15 ngế kăn ƀô̆, mố đô̆i Khu pơkuâ hbrâ mơdât kơpong 6 (Khu pơkuâ ngăn lêng kong pơlê Gia Lai, Kuân khu V) hiăng ‘nhiê tah mâu mơnât hngêi ki tơ’nhiê tơhnâp, gô̆m văng mơgrúa lĕm tíu, vê ngăn ƀă chiâ klôh tâp vâ meăm pro trêi vâ pro hngêi ăm mâu rơpŏng nâ Trần Thị Lợi, cheăm Phù Mỹ, kong pơlê Gia Lai (hdrối nah cho cheăm Mỹ Quang, tơring Phù Mỹ, kong pơlê Bình Định). Đăi ŭi Đỗ Xuân Nam ngế cheăng kal kí, Khu pơkuâ ngăn hbrâ mơdât Kơpong 6 ăm ‘nâi, ƀă 15 ngế kăn ƀô̆, mố đô̆i lăm chu troh gum kuăn pơlê, tíu pêi cheăng kố mơni kô pro klêi hdrối hâi lơ 31/1/2026.

“Kuân khu V hiăng pơcháu hnoăng cheăng, pơkâ thế mâu khu lêng kring vế Khu pơkuâ hbrâ mơdât veăng pêi pro kơhnâ, vâ teăm tí tăng ‘nâi plĕng ăm Khu pơkuâ ngăn lêng kong pơlê tơkŭm pêi pro hnoăng cheăng pro hngêi ƀă ‘mêng hngêi ki tơ’nhiê ăm kuăn pơlê hdrối vâ troh Têt khôi hmâ. Đảng ủi Khu pơkuâ hbrâ mơdât 6 tối kố cho hnoăng cheăng kal kí ki kal, vâ rak vế tơniăn mơjiâng pro hngêi ăm kuăn pơlê rĕng má môi, gum kuăn pơlê rĕng tơniăn tung tơdroăng rêh ối, pro pơxúa ki hơniâp ro ƀă phâi hơtôu ăm kuăn pơlê”.

Tung rôh kong mê têa kân pơla kố nah, toăng hngêi dêi nâ Trần Thị Lợi tro têa mơhiu tơhnâp tâi tâng; 3 tâ̆n báu rơtế tivi, kơtuh hngíu ƀă hên tơmeăm xúa ki ê xuân tro têa mơhiu. Klêi kơ’nâi kong mê têa kân, Tơnêi têa gum 60 rơtuh liăn vâ rơpŏng nâ Lợi pro hngêi ối; mố đô̆i gum hnoăng pro hngêi, gum nâ tơrêm tơdroăng cheăng ki kŭn má môi. Nâ Trần Thị Lợi ƀriê lo têa mâ xua mâu hlo mâu mố đô̆i hiăng gum nâ pro hngêi, ôh tá xâu kong tôu kong mê:

“Ki hdrối tâ á mơnê mâu vâi ngoh mố đô̆i hên khât xua hiăng tŏng gum vâ rơpŏng á ai môi toăng hngêi nếo vâ ối, ăm mâu kuăn ‘nĕng ai tíu ối vâ hriâm tâp”.

Pôa Võ Trọng Đàng, a cheăm Hòa Thịnh, kong pơlê Dak Lak (hdrối nah cho ối tung cheăm Hòa Thịnh, tơring Tây Hòa, kong pơlê Phú Yên ton), xuân tro têa hiu pro tơhnâp hngêi, tâi tâng tơmeăm ki ‘măn kơdĭng to lâi hơnăm tro têa mơhiu tâi. Rơpŏng pôa châ Tơnêi têa gum pro ăm hngêi nếo, mố đô̆i mê veăng gum hâi pêi cheăng pro mơnât, lêm tôl. Ngăn mâu kăn ƀô̆, mố đô̆i Khu pơkuâ hbrâ mơdât kơpong Tuy Hòa ôh tá xâu mê khía, hâi măng gum pro hngêi, pôa Võ Trọng Đàng ƀriê lo têa mâ.

“Sap ing rôh Ngế pro xiâm hnê ngăn tơnêi têa tơbleăng pro hngêi ối ăm kuăn pơlê, mâu mố đô̆i vâi kơhnâ khât tung tơdroăng ki veăng pro hngêi ăm vâi krâ nhŏng o. Môi tiah hngêi á, hâi ki lâi xuân ai lối 10 ngế mố đô̆i troh pro hngêi, nôkố trêi hngêi hiăng pro klêi.

Khía mơhot kân rôh má 13 ƀă têa lân lu klêi mê hiăng tơhnâp kơtong 1.653 toăng hngêi ƀă tơ’nhiê 39.462 toăng a pŭn to kong pơlê Gia Lai, Dak Lak, Lâm Đồng ƀă Khánh Hòa. Klêi kơ’nâi kong mê khía mơhot têa lân lu hiăng luâ, pôa Phạm Minh Chính, Ngế pro xiâm hnê ngăn Chin phuh hiăng tơbleăng “Tơdroăng tơplâ Quang Trung rĕng pro” vâ pro hngêi ăm kuăn pơlê kơpong tro têa lân lu. Mố đô̆i cho môi tung mâu khu ki kal xiâm dêi rôh pêi pro kố. A 2 to kong pơlê Gia Lai ƀă Dak Lak, bu klêi kơ’nâi 10 hâi Ngế pro xiâm hnê ngăn tơnêi têa tơbleăng, hiăng ai lối 750/1.075 toăng hngêi châ pro ƀă dâng 80% kơxô̆ hngêi ki kố dế hiăng vâ pro klêi.

Đăi tă Trần Minh Trọng, Phŏ pơkuâ ngăn Đảng lêng Kuân khu V, ăm ‘nâi, lối 5 rơpâu ngế kăn ƀô̆ mố đô̆i dế rêm hâi veăng pro hngêi, vâ khŏm pro klêi tro tơdroăng pơkâ thế dêi Ngế pro xiâm hnê ngăn tơnêi têa.

“Mâu tíu pêi cheăng dêi Khu xiâm ƀă Kuân khu V hiăng mơjiâng 279 đô̆i pro ƀă lối 5.300 ngế kăn ƀô̆, mố đô̆i vâ veăng lo pro hngêi gum ăm vâi krâ kuăn pơlê. Nôkố, mâu tíu pêi cheăng, kăn ƀô̆, mố đô̆i dế kơhnâ tơrŭm ƀă kăn pơkuâ cheăm bêng, hâi măng pro hngêi vâ mơeăm pro klêi hdrối hâi lơ 31/1/2026 kô pơcháu hngêi, gum mâu rơpŏng teăm mot ối, tơdah Têt khôi hmâ 2026 tung mâu toăng hngêi ki hơtôu pơla lêng ƀă kuăn pơlê”.

Tung mâu pơlê cheăm ki tro têa lân lu, mâu toăng hngêi ki pro ƀă mâu gât khêi ƀă têa kơxôu dêi mâu lêng, môi tiah reăng tơngah dế mơeăm tơná khât tơrêm chôu. Mâu toăng hngêi ki krá kâk ôh ti xê to gum kuăn pơlê rĕng tơniăn tung tơdroăng rêh ối, mê ối têk bâ eăng tơdroăng loi, tơbêng hiâm mơno tơrŭm pơla lêng ƀă kuăn pơlê chiâng rế krá tơniăn tâ, cho rơkong tơhrâ dêi Đảng, Tơnêi têa, kăn pơkuâ mâu kong pơlê ‘na tơniăn tíu ối ăm Nam Trung Bộ ƀă Tây Nguyên.