Diêp kơxô̆ liăn veăng tơlo troh Khu Mơhnhôk tŏng gum mơngế hliăng tiâ pá puât Tơnêi têa, pôa Trần Thanh Lâm, Phŏ Kăn pơkuâ Pơtâng tối tơdroăng kal ƀă Mơhnhôk kuăn pơlê tơnêi têa tối, tung pơla kố nah, kong mêi têa kân lân lu pro tro lŭp ó troh kuăn pơlê mâu kong pơlê, mơnhông hiâm mơno ‘’tŏng gum dêi pó, hơ-ui pâ dêi pó’’, ‘’ngế ki chía hôm iâ kum ngế ki pá tâ’’, gum dêi pó kế kâ hmân ếo xâp, ‘’pâ mơngế môi tiah pâ dêi tơná’’ ƀă môi tuăn rơkong krếo thế dêi Khu hnê ngăn Vi ƀan xiâm Măt trâ̆n Tơnêi têa Việt Nam, khu pú hên kăn ƀô̆, đảng viên, mơngế pêi cheăng Khu pơtâng tối tơdroăng kal ƀă Mơhnhôk kuăn pơlê tơnêi têa pói vâ ing Khu mơhnhôk tŏng gum dêi tơnêi têa pơtroh tuăn pâ dêi tơná troh kuăn pơlê kơpong têa kân lân lu vâ gum hơlêm ƀă mâu tơdroăng pá puât, hía lŭp, châi hiâm mơno ki kuăn pơlê nếo tơkâ hluâ.

Troh kơxê măng lơ 25/11, kơxô̆ liăn kĭ ing Khu Mơhnhôk Tŏng gum Tơnêi têa tơkâ hluâ lối 2.088 rơtal liăn.