Sap ing apoăng hneăng pêi cheăng troh nôkố, Kuô̆k hô̆i hiăng pơkâ 99 luât, 165 tơdroăng pơkâ, tơkŭm tâi tâng mâu kơvâ cheăng kâ, rêh ối pơlê pơla, tơdroăng cheăng lêng, gâk kring tơpui kâ, hbrâ mơdât kâ kơhveăm, pro mơhrê liăn ngân; pơkâ ivá cheăng pêi krá tơniăn ăm tơdroăng mơjiâng khu pơkuâ tơdroăng kal kí iâ, tơkŭm, xêt tơƀrê, achê ƀă kuăn pơlê, tro ƀă kuăn pơlê bă gum kuăn pơlê, khu mơdró kâ tơniăn lĕm tâ. Pôa Trần Thanh Mẫn, Kăn xiâm hnê ngăn Kuô̆k hô̆i tối nhên:

“Malối, Kuô̆k hô̆i hiăng tơbleăng tơdroăng Pơkâ ‘mâi pơhlêh, ‘mot tơ’nôm mâu tơdroăng dêi luât; ‘mâi pơhlêh Luât Tơrŭm Kuô̆k hô̆i, Luât Tơrŭm kăn pơkuâ kong pơlê; Kuô̆k hô̆i, Vi ƀan pơkuâ Kuô̆k hô̆i hiăng pơkâ tiô hnoăng pơkuâ mâu pơkâ ‘na klâ xoăng tíu pêi cheăng râ kong pơlê, râ cheăm. Kố cho mâu pơkâ ki kal, ai pơxúa ó khât, tơdjâk troh tâi tâng khu pơkuâ tơdroăng kal kí, troh rêm ngế kuăn pơlê, troh rêm tâi tâng pơlê pơla”.

Kuô̆k hô̆i hiăng tơkŭm tŏng gum xơpá ‘na mâu tơdroăng ki tro mơdât ‘na troăng hơlâ vâ mơnhông tơƀrê cheăng kâ rêh ối pơlê pơla tung chal nếo, malối, cho tơbleăng 4 Pơkâ tung la ngiâ: Pơkâ 57 khoa hok kŏng ngê̆, pơhlêh nếo, tơmiât pêi rơkê, pơhlêh kơxô̆ tơnêi têa; Pơkâ 59 ‘na tơrŭm cheăng ƀă kong têa ê; Pơkâ 66 ‘na mơjiâng ƀă pêi pro luât; Pơkâ 68 ‘na mơnhông cheăng kâ krê.

“Kuô̆k hô̆i hiăng pơhlêh nếo túa tơmiât mơjiâng pro luât tiô troăng rế rak vế tơniăn tơdroăng pơkâ thế pơkuâ ngăn Tơnêi têa, rế mơhnhôk tơmiât pêi rơkê, mơ’no tâi tâng mâu ivá cheăng mơjiâng pro, pro tơ’lêi hlâu mâu kơxô̆ liăn vâ mơnhông. Tah lôi túa tơmiât “ôh tá kâi pơkuâ vâ teăm mơdât”; mâu tơdroăng pêi pro ki ai khât gá pơhlêh đi đo mê pơcháu ăm Chin phuh, kong pơlê pơkâ vâ rak tơniăn tơdroăng ki rơkê tung pơkuâ. Mơdêk rơdêi klâ xoăng, xoăng hnoăng ƀă túa pơkâ “kong pơlê pơkâ, kong pơlê pêi, kong pơlê pôu râng”; pơhlêh kơtăng vâ mơ-éa chêh pri, kơdroh liăn nâp tiô pơkâ, pro tơ’lêi hlâu khât ăm kuăn pơlê ƀă khu mơdró kâ; pêi pro klâ xoăng rak vế tơtro ƀă ivá pêi cheăng tơkŭm pêi pro”.

Kuô̆k hô̆i hiăng pêi pro tŭm, rơkê ƀă tơƀrê tơdroăng pơkâ mâu tơdroăng ki kal ‘na cheăng kâ, rêh ối pơlê pơla, cheăng lêng gâk kring, tơpui kâ; rak vế tro tơdroăng ki tâi tâng, ai tơdroăng ki tơrŭm krá tơniăn pơla pơkâ thế pêi hnoăng cheăng ƀă kơxô̆ liăn pêi cheăng. Hên pơkâ cho tơdroăng ki mơnhông, sap nah tá hâi ai, tối rơdêi túa tơmiât xo kuăn mơngế pro ngế ki kal xiâm, mâu troăng hơlâ pơkâ, troăng hơlâ tŏng gum pơrá xua Kuăn pơlê.

