hữu Phước, Kăn pơkuâ Kŏng an kong pơlê Khánh Hòa tối ăm ‘nâi, roh kong mêi têa lân lu pơla kố nah a Khánh Hòa pro lân lu rơdâ, lối 100.000 rơpŏng kuăn pơlê tro tơdjâk, tro lŭp cheăng kâ tiô tối hdrối lối 5.000 rơtal liăn. Kŏng an kong pơlê hiăng mơhnhôk 6.500 roh kăn ƀô̆, mâu lêng veăng tŏng gum, xĕn kuăn pơlê troh tíu tơniăn, rơnêu tơmeăm khoăng tro tơ’nhê xua kong prâi pro ôh tá tơniăn.

Ai 800 plong, tuk, rơxế, kơmăi kơmok châ mơhnhôk djâ troh, hiăng tŏng châ vâ chê 20 rơpâu ngế troh tíu tơniăn. Klêi kơ’nâi kong mêi têa lân lu, Kŏng an kong pơlê tơdrêng amê pơxiâm mơjiâng pro 24 toăng hngêi tung tơdroăng “Cheăng pêi thâ Quang Trung’’:

‘’Ngin hiăng xing xoăng hnoăng cheăng, xing xoăng mơngế pêi cheăng, plong tuk, rơxế kơmăi kơmok pêi pro hnoăng cheăng. Troăng pêi cho ngin ai ki klâi tung kŏng pơrá mơhnhôk djâ vâ gum kuăn pơlê. Kăn ƀô̆, mâu lêng râ cheăm, khu kŏng an gâk kring tơniăn a pơlê pơla hiăng rơtế pêi pro rơnêu kế tơmeăm khoăng xua kong mêi têa kân lân lu tung kong pơlê. Têa xiâ troh alâi, mơgrúa troh amê’’.

Thiê̆u tươ̆ng Nguyễn Hồng Nguyên, Phŏ Kăn pơkuâ Ƀơrô Khu xiâm pơkuâ Kŏng an mơnhên hiâm mơno pôu râng hnoăng cheăng, tơdroăng ki hbrâ ƀă tơdroăng châ tơƀrê tung tơdroăng kal pơtâng tối ‘na hbrâ dêi xivil ƀă ‘’Cheăng pêi thâ Quang Trung’’ dêi mâu tíu cheăng, kong pơlê, tơdrêng amê tối rơdêi, kố cho hnoăng cheăng châ Khu xiâm pơkuâ Kŏng an thế tơmâng tŏng gum, tơkŭm hnê mơhno đi đo.

Thiê̆u tươ̆ng Nguyễn Hồng Nguyên pơkâ mâu tíu cheăng, Khu kŏng an mâu kong pơlê pơtối pêi tiô pơkâ, pêi pro kơtăng tơdroăng pơkuâ, hnê mơhno dêi Đảng, Tơnêi têa. Tơdrêng amê pơtối pêi pro rơdêi tơdroăng cheăng tơdroăng kal, pơtâng tối, ki má lối cho tung troăng hyôh măng, pro pơhlêh rơdêi ‘na hlê plĕng, pêi pro tung pơkuâ, hnê mơhno pêi pro hnoăng cheăng, mơjiâng khu Kŏng an kuăn pơlê xuân môi tiah tơdroăng hbrâ xivil, mơjiâng khu pêi cheăng Kŏng an kuăn pơlê xuân môi tiah tơdroăng hbrâ xivil, tơniăn rêh ối pơlê pơla, rơnêu kế tơmeăm khoăng xua kong prâi pro. Thiê̆u tươ̆ng Nguyễn Hồng Nguyên tối:

‘’Hơnăm 2026, khu Kŏng an Kuăn pơlê ai tơdroăng tơ’noăng 3 má môi: kheăn hôu má môi, môi tuăn má môi, achê kuăn pơlê má môi. Xua ti mê, hnoăng cheăng tơdroăng kal kí pơtâng tối um méa kŏng an kuăn pơlê cho hên troăng, tơkŭm’’.