Ƀă 90,51% kăn Kuô̆k hô̆i môi tuăn, Kuô̆k hô̆i hiăng têk kŏng tơbleăng Pơkâ ‘na túa mơnhông cheăng kâ rêh ối pơlê pơla hơnăm 2026. Pơkâ kố tối nhên 15 tơdroăng pơkâ pêi ki kal, tung mê: Ki têi dêi mâu tơmeăm tung tơnêi têa GDP mơeăm sap ing 10% tơngi klêng. GDP rêm ngế châ 5.400 – 5.500 dollars Mih. Kố cho tơdroăng pơkâ pêi hên, la tiô hên mâu kăn drêng hôp tơpui tơno ‘na tơdroăng kố mê vâi loi khât kô pêi châ tơƀrê mâu tơdroăng pơkâ pêi kố ƀă mơjiâng pro châ tung hneăng ki kố hlối. Pôa Trần Văn Lâm, Ngế ki lo ing Bắc Ninh tối rơdêi, mâu tơdroăng mơnhông châ tơƀrê, rơtế ƀă troăng hơlâ tŏng gum hiăng châ Kuô̆k hô̆i chêh pro klêi tung mâu hneăng hôp achê kố, cho ivá vâ Việt Nam mot tung hơnăm 2026 ƀă ivá hbrâ rơnáu ƀă loi tơngah.

“Thăm mơnhông hơnăn kố châ lối 8%. Ƀă tơdroăng tơ’lêi hlâu ăm hneăng kơ’nâi hiăng châ Kuô̆k hô̆i tung hên hneăng hôp pơla kố nah tơpui tơno vâ mơnhên ‘mâi rơnêu mâu troăng hơlâ luât, pro mơjiâng hên mâu kế tơmeăm ki mơdêi tŏng gum ăm chin phuh vâ mơdêk thăm mơnhông tung hơnăm 2026 ƀă tá hneăng kơ’nâi ƀă pơkâ pêi hên tâ ƀă ngin loi tiah kố cho ƀă mâu tơdroăng ki pin hiăng ƀă dế pêi mê kô châ tơƀrê kô chê tiô tơdroăng ki hiăng mơ’no”.

Ƀă 88,61% kăn vâ môi tuăn, kơxê kố Kuô̆k hô̆i hiăng tơbleăng tơdroăng Pơkâ ‘na kơxô̆ liăn tơnêi têa hơnăm 2026. Tiah mê, pơkâ tơbleăng kơxô̆ liăn tơnêi têa hơnăm 2026 ƀă kơxô̆ liăn nâp tơnêi têa lối 2 rơtuh 500 rơpâu rơtal. Tâi tâng hrê liăn tơnêi têa cho lối 3 rơtuh rơtal (ki hên cho vâ ‘mot tơ’nôm ăm mâu kong pơlê rak tơniăn pêi pro kơlo liăn khế 2 rơtuh 340 rơpâu liăn tung môi khế.

Môi kơvâ cheăng ki ê xuân châ mâu kăn Kuô̆k hô̆i ƀă kuăn pơlê tung lâp tơnêi kal vâ ‘nâi, mê cho tơdroăng ki livestream tê tơmeăm. Drêng tơpui tối ‘na Kơxop mơéa Luât tê mơdró điê̆n tưh, mâu kăn mơnhên tối kố cho môi tơdroăng luât ki kal, ôh ti xê ‘mâi rơnêu tơdroăng ki roê tê tơmeăm ing măng mê ối cho tơdroăng dêi cheăng kâ kơxô̆ tơnêi têa. Jâ Hoàng Thị Thanh Thúy, ngế ki lo ing Tây Ninh tối tiah kố, maluâ kơxop mơéa luât hiăng pơkâ hnoăng cheăng dêi ngế livestream tê tơmeăm la xuân ối ai hên tíu ki hông môi tiah: tá hâi ai troăng hơlâ mơdât hdrối vâ mơ’no tơdrêng tung măng mâu tơmeăm tơdjâk ‘mêi troh ivá, hâi khế ‘măn rak yưh liê̆u ối iâ, tá hâi pơkâ nhên hnoăng cheăng tơdjâk troh drêng tơbleăng tơdroăng ki ôh tá tro khât.

“Vâ ăm tơniăn khât kơxop mơéa chêh pro tơtro tâ ƀă ki ai khât dế rĕng hlo trâm dêi tê mơdró ing livestream, pâ thế kal tơmiât nhên ‘mot tơ’nôm troăng hơlâ hbrâ mơdât hdrối vâ mơ’no tơdrêng ƀă mâu rôh livestream mơđah tơbleăng ai pơxúa khât ƀă mâu tơmeăm ki tơdjâk ‘mêi troh ivá; pêi pro nhên hnoăng cheăng pôu râng tơdjâk troh ngế ki livestream tung tơdroăng ki mơ’no tơdroăng luâ tơdroăng ki tro ‘ló lơ ôh tá tro tâng vâ pơchông ƀă hồ sơ tơmeăm khoăng; Po rơdâ hâi khế ‘măn rak yưh liê̆u livestream; ‘Mot tơ’nôm hnoăng tơbleăng tơdrăng tơdroăng pơkâ pêi mơ’no livestream, mơdât mâu rơkong tơpui chêh ‘măn, seeding ôh ti ai khât ƀă ai troăng hơlâ vâ tối tơbleăng drêng ‘nâi kơxô̆ ngế ‘mot ngăn ôh tá tro tơdroăng”.

Ƀă 15 rơtuh ngế pơ’leăng mâ kuăn pơlê rơtế xông kân ƀă phôn râng kŏng ki rơkê la kơxop mơéa luât tá hâi ai pơkâ krê vâ rak ngăn krê ‘na hnoăng pơxúa ƀă tơdroăng ki tơniăn dêi vâi hdrêng tung tê mơdró điê̆n tưh. Xua mê, jâ Nguyễn Thị Việt Nga, ngế ki lo ing Hải Phòng pâ thế:

“Tơdrêng amê drêng châ hlo livestream ai tơdroăng tơpui ôh tá tro ƀă tơdroăng túa lĕm tro, pơkâ dêi luât pro ‘mêi troh vâi hdrêng mê kal ai troăng hơlâ tŏng gum tơbleăng tơrŭm pơla tơdroăng tơpui mơ’no ƀă kơ koan pơkuâ ngăn vâ rĕng xut tah lôi ƀă mâu tơdroăng ki tơpui mơ’no mê”.

Pêi pro nhên tơdroăng kố, pôa Bùi Thanh Sơn, Phŏ Ngế pro xiâm hnê ngăn tơnêi têa ăm ‘nâi:

“Kơxop mơéa luât nôkố xuân hiăng mơeăm chêh tơkŭm tâi mâu tơdroăng ki kal ki pin chiâng vâ pơkuâ ngăn tơniăn tro ăm mâu ngế ki roê kâ tơmeăm xuân môi tiah ngế ki veăng tung tơdroăng tê mơdró điê̆n tưh. Pakĭng mê, luât xuân hiăng pơkâ nhên hnoăng cheăng dêi ngế livestream ƀă ngế ki tê. Hâi kố pin kô pơtối tơmâng xo mâu rơkong tơpui dêi mâu kăn vâ hnê mơhno kơ koan chêh pro mơéa pơtối ‘mot tơ’nôm, chêh pro klêi tơdroăng ki kố, malối cho tơdroăng rak vế hnoăng pơxúa vâi hdrêng”.