A kơno tuk Quy Nhơn, chât ngế kăn ƀô̆, mâu mô đô̆i Gâk kring têa kơxĭ Mô đô̆i gâk tơkăng kong 2 ƀă Đông Mô đô̆i gâk tơkăng kong Tíu tê mơdró ngi kong têa ê kơno tuk Quy Nhơn thâ xui 120 tâ̆n phái xua Kơ koan xiâm ‘măn kơdĭng Tơmeăm kâ Tơnêi têa ăm kuăn pơlê Gia Lai. Têa kơxôu kơchoh a kơxah ếo laga kơbố xuân mơ-eăm tâi ivá vâ teăm tơdrêng djâ tơmeăm tŏng gum troh kuăn pơlê mâu cheăm Quy Nhơn Bắc, Quy Nhơn Đông ƀă Tuy Phước, mâu kơpong tro lŭp ó má môi dêi têa kân lân lu. Trung tă Nguyễn Tùng Giang, Cheăng kal kí đông Mô đô̆i Gâk tơkăng kong Tíu tê mơdró ngi kong têa ê kơno tuk Quy Nhơn, tối ăm ‘nâi:

‘’Ngin mơhnhôk mâu ngế ki tŏng gum mơngế pá puât tŏng veăng lối 3.000 kơxuô tơmeăm, 300 plâ pơkhom, 30 khô̆i têa chiên ăm kuăn pơlê kơpong ki ôh tá châ prôk lăm a dêi pó. Tung la ngiâ, ngin pơtối pơtroh khu kum kuăn pơlê vêh tơniăn tơdroăng rêh ối tiah hmâ.’’

Pakĭng mơ’no ivá ăm tơdroăng tơdah ƀă pơto chiân tơmeăm tŏng gum, mâu đông Mô đô̆i Gâk tơkăng kong ối lăm a rêm pơlê vâ tŏng gum kuăn pơlê. A cheăm Ngô Mây ƀă Cát Khánh, 20 ngế kăn ƀô̆, mô đô̆i Đông Mô đô̆i gâk tơkăng kong Cát Khánh tơrŭm ƀă khu pêi cheăng pơlê xing xoăng 15 toăng rơxế tŏng gum troh mâu thôn Chánh Hữu, Chánh Định, Chánh Hội ƀă Vân Trim.

Rêm khu ki ê troh chu a troăng ki tro tơhnah tơhnâp, mơgrúa tơnêi hmốu, tŏng gum kuăn pơlê xui mâu tơmeăm, mơgrúa hngêi trăng. Thiê̆u tă Nguyễn Hữu Tự Thắng, Cheăng kal kí Đông mô đô̆i gâk tơkăng kong Cát Khánh, tối:

‘’Nôkố, hên troăng kân ki xiâm hiăng ăm rơxế chiâng prôk lăm. Đồng mô đô̆i gâk tơkăng kong Cát Khánh tơrŭm ƀă mâu khu ối tung pơlê mơhnhôk mâu ngế ki hmâ lăm tŏng gum pơtối lăm tŏng gum kuăn pơlê ‘na têa ôu, tơmeăm xúa tung rêh ối, tơmeăm kâ, pơkeăng, djâ troh a tíu ối vâ kuăn pơlê xúa; tơkŭm mơgrúa kong prâi, kui tah trâp ăm hok tro vâ rĕng châ troh hngêi trung hriâm.’’

A Hngêi trung râ má péa Nguyễn Bá, cheăm Tuy Phước, Lưh đoân 537 (Kuân khu 5) kui tah trâp, tông ‘măn lĕm tăng ‘nân ối hriâm, mơgrúa kơbong hriâm, hbrâ lĕm má môi ăm tơdroăng tơdah hok tro vêh hriâm a lâm. Cô hnê chư Hồ Thị Minh Phung tâ rơrêk tung hiâm mơno tối:

‘’Mô đô̆i hiăng kum hngêi trung, tâng tơkôm thái cô mê hngêi vâi ối hơđong hơđăng ôh tá châ vâ lăm troh ôh. Xua mê mơnê hên mâu đông lêng mô đô̆i hiăng tŏng gum mâu hngêi trung hriâm vâ teăm tơdrêng ăm mâu vâi o troh hngêi trung hriâm.’’

Tung roh têa lân lu kân sap nah tá chói ai pơla kố nah, chât rơpâu kăn ƀô̆, mô đô̆i Kuân khu 5, Kuân đoân 34 ƀă Khu xiâm pơkuâ Mô đô̆i kong pơlê Gia Lai hiăng rơtế lo lăm gum, tơrŭm ƀă kŏng an ƀă khu râ kăn pơkuâ pơlê tơkŭm po tŏng gum mơngế hliăng tiâ, xĕn hrĭng rơpâu ngế kuăn pơlê lo a kơpong ki rơ-iô; pêi pro tơdroăng tŏng gum châ rơpâu roh ngế drêng têa kân lân lu ó xua kong prâi pro.