Hên tơdroăng pơkâ tŏng gum ki kal, môi tiah: Pơkâ ‘na troăng hơlâ tŏng gum pro hngêi ối pơlê pơla; Pơkâ ‘na ôh tá nâp liăn hriâm ƀă vâi hdrêng mầm non, hok tro phôh thong, ngế hriâm yăo yuk phôh thong a mâ mâu tíu hnê hriâm ối tung tơdroăng ki hnê hriâm kuăn pơlê; Pơkâ ‘na hnê mầm non ăm vâi hdrêng mâuh yăo sap ing 3 troh 5 hơnăm.

Kuô̆k hô̆i hiăng mơnhông hnoăng cheăng cho “ivá rơdêi ôh tá pro pá” dêi tơdroăng tơpui kâ Kuô̆k hô̆i, tơdroăng cheăng tơpui kâ dêi Kuô̆k hô̆i hiăng veăng gum tơƀrê tung tơdroăng pêi pro troăng hơlâ tơpui kâ krê, mơeăm xêh, hơniâp lĕm, tơrŭm tơroâ, pêi pro hên tơdroăng, hên túa, mơdêk um méa, tíu ối dêi Việt Nam a kong têa ê dêi Đảng ƀă Tơnêi têa pin. Vâ pơtối mơnhông khôi hmâ 80 hơnăm dêi Kuô̆k hô̆i Việt Nam, pôa Trần Thanh Mẫn, Kăn xiâm hnê ngăn Kuô̆k hô̆i ăm ‘nâi:

“Kuô̆k hô̆i pơtối pơhlêh nếo tŭm têk, mơdêk ivá cheăng mơjiâng luât, séa ngăn ƀă pơkâ pêi mâu tơdroăng ki kal dêi tơnêi têa; séa ngăn nhên tơdroăng pơkuâ dêi Đảng, Kuô̆k hô̆i kô pơtối rơtế prôk ƀă Chin phuh, Măt trâ̆n Tơnêi têa, mâu kơ koan mơjiâng luât ƀă tá khu pơkuâ tơdroăng kal kí tơbleăng pêi tơƀrê Luât ƀă mâu luât pơkâ, tơdroăng pơkâ hiăng mơ’no. Khŏm mơ-eăm khât vâ tơkŭm pêi pro tro Pơkâ kơxô̆ 66 hâi lơ 30/04/2025 dêi Khu xiâm pơkuâ tơdroăng kal kí ‘na pơhlêh nếo cheăng mơjiâng ƀă pêi pro luât tiô púi vâ mơnhông tơnêi têa tung chal nếo”.

Kăn xiâm hnê ngăn Kuô̆k hô̆i ăm ‘nâi, Kuô̆k hô̆i tơrŭm tơkŭm po ƀlêi chiâng Hneăng hôp Đảng rêm râ tơmiât troh Hneăng hôp kân Đảng lâp tơnêi têa rôh má 14; hnê mơhno tơkŭm pôk kăn Kuô̆k hô̆i hneăng 16 ƀă Hô̆i đong hnê ngăn Kuăn pơlê rêm râ hơnăm 2026 – 2031.

Kuô̆k hô̆i kô pêi pro klêi mâu tơdroăng ki kal dêi Hneăng cheăng 15, tơdroăng hneăng hôp rôh má 10 ƀă hên tơdroăng kal ki ê, tung mê, Chin phuh kô pơtroh lối 90 tơdroăng kal, ai 47 luât. Po mơgêi hneăng cheăng Kuô̆k hô̆i hneăng 15. Mơjiâng troăng mơjiâng luât hneăng cheăng Kuô̆k hô̆i hneăng 16.

Pôa Trần Thanh Mẫn, Kăn xiâm hnê ngăn Kuô̆k hô̆i tối nhên, Kuô̆k hô̆i pơtối tối rơdêi tíu ối, hnoăng cheăng cho kơ koan kăn xiâm má môi dêi Kuăn pơlê; pêi châ tơdroăng púi vâ teăm tơdrêng mâu hnoăng cheăng tung la ngiâ dêi tơnêi têa tung hneăng ki nếo.