A tíu tơkăng kong cheăm Ƀuôn Đôn, Đông mô đô̆i gâk tơkăng kong Bo Heng tơrŭm ƀă Ƀơrô Kan sát kơ đŏng kong pơlê Dak Lak, Khu tŏng kum pơlê pơla Pơlê kong kân Hồ Chí Minh ƀă Tíu xiâm Ôm hyô Cầu treo Ƀuôn Đôn tơkŭm po tơdroăng "Trung thu tŏng kum" a Ƀuôn Trí. Mâu vâi o châ veăng kơhnhon xuăng, xah hêi tiô khôi vâi krâ nah, trâm mâ mơhno khôi túa lĕm tro ƀă tơdah 695 kơxuô tơmeăm. Khu tơkŭm po xuân diâp 150 kơxuô tơmeăm ăm mâu rơpŏng ai tơdroăng rêh ối pá puât.

A tíu tơkăng kong cheăm Ia Rvê, Đông mô đô̆i gâk tơkăng kong Ia Rvê hiăng diâp lối 1.300 kơxuô tơmeăm ăm hok tro ing râ mâm non troh râ má péa ƀă vâi hdrêng tung pơlê. A kơpong tơkăng kong têa kơxĭ bêng Xuân Đài, Đông mô đô̆i gâk tơkăng kong Xuân Đài tơrŭm ƀă Khu ngăn vâi kơdrâi bêng diâp 200 kơxuô tơmeăm Trung thu. Mâu tơmeăm kum vâi hdrêng kơpong tơkăng kong ai tơ'nôm tơdroăng hơniâp ro tung rôh Trung thu, mơhno tơdroăng ki rơtế prôk dêi kăn ƀô̆, mô đô̆i Gâk tơkăng kong rơtế khu râ kăn pơkuâ, mâu khu tơrŭm ƀă khu ki ai tuăn hơ-ui ƀă mâu rơpŏng ki ối xơpá.