Kơnôm pêi kơtăng ƀă teăm tơdrêng mê, mơhé tro lŭp ‘na kế tơmeăm tiô riên lối 1.000 rơtal liăn, Gia Lai xuân ví châ tơdroăng tro rong ƀă hlâ. Ƀă kơpong têa lân lu Gia Lai, khu lêng cho ếo ki đông pêng têa tŏng gum, cho tíu hgiên krá tơniăn, rơtế prôk ƀă kuăn pơlê tơkâ hluâ pơloăng mơnúa.

Ƀă a cheăm Đồng Xuân, kong pơlê Dak Lak, Đăi tă Nguyễn Trường Sinh, Sư đoân trương Sư đoân 2, Kuân khu 5, tối ăm ‘nâi, têa kân lân lu hiăng pro tơ’nhê hên tơmeăm pơlê pơla ƀă hngêi kuăn pơlê. Kơxô̆ tơdroăng cheăng dêi mô đô̆i gum kuăn pơlê cho kân drêng dế mơgrúa lĕm hngêi trăng, rế mơgrúa lĕm kong prâi, ví pro ‘mêi, rế kum kuăn pơlê rơnêu pro hngêi ối, mơdâng hngêi ối. Ƀă hiâm mơno khŏm mơ-eăm hên, tíu cheăng mơ-eăm kêi đeăng rĕng má môi hnoăng cheăng châ pơcháu a kơpong têa kân lân lu.

‘’Kăn ƀô̆, mô đô̆i Sư đoân 2 ƀă khŏm mơ-eăm hên, ƀă hâi khế rĕng má môi, kô mơ-eăm rơtế khu râ kăn pơkuâ pơlê, mâu khu cheăng kô gum a mâu kơpong ki xiâm, ki kal, vâ rĕng djâ tơdroăng pêi cheăng dêi khu râ kăn pơkuâ, ki rơhêng vâ tối cho mâu tíu hngêi trung hnê hriâm, tíu xiâm khăm pơlât ƀă tơdroăng pêi cheăng dêi khu râ kă pơkuâ, kuăn pơlê a pơlê cheăm vêh tơniăn tơdroăng rêh ối.’’

Đăi tă Đinh Văn Hưng, Chính ủi Khu xiâm pơkuâ Mô đô̆i kong pơlê Dak Lak tối ăm ‘nâi, klêi kơ’nâi pêi kêi đeăng hnoăng cheăng tŏng gum, nôkố mâu tíu cheăng tơkŭm kum kuăn pơlê mơgrúa lĕm hngêi trăng rêm rơpŏng ƀă tá kơpong kuăn pơlê rêh ối, rơnêu troăng klông, rơnêu mâu hngêi pơkeăng cheăm, rơnêu hngêi trăng tro tơ’nhê, xing xoăng kế kâ, tơmeăm kâ, pơkeăng, tơmeăm khăm pơlât, pơkhom, bung, duh, hmân ếo, tơmeăm pế kâ vâ kuăn pơlê tơniăn tơdroăng rêh ối.

‘’Mơ-eăm kân má môi dêi kăn ƀô̆, mô đô̆i dêi Khu xiâm pơkuâ mô đô̆i, mâu tíu cheăng Kuân khu, khu mô đô̆i kong pơlê dế pêi cheăng tung pơlê cho drêng lâi rơnêi klêi tơmeăm xúa mơhot têa kân lân lu, ki rơhêng vâ tối klêi kân lu roh kố mê mâu đông lêng nếo kêi đeăng hnoăng cheăng ƀă nếo vêh a đông vâ pêi pro hnoăng cheăng pơtối dêi tơná.’’

Tung rơnó kong mêi têa kân lân lu, um méa mơngế lêng pơtối tơ’nôm môi xôh ối tung plâi nuih kuăn pơlê, ôh tá xê to khu mô đô̆i tơplâ gâk kring Tơnêi têa, mê ối cho tíu hgiên krá dêi kuăn pơlê drêng trâm xía vâ. Drêng trâp tơnêi u ối tá hâi teăm khăng, drêng tơdroăng rêh ối hơđŏng hơđăng ôh tá ai tŭm tơmeăm, mâu kơpeăng kŏng mâu ngế lêng xuân ối gum, mơdâng hngêi trăng, mơgrúa rêm troăng kân, pế rêm roh kơchâi hmê hơtô ăm kuăn pơlê. Mô đô̆i gum kuăn pơlê kơpong têa kân lân lu ôh tá xê to ƀă ivá, mê ƀă tá hiâm mơno. Mê cho pơkâ pêi ing plâi nuih dêi mơngế lêng Mô đô̆i Pôa Hồ tung rơxông hơniâp lĕm hâi kố.