A cheăm Đức Trọng, hngêi trăng troăng klông gum tung pêi chiâk deăng cho tơdroăng ki châ hên kuăn pơlê kal vâ 'nâi khât. Ai mâu troăng prôk ki ‘nâ tung thôn a kơpong Đà Lạt, Đơn Dương, Đức Trọng hiăng châ tôh ƀê tong la ối kŭn, ôh tá tơdjêp troh ƀă troăng kân, pro tơmeăm pêi lo ing chiâk deăng athế pơto hên rôh, pro mơdon hâi khế ƀă tơdjâk troh ki dâi lĕm. Troăng prôk tung thôn Knai hiăng châ tôh ƀê tong la troăng kân ĐH6 hên hơnăm tá hâi pro.

Mâu tơdroăng tơkêa bro troăng kân Tân Phú - Bảo Lộc, Bảo Lộc - Liên Khương ối trâm pá tung xo tơnêi. Pôa Lê Hữu Quế, Kăn pơkuâ hnê ngăn Chi ƀô̆ thôn Phú Lộc, cheăm Đức Trọng, pâ thế:

“Tơmâng ngăn hnê mơhno, mơdêk rĕng tơdroăng pro mâi tơdroăng tơkêa bro troăng prôk troh kơpong ki kal dế tơbleăng pro a kong pơlê; teăm lêi tah mâu tơdroăng tơvâ ‘na chêl thiê̆n, xo tơnêi, khŏm pơkâ tơleăng tiô hơp đong ƀă mâu khu ki hrá pro tơmeăm, ivá pêi cheăng ‘ro”.

Kuăn pơlê xuân pâ thế kơjo kum liăn 'mâi rơnêu troăng prôk a mâu kơpong ki pêt mơjiâng tơmeăm, mơjiâng pro troăng tơmeăm logistics achê Tơraih tơƀai lâp plâi tơnêi Liên Khương, pro tơ'lêi hlâu djâ tơmeăm pêi lo ing chiâk deăng châ tê tung mâu kơchơ, kong têa ki kân.

Hlo mâu tơdroăng pâ thế kố, Kăn pơkuâ hnê ngăn Đảng, Kăn xiâm hnê ngăn Hngêi tơleăng xiâm tơnêi têa cho pôa Nguyễn Văn Quảng pơkâ thế mơdêk séa ngăn mâu tơdroăng tơkêa bro troăng prôk ki kal, malối cho mâu tơdroăng tơkêa bro ki hrá pro, tơdrêng amê hlối teăm tŏng gum mâu tơdroăng tơvâ tơvân 'na chêl thiê̆n, xo tơnêi.

Ôh tá xê to troăng prôk, kuăn pơlê cheăm Đức Trọng ối tối mâu tơdroăng ki tơdjâk troh xok, têa ôu kâ hum roh, tơnêi tơníu, hngêi ối pơlê pơla; pơkâ thế tah lôi tơdroăng pơkâ ton peăng Hdroh têa kroăng Đạ Nhim. Tơdjâk troh khu kăn pơkuâ kong pơlê 2 râ, kuăn pơlê pâ thế tơ'nôm mơngế pêi cheăng, liăn ngân pêi cheăng, séa ngăn tơdroăng ăm kăn ƀô̆ mâu chi hô̆i, khu râ a pơlê cheăm ƀă troăng hơlâ pơkâ tơleăng mâu tíu pêi cheăng ki rơlối klêi kơ'nâi ‘mot tơkŭm.

A bêng Lâm Viên - Đà Lạt, mâu rơkong pâ thế xuân tơkŭm a mâu tơdroăng ki achê ƀă tơdroăng rêh ối môi tiah rak tơniăn pơkeăng, tơmeăm khăm pơlât ối tung inâi ƀaoh hiêm khăm pơlât; xing xoăng mơngế pêi cheăng ăm Măt trâ̆n Tơnêi têa ƀă mâu khu tơrŭm, khu râ; chôu tah, tâp kơđu mâu xok, rak vế hyôh kong prâi, mơnhông ôm hyô ngiât; lêi tah ki xơpá tung tơdroăng chêh pro hlá mơ-éa tơnêi tơníu.

Môi tơdroăng châ kuăn pơlê rơhêng vâ 'nâi plĕng cho tơdroăng ki ôh tá ai tŭm hlá mơ-éa hriâm. Jâ Nguyễn Thị Phương Diệu, tôh kơphô̆ Đạ Thiện, ăm 'nâi nôu pâ athế photocopy mâu hlá mơ-éa ăm kuăn 'nĕng hriâm, mơhrê tơ'nôm liăn ngân ƀă tơdroăng ki tơdjâk troh hnoăng pơkuâ.

“Mâu nôu pâ cho pá khât vâ châ rôe mơ-éa ăm mâu vâi o. Ai mâu  hlá mơ-éa ki 'nâ nôkố xuân tá hâi ai tŭm mâu vâi o athế lăm phô tô vâ vâi xúa ăm tơdroăng hriâm tâp. Mâu hlá mơ-éa ki 'nâ ai mơngiơk mê athế lăm in mơ-éa tiô túa mơngiơk gá kơnâ liăn khât xuân môi tiah tơdjâk troh tơdroăng hriâm tâp dêi mâu vâi o. Chiâng trâm tơ'nôm môi tơdroăng mê cho pro xôi 'na hnoăng ki pơxúa dêi mâu ngế ki chêh bro hlá mơ-éa”.

A mâu rôh trâm mâ, Khu kăn Kuô̆k hô̆i kong pơlê Lâm Đồng xuân tối ăm kuăn pơlê tơdroăng Hneăng hôp ôh tá xê tiah hmâ rôh má môi, tối hdrối tơdroăng Hneăng hôp má péa, Kuô̆k hô̆i hneăng má XVI ƀă tơbleăng tơdroăng châ tơƀrê tơleăng mâu rơkong pâ thế dêi kuăn pơlê ing mâu rôh trâm mâ hdrối mê. Tơpui tơno ƀă kuăn pơlê bêng Lâm Viên - Đà Lạt, Kăn xiâm pơkuâ hnê ngăn cheăng Đảng, Kăn xiâm hnê ngăn Hngêi tơleăng xiâm Nguyễn Văn Quảng mơnhên mâu rơkong tơpui, pâ thế kô châ tơkŭm, pơtroh ăm kơ koan ai hnoăng séa ngăn, tơleăng; mâu tơdroăng ối tung hnoăng cheăng dêi kong pơlê kal châ tơkŭm tơleăng ƀă tiâ ăm kuăn pơlê.

“Khu kăn Kuô̆k hô̆i tơmâng xo mâu rơkong tơpui tối dêi mâu kăn teăng mâ kuăn pơlê. Ngin mơnhên mâu rơkong tơpui tối kố tá hiâm mơno, pôu râng hnoăng cheăng ing hnoăng cheăng dêi tơná ƀă kong pơlê, ƀă tơnêi têa. Ƀă mâu tơdroăng ki kuăn pơlê kal vâ ‘nâi á pơkâ thế kăn pơkuâ kong pơlê malối cho kăn pơkuâ Vi ƀan pơtối ai tơdroăng pơkuâ, hnê mơhno vâ tơleăng klêi vâ tiâ mơnhên rơkong kuăn pơlê ƀă hlá mơéa tiô túa ki hleăng nhên khât”.

Ƀă mâu tơdroăng pâ thế ki u ối, pôa Nguyễn Văn Quảng tơmâng xo, tŏng gum vâ Khu kăn Kuô̆k hô̆i kong pơlê Lâm Đồng tơkŭm, pơtroh ăm kơ koan ai hnoăng séa ngăn, tơleăng ƀă gum Hneăng hôp má péa, Kuô̆k hô̆i hneăng má XVI